Prěni test w přestawce přěhrali

štwórtk, 09. februara 2017 spisane wot:

ST Hnašecy/Dobruša

– SJ Njebjelčicy 3:1 (2:0)

Zestawa hosći: Ričel – Zeller (46. Lejnart), Kral, Hübental, Haška, Hanuza, Hrjehor, Šołta, Šram, Korjeńk, Janca

Při najlěpšim wjedrje a jara dobrych wuměnjenjach na Kamjenskim kumštnym trawniku wotměchu koparjo Njebjelčanskeje SJ swoju prěnju testowu hru w zymskej přestawce 2016/2017. Po treningowym lěhwje, kotrež běchu we Werdauwje přewjedli, pak měještaj trenarjej wulku nuzu, hrajerjow za partiju hromdu dóstać. Zasadźištaj tuž štyrjoch z druheho zastupnistwa.

Hižo po dwaceći mjeńšinach nawjedowachu Hnašečenjo/Dobrušenjo 2:0. Do přestawki wotzamkny jeničce Jurij Haška wjele lubjacy nadběh z niskej třělwu, njeměješe pak wuspěch.

Jednota derje přihotowana

štwórtk, 09. februara 2017 spisane wot:
Koparjo krajneho ligista Jednota Kamjenc su na druhu połseriju derje přihotowani. W rjedźe wjacorych testowych partijow su samo dwě klasy wyše hrajacy cyłk Budissy Budyšin z 3:2 přewinyli. Mustwo z Lessingoweho města słuša w krajnej lize k faworitam na staflowe dobyće. Foto: Sylvia Gerntke

Prěni raz koparski pokal sej wuwojowali

srjeda, 08. februara 2017 spisane wot:

K 22lětnemu wobstaću fanoweho kluba Biskopičanskeho koparskeho towarstwa 08 přeprosychu sej ,,Ći swěrni“ mjez druhim Worklečanskich koparskich přećelow na ha­lowy turněr. Worklečenjo nastupichu hnydom z dwěmaj teamomaj.

Prěnje Worklečanske zastupnistwo nastupi hnydom w prěnjej hrě dnja a přesadźi so ze 4:0 přećiwo teamej „Přeco lačni“. Damian Pěčka a Richard Kmjeć trjechištaj jónu, Tomaš Čornak dwójce. Bohužel pak zazběhowy wuspěch ze zranjenjemi Bosćija Lukaša a Roberta Wagnera droho zapłaćichu. Wobaj njemóžeštaj hižo sobu hrać. W druhim duelu podležachu ,,Drjewjanym noham“ 0:5 a w třećim 0:1 ,,Rynje­-juh“. Poslednju partiju předkoła přećiwo cyłkej „Ruß-Chantz-Blaublüter“ pak 5:2 dobychu. Pěčka třěli štwore wrota, Enrico Schulz jedne. W finalnych hrach kopaše Worklečanske prěnje zastupnistwo přećiwo „Cottauskim hólcam“ a jich po wrotach Pěčki a Schulza z 2:1 přewiny.

Kedźbyhódny remis docpěli

srjeda, 08. februara 2017 spisane wot:

FC Energija Choćebuz

– FC Hornja Łužica Neugersdorf 1:1 (1:1)

Na přeće FC Hornjeje Łužicy Neugersdorf je do druheje połserije k njewšě­dnej testowej partiji dóšło. Napřećo steještej sej cyłkaj, kotrejž hrajetej w samsnej ko­parskej klasy. Před měsacomaj bě so FC Energija Choćebuz na samsnym městnje hišće z 2:1 přesadźiła, při nowona­kładźe pak wuwojowa sej mustwo trenarja Vragela da Silvy wulce zasłuženy remis 1:1. Hižo w 4. min. bě so Oliver Merkel wo nawjedowanje hosći postarał. kotrež Tim Nattermann hišće do połčasa wuruna.

W cyłym hrajnym času pak hrajerjo FC Hornjeje Łužicy Neugersdorf bóle přeswědčichu hač faworit FC Energija Choćebuz­. Tež ličba šansow bě na stronje hóstnych koparjow wjele wjetša. Woni su nětko po wšěm zdaću derje na dal­šu połseriju přihotowani.

Georg Zielonkowski

Jónu přěhrali, jónu dobyli

wutora, 07. februara 2017 spisane wot:

Z probowym alarmom wohnjowych woborow zarjadniskeho zwjazka započa so zašły hrajny dźeń wobwodneje volleyballoweje ligi w Pančičanskej sportowni. Nimo toho dyrbjachu hišće něšto we wotběhu změnić, dokelž běchu Ochranowske volleyfantki hakle wutoru wo přepołoženje dypkoweju hrow prosyli. Na zbožo wšitke hrajerki ST Marijineje hwězdy kaž tež Zhorjelčanki tomu přihłosowachu, štož scyła tak samozrozumliwe njeje.

ST Marijina hwězda

– Ochranowske volleyfantki 0:3

(12:25, 15:25, 24:26)

Kotry cil běchu sej chowanče trenarja Ralfa Wachsmanna stajili? Znajmjeńša dypk chcychu sej wuwojować. K tomu pak njedóńdźe. Hakle w třećej sadźbje so Marijine hwězdźički do hry namakachu, přepozdźe. Hač bě zažny start připołdnju w dwanaćich špatna ideja była? Zmylki hwězdźičkow so wot sekundy k sekundźe kopjachu: Špatne přiwzaća bula a słaby blok běchu wosebje w prěnimaj sadźbomaj wulke manko.

Po hórkej poražce bě nětko wažne přećiwo žonam ze Zhorjelca dobyć, a to hladajo na zaměstnjenje w tabulce a zdruha za swójske sebjewědomje kaž tež za wjeselo nad sportom.

Podłu Jizerskeje magistrale trenowali

wutora, 07. februara 2017 spisane wot:

Minjeny kónc tydźenja bě sej kopar a trenar Chróšćanskeje SJ Pavel Runt, bydlacy w Liberecu, swojich chowancow do treningoweho lěhwa w Čěskej přeprosył. Wot štwórtka wječora hač do njedźele připołdnja přebywachu Chróšćanscy koparjo w Bedřichovje. Areal je wosebje mjez zymskimi sportowcami za přikładne loipy podłu Jizerskeje magistrale znaty. Tak běše koparjam hižo wot wšeho spočatka jasne, zo njebudu dny runjewon wočerstwjace.

Pjatk měješe čěska trójka Pavel Runt, Petr Šafář a Miroslav Sentivan něhdźe 30 km dołhu čaru na běžkach planowanu. Hač k wobjedu drje bě hišće motiwacija wulka. Po dobrej jědźi zdaše pak so druha połojca dale a dlěša być. Dołhe postupy njenamakachu žanoho kónca a cil njeběše wotwidźeć. Pomału tež nadkolena palachu a šćipachu a mocy popušćachu. Ćim wjetšej pak běštej posměwk a mjezsobna chwalba z wotplacnjenjom, jako so po někak šěsć hodźinach zaso do Bedřichova nawróćichu. Sawna a wochłódźenski pool běštej po strapacach witana wotměna.

Fabio Viteritti kopar lěta

wutora, 07. februara 2017 spisane wot:
Poł lěta pola regionalneho koparskeho ligista FC Energija Choćebuz a hižo „kopar lěta“ je Fabio Viteritti. Při 36. naprašowanju fanow wubědźi sej wón z 2340 hłosami prěnje městno. Na městnomaj dwaj a tři slědujetaj Benjamin Förster (973 hłosow) a dorostowy talent Avdo Spahić (708). Sobotu, 11. februara, budu wšitcy třo před swójskim publikumom wuznamjenjeni. Foto: Georg Zielonkowski

Štyrista kołow za sto kilometrow

póndźela, 06. februara 2017 spisane wot:

Wo wuhódnoćenju a mytowanju dobyćerjow minjeneho lěta eksistowacych rjadnych lisćinow běharjow – kaž su to Wopačanski cup běharjow, Drježdźanska wobwodna rjadna lisćina a Łužiska běhanska serija, kotrychž wurisanja so wšitke abo přewažnje w Hornjej Łužicy realizuja a na kotrychž so wězo naši serbscy lubowarjo běhanja prěnjorjadnje sobu wubědźuja – je naš wječornik wotpowědne rozprawy wozjewił.

Pawk zaso halowu kopańcu přewjedł

póndźela, 06. februara 2017 spisane wot:

Zymski počas je zdobom čas haloweje kopańcy. W decembrje, januarje a februarje trjebaja trawniki serbskich sportowych towarstwow zymski spar, a koparjo tuž rady w tepjenych halach za bulom honja.

Turněr Serbskeho młodźinskeho towarstwa Pawk přewjedźechu lětsa w Radworju. Dźewjeć mustwow bě sej sobotu do tamnišeje „Slavije“ dojěło mjez nimi tež měšane cyłki z wokoliny, kaž na přikład dobyćer turněra AS Tralkörper z Rakec. Młodźi hrajerjo pokazachu nimo wulkeho tempa tež efektiwne nadběhi. Z tymaj trumfomaj porazychu Namrěwcow z Chrósćic w finalu ze 4:1.

Najwustojniši třělc dnja bě Felix Dehn ze sydom­ wrotami. Najlěpši wrotar bě Oli­ver Schmidt, kotryž hraje hewak w prěnim mustwje ST Marijineje hwězdy.

Organizatoraj­ turněra Daniel Nuk a Marko Mět běštaj z wothłosom na turněr Pawka spokojom, wosebje tež z kwalitu hrow a z tym zo su mustwa fairnje wustupowali. Tež klětu chce serbske towarstwo zaso młodych koparjow w zymskim času do tepjeneje „Slavije“ na turněr přeprosyć.

kónčna tabulka:

1. AS Tralkörper z Rakec

2. Namrěwcy z Chrósćic

3. Bjez mjena

4. Wotrow

5. Dulli wysoko 5

Widźał,słyšał, napisał (06.02.17)

póndźela, 06. februara 2017 spisane wot:
Awtor dźensa Ludwig Zahrodnik

Chcu so w swojim komentarje wěnować sportowej družinje, wo kotrejž so tu hewak husto njepisa, mjenujcy lodohokejej. Nastork za to bě mi mjez druhim foto Feliksa Hazy srjedź januara w SN. Widźeć bě, kak młodostni na wjesnym haće w Jaseńcy za pukom honja­ a kajke wjeselo jim tónle zymski sport wobradźa.

Wěmy drje, zo němska lodohokejowa narodna wubranka w orchestrje najlěpšich swěta na prěnich huslach njehraje. Tež klubowym mustwam, kaž tym z Berlina, Mnichowa, Kölna abo Mannheima, je so na europskich wubědźowanjach přećiwo cyłkam z Čěskeje, Ruskeje, Šwedskeje abo Finskeje jeno zrědka wuspěch poradźił.

Jako młodostny sym so wosebje za dwuboje mjez wubrankomaj ČSSR a ZSSR horił. Njezapomnite wostachu mi někotre kónčne hry na olympiskich hrach a swětowych mišterstwach mjez wonymaj mustwomaj­. Wosobinsce wobžaruju, zo njewotměwaja so swětowe mišterstwa w lodohokeju wjace w zymje, ale nalěto. W meji njeje zajim za zymski sport hižo tajki kaž w februaru.

nawěšk

SERBSKE NOWINY podpěruja:

Novi Sad – kulturna stolica Europy

nowostki LND