Rakečanske ST

– Sokoł Ralbicy/Hórki 4:1 (4:1)

Zestawa hosći: Ch. Gloxyn – Matka, von Köding, B. Bjeńš, Bejma, Šewc (28. Domaška), Schultz, S. Bjeńš, D. Gloxyn, Wałda (70. Kurjat), Korjeńk

Byrnjež trenar koparjow Sokoła Ralbicy/Hórki Thomas Schultz z Pětrom Domašku, Bosćijom Bejmu a Gabrielom Kurjatom hnydom třoch sylnych nadběhowarjow w kadrje měł, so wón rozsudźi wšitkich třoch najprjedy raz na ławce sedźo wostajić. Přičina toho bě wurjadny wuspěch Sokołow před tydźenjomaj w Kumwałdźe, hdźež bjez nadběhowarja wonkowne dobyće swjećachu. Tak hrajachu nětko samsni jědnaćo hišće raz, tónkróć pak bě wšo hinak. Snano dyrbjeli při sćoplenju sudnika hižo raz narěčeć, hač nochce hru wupadnyć dać. Trawnik bě njesměrnje zmjerznjeny a na hładkej trawje so hrajerjo wobsuwachu. Prawa kopańca scyła móžna njebě. Hosćo pak njeskoržachu a sudnik Nils Fiedler hru zahwizda­.