SZ Wjelećin

– Sokoł Ralbicy/Hórki 3:2 (2:0)

Zestawa hosći: Ch. Gloxyn – Rawš, Matka, B. Bjeńš, von Köding, Šewc, S. Bjeńš (46. T. Bejma), Korjeńk, D. Gloxyn, Domaška, Wałda

Hladajo na tabulkowu konstelaciju běchu koparjo Sokoła Ralbicy/Hórki wězo faworit. Štóž pak ma hišće hrě minjeneje sezony w pomjatku, tón wě, zo sej Sokoljo přećiwo koparjam z palencoweho městačka stajnje žiwjenje ćežko činja a su hižo dwójce njerozsudnje hrali. Trenar Thomas Schultz namołwi swojich chowancow, zo maja hnydom prezentni być. To pak so jim w prěnim połčasu docyła njeporadźi. W dwuboju njeběchu hosćo scyła wuspěšni. A přećiwnik je swoje šansy zymnokrejnje wužiwał. Po dwělomnym wólnym kopje bu bul nisko do šěsnatki hraty a Patrick Queitsch kónčk nohi do třělwy tykny. Chrystof Gloxyn bě přewinjeny (9.). Tež 2:0 padny po wólnym kopje. Při dołhej žerdźi stejo Frank Beger bul do wrotow zhłójčkowa (31.). Minutu po tym ležeše bul we wrotach Wjelećanow. Wałda bě trjechił. Sudnik pak lěpšinu za Sokoł wothwizda a postaji na wólny kop. Krótko do połčasa postaji sudnik jědnatku za hosći. Ale tež tutu składnosć woni njewužichu a wrotar dźeržeše.