Z Frankom Ričelom, trenarjom krajneho koparskeho ligista Jednota Kamjenc, je so Hanspeter Benad rozmołwjał.

Što měniće k prěnjej połseriji?

F. Ričel: Z dwěmaj třećinomaj połserije sym jara spokojom. Jeno spočatk sezony je nam trochu čerstwosć pobrachowała. To zaležeše na krótkej přihotowanskej fazy a na tym, zo njeběchmy za wuspěchom chcyćiwi dosć.

Stejiće tuchwilu na třećim městnje tabulki. Što sće sej za druhu połojcu sezony přede­wzali?

F. Ričel: W předchadźacej seriji běchmy so w poslednim wokomiku na druhe městno sunyli. Lětsa chcemy krajnu ligu dobyć, njetrjebamy pak.

Jeli staflu dobudźeće, dóstanjeće potom wot předsydstwa Jednoty Kamjenc zelenu swěcu za postup do wyšeje ligi?

F. Ričel: Haj, je dźě znate, zo je Jednota Kamjenc k tutej tematice zna­mjo sadźiła. Hdyž cil docpějemy, dóstanjemy trěbnu podpěru. Myslu sej, zo je to mustwo tež pozitiwnje přijimało.

Su nowopřichady wočakowanja spjelnili?

F. Ričel: Powšitkownje haj. Stopnjowanje je přiwšěm hišće móžne. Jenož Patrick Neumann je tróšku wotpadnył, ale nadźijam so, zo so zaso zhraba.