SC Mały Wosyk

– Sokoł Ralbicy/Hórki 0:9 (0:5)

Zestawa hosći: Ch. Gloxyn – Matka (60. Rawš), von Köding, Schultz, Šewc, Bjeńš, D. Gloxyn (60. Wałda), Bejma, Korjeńk, Domaška, Kurjat

W dalšim pokalnym kole dyrbjachu koparjo Sokoła Ralbicy/Hórki k zastupjerjej wokrjesneje klasy, SC Małemu Wosykej. Wot spočatka bě dwě klasy wyše hrajacy cyłk z Delan jasny faworit, štož na hrajnišću tež hnydom pokaza. Byrnjež trawnik chětro dźěraty był, dachu Sokoljo bul přez cyły čas jara derje běžeć. Z krótkimi a dwójnymi přihrawkami so hač k přećiwniskim wrotam předrěchu, před nimi pak husto přezwjeršnje wotzamknychu. Gabriel Kurjat (8.) a Pětr Domaška (11.) pak po tójšto šansach skónčnje trjechištaj. Dalše dobre móžnosće dźěchu wyše abo pódla wrotow. Domjacy hajerjo mějachu jeničku móžnosć přez konter, bul pak dźěše na łatu. Dalše rjane wrota hač k 0:5 do přestawki docpěchu za Sokoł Domaška (31.), Fabian Korjeńk (40.) a Kurjat (41.).