Jan Budar, direktor Załožby za serbski lud, je wčera popołdnju zhromadnje ze sobustawami předsydstwa Serbskeho Sokoła­ skupiny za 35. sokołski volleyballowy turněr wo pokal Domowiny wulosował. Do štyrjoch skupinow wulosowa Budar 19 přizjewjenych cyłkow a jedne mustwo, kotrež smě so hišće přizjewić. Na čole staflow steja najlěpše cyłki lońšeho turněra, mustwo z pólskeje Tokarnie lětsa sobu hrać njebudźe.

Hač do poprawneho přizjewjenskeho časa (31.12.16) je so 16 cyłkow přizjewiło, po tym hišće tři dalše. Tuž je so předsydstwo Serbskeho Sokoła na to dojednało, startowe polo na 20 mustwow rozšěrić. Za swobodne městno w skupinje D budu nětko zaměrnje mustwo pytać, zo by kóždy cyłk jenaku ličbu hrow měł. Na wupruwowanym modusu Sokoljo ničo změnić njebudu. Po skupinskich hrach chcedźa překřižne hry wuhrać, potom wo městna 5 do 20 hrać a naposledk finalne hry přewjesć. Wulke finale budźe znowa na wulkim polu wuhrate. Wo zastaranje budu so Sokołki a Sokoljo znowa sami starać. Hač budźe so dźěćaca zaběra poskićić móc hišće jasne njeje.