W Radworju dobychu basketballisća Serbskeho gymnazija Budyšin (SGB) regionalne finale w starobnej klasy II a docpěchu druhi raz kónčne krajne wurisanje „Młodźina trenuje za olympiju“.

Hižo prěnja hra na turněrje štyrjoch šulow wuchodneje Sakskeje je wo złotej medali rozsudźiła. Přećiwo hólcam Schilleroweho gymnazija běchu basketballisća SGB nerwoznje a njekoncentrowanje startowali. Tak ležachu k połčasej z dypkomaj w zastatku. Štož pak po tym slědowaše, je wulkeje chwalby hódne. Dokładne přihrawki, spěšne kontery a přemyslene wotzamknjenja ćisnjenja do koša wjedźechu ke kónčnemu 23:14. Hrajerjo wokoło kapitana Pětra Dźisławka běchu jara motiwowani a njedachu w dalšimaj partijomaj sportowej konkurency žanu šansu na dobyće. Najprjedy přesadźichu so přećiwo Wyšej šuli Ludwiga Richtera Radeberg z 43:13, pozdźišo porazychu Parkowu wyšu šulu Žitawa z 21:8.