Prěnja połserija volleyballoweje wobwodneje ligi mužow zakónčena

Wosom hrow sezony je hratych, to je połojca. Čas tuž za krótki mjezyfacit. Zasłužbny nazymski mišter je mustwo JTVG Fitnes Koblicy, zestupnik ze sakskeje klasy. Kobličenjo su přerěznje najlěpši wukon pokazali. Wulka chwalba tež młodym volleyballistam OSC Lubija. Woni su kaž Kobličenjo sydom razow dobyli a jenož přećiwo Worklecam přěhrali. Na třećim městnje, a tak tež hišće na wirtuelnym podesće, steja „młodźi dźiwi“ Viktorije Worklecy. To je za małe towarstwo, kotrež bě chětro derje do sezony startowało, česćehódne. Prěnja hra we Wojerecach bě z jasnym 3:0 wulki wuspěch. Slědowaše domjacy hrajny dźeń w Ralbičanskej sportowni přećiwo volleyballistam z Mittelherwigsdorfa a z Běłeje Wody. Z wulkej hrajnej wjesołosću Worklečenjo wobě hrě znowa z 3:0 dobychu a stejachu na čole tabulki. Tutu poziciju zakitowachu w Kundraćicach, hdźež běchu z 3:2 tola hišće wuspěšni. Na druhim domjacym hrajnym dnju pak so problemy započachu. Přećiwnik OSC Lubij běše twjerdy worjech.