Dźiwje micki hraja w Ralbicach

štwórtk, 01. septembera 2016 spisane wot:
Dźiwje micki, hrajerki prěnjeho volleyballoweho mustwa holcow Viktorije Worklecy, změja sobotu na wobwodnej runinje swoju prěnju winowatostnu partiju, a to w Ralbicach. W 14 hodź. nastupja wone přećiwo VV Žitawje 09 II a hraja wo zaćah do dalšeho pokalneho koła. W samsnym času wubědźuja so mužojo-volleyballisća Viktorije Worklec, a to w sportowni Serbskeho šulskeho a zetkawanskeho centruma Budyšin přećiwo cyłkomaj z Kundraćic a Koblic.

Njerozsudnyby sprawniši wuslědk był

štwórtk, 01. septembera 2016 spisane wot:

FSV Łuty – Sokoł Ralbicy/Hórki II 1:0 (0:0)

Zestawa hosći: Hrjehor – Materna, M. Matka, Bogusz, Rawš, Jakubaš (78. Čornak), Šołta, Kobalc, Serbin (51. J. Matka), Šmit, Kurjat (84. Čórlich)

Po jědnaće přećiwniskich wrotach w dwěmaj partijomaj přestajichu koparjo Sokoła Ralbicy/Hórki swój system zaso na hru z liberom. Tež Dominik Šmit je zaso pódla był, po tym zo bě swoje chłostanje za čerwjenu kartu z poslednjeje hry w sezonje 2015/2016 wotsedźał. Hosćo běchu defensiwnje nastajeni. Syman Bogusz postara so jako libero wo trěbny měr a wěstotu.

Hra wotměwaše so zwjetša mjez šěsnatkomaj, bjez toho zo so něšto wulce sta. Najwjetšu šansu měješe stary zajac Handrij Jakubaš, jako bu wot Tomaša Rawša rjenje swobodnje hraty. Přećiwniski wrotar pak zastatkej z wulkotnej paradu zadźěwa.

Po přestawce skićeše so mało přihladowarjam samsny wobraz. Při horcych temperaturach běchu šansy rědke, byrnjež domjacy wjetše hrajne podźěle měli. Nažel je hewak jara derje hwizdacy sudnik w 77. min. jara dwělomnu jědnatku postajił. A Thomas Lock ju přetwori. Ralbičenjo drje wojowachu, před wrotami pak hižo strašni njeběchu.

Pola zestupnika z remisom dypk docpěli

štwórtk, 01. septembera 2016 spisane wot:

TSV Wachau – SJ Njebjelčicy 0:0

Zestawa hosći: Wićaz – Hrjehor, Hommel, Zeller, Haška, Hanuza, Cyž (75. Janca), Šołta, Korjeńk, Ričel, Čornak (70. Hoelzel)

Swoju druhu wonkownu hru přewjedźechu koparjo Njebjelčanskeje SJ při tropiskich temperaturach we Wachauwje. Tamniše mustwo bě z wokrjesneje wyšeje ligi zestupiło a je na kumštnym trawniku dosć derje zahrate. Njebjelčanam pobrachowaše tójšto stajnych hra­jerjow. Tak wupomha we wrotach Stefan Wićaz z druheho zastupnistwa. Tež Simon Zeller steješe wot spočatka na hrajnišću. Hosćo agěrowachu wot zakopa jako kruty cyłk, wojowachu a mějachu na kóncu­ samo hišće šansu na dobyće. Njerozsudne 0:0 swjećachu woni po 90 mjeńšinach kaž dobyće.

Wachaučenjo wšak přewzachu iniciatiwu a běchu wosebje přez křidła strašni. Wićaz pak je w 7. a 13. min. stoprocentnej móžnosći wotwobarał. Škit Njebjelčanow chwilku trjebaše, zo by so rjadował. Prěni rjany nadběh w 17. min. přez Hašku a Cyža wotzamkny Ričel z wótrej třělwu, ale přećiwniski wrotar wotwobara k róžkej. Tež pospyt Korjeńka w 32. min. wosta bjez wuspěcha.

Na Blackbird-run do Hózka

štwórtk, 01. septembera 2016 spisane wot:

W Hózku přewjedu njedźelu, 4. septembra, druhi přezpólny běh z mjenom Blackbird­. Na čarje dwanaće kilometrow natwarja tam pjatnaće wosebitych zadźěwkow. Na dnju wubědźowanja smědźa so běharki a běharjo wot 11 hodź. registrować. Blackbird-run započnje so w 14 hodź. Wječor do toho wotměja w Hózku swoju prerun-party.

Nadrobnišo wobhonić móžeće so pod www.facebook.com/blackbirdrunhoske abo http://hoske.net.

Hraja hižo pjatk

srjeda, 31. awgusta 2016 spisane wot:
Prěnje koparske mustwo Sokoła Ralbicy/Hórki změje swoju přichodnu domjacu dypkowu partiju hižo zajutřišim, 2. septembra. Wot 17.45 hodź. hraja Sokoljo přećiwo Zeleno-běłym Bukecy. Woni běchu wo přepołoženje hry wot njedźele na pjatk prosyli. SN

Zbožo pobrachowało

srjeda, 31. awgusta 2016 spisane wot:

HZ Łaz/Běły Chołmc – ST 1922 Radwor 2:1 (1:1)

Zestawa hosći: Ch. Šěrak – Mark, F. Šěrak, Henka (60. Nuk), Zähr, Omran, Šram, Karwin, Bejmak, Schulze, Buša (64. Wjeńka)

Hrajne zjednoćenstwo Łaz/Běły Chołmc je na druhim hrajnym dnju w stafli 2 wokrjesneje ligi koparjow z Ra­dworja wočakowało. W zańdźenej hrajnej dobje bě hosćićeljo na kóncu wurjadne třeće městno w stafli wobsadźił.

Hač na Wróbla a Hančika móžeše hóstny trenar Pětr Bejmak samsnych hrajerjow kaž hižo prěni hrajny dźeń na trawnik pósłać. Nowozawjedźeny hrajny system Radworskim koparjam dotal tyje. W ofensiwnje su sej woni dosć móžnosćow wuwojowali. Runje w prěnim połčasu dyrbjeli tuž hižo wjacore wrota docpěć. Omran a Schulze na přikład staj samaj před wrotarjom zwrěšćiłoj. W 29. min. pak zhłójčkowa Křesćan Bejmak po dołhej flance bul nad wrotarjom k 0:1 do klětki. W poslednjej akciji prěnjeho połčasa móžachu domjacy wurunać. Radworčenjo běchu bul w srjedźnym polu­ zhubili.

Na mišterstwach za VW zasadźeny

srjeda, 31. awgusta 2016 spisane wot:

Chrystof Macka, serbski motorsportowc z Wutołčic, je w běhu lěta wokoło cyłeje zemje na wjacorych wubědźowanjach we wobłuku swětowych rallyejowych mišterstwow (WRC) zasadźeny a stara so we wotrjedźe kolesa wo tři awta teama Volks­wagen Motorsport.­ Njedawno měješe wón domjacu lěpšinu, jako wubědźowachu so WRC-piloća w Trieru. Přichodne wubědźowanje budźe na kupje Korsika.

Foto: Ferdi Kräling, Motorsport-Bild GmbH

Wuslědki (31.08.16)

srjeda, 31. awgusta 2016 spisane wot:

Krajna koparska klasa

1. Horni kraj Sprjewja 2 6 : 2 6

2. Radebeul 2 4 : 1 6

3. Zschachwitz 2 6 : 4 6

4. Laubegast 2 5 : 3 3

5. Trjebin 1 3 : 1 3

6. Weixdorf 2 2 : 3 3

7. Nowosólc-Hródk 1 2 : 2 1

7. Mužakow 1 2 : 2 1

9. Biskopicy II 1 2 : 3 0

10. Neugersdorf II 1 1 : 2 0

11. Drježdźanski SC 1 1 : 3 0

12. Chrósćicy 2 2 : 6 0

13. Nowe Město 2 0 : 4 0

Wokrjesna wyša liga

1. Ćisk  3 14 : 0 9

2. Großröhrsdorf 3 3 : 1 7

3. Kinspork/Łužnica 3 6 : 2 6

4. Kumwałd 3 10 : 8 6

5. Ramnow 3 8 : 3 4

6. Rakecy 3 6 : 6 4

7. Ralbicy/Hórki 3 5 : 5 4

8. Wojerowski FC 3 3 : 3 4

9. Hnašecy-Dobruša 3 4 : 6 4

10. Módro-běli Kulow 3 3 : 3 3

11. Póst Germania Budyšin 2 1 : 2 3

12. Ottendorf-Okrilla  3 5 : 7 3

13. Hory  3 8 : 9 2

Startuje znowa na triatlonje na Hawaiiju

wutora, 30. awgusta 2016 spisane wot:

Jako prěnja Serbowka je triatletka Beata Čórlichec před lětomaj na swětowych mišterstwach triatlona na kupje Hawaii (USA) w Kona Ironman-distancu z brawuru zmištrowała. Za to bě so z Němcow pochadźaca a w Kölnje nad Rynom bydlaca tehdy njewočakowano kwalifikowała. Nětko hotuje so wona za wo­spjetny start na kupje. Jurij Nuk je so z triatletku Beatu Čórlichec rozmołwjał.

Wot lěta 2014 njejsmy wo Beaće Čórlichec na dalšich triatlonowych wubědźowanjach ničo słyšeli abo čitali.

B. Čórlichec: Dokelž so hakle něhdźe štyri lěta jako amaterka z triatlonom zaběram, sym sej po lěće 2014 najprjedy wěstu přestawku popřała. Nětko pak sym so tola rozsudźiła, hišće raz wšitko spytać a so za swětowe mišterstwa 2016 kwalifikować.

Čehodla nic hižo na lońše?

B. Čórlichec: Kónc meje 2015, jako přebywach někotre dny doma w Němcach, sym so na noze zraniła, tak zo njemóžach so dlěši čas na triatlon přihotować. Hakle loni w oktobru započach skónčnje zaso bjez zranjenja a schorjenja we wšěch třoch disciplinach triatlona trenować.

Kak a kak husto trenujeće?

Problem za Sokoł

wutora, 30. awgusta 2016 spisane wot:
Zamołwići Serbskeho Sokoła pytaja tuchwilu nowy termin za 35. sokołski volleyballowy turněr wo pokal Domowiny. Poprawom su so na 25. měrc 2017 dojednali, dokelž je sportownja na Budyskim Třělnišću na wšitkich dalšich terminach w měrcu wobsadźena. Runje poslednju sobotu měrca klětu pak wotměje so tež Hłowna zhromadźizna Domowiny. Sokoł dotal hišće žane rozrisanje za problem nima. Volleyballowy turněr wo pokal Domowiny­ je najwjetše a najwoblubo­waniše wubědźowanje w serbskim sportowym hibanju. SN

nawěšk

SERBSKE NOWINY podpěruja:

Novi Sad – kulturna stolica Europy

nowostki LND