Sport (04.08.17)

pjatk, 04. awgusta 2017 spisane wot:

Dypkowa kopańca

Regionalna koparska liga-sewjerowuchod ma kónc tydźenja hižo třeći hrajny dźeń. Na hrajnym planje steji tam mjez druhim koparski derby mjez mustwomaj z Delnjeje a Hornjeje Łužicy. Sobotu wot 13.30 hodź. wočakuje FC Energija Choćebuz Budissu Budyšin. We wyšej lize­-stafli juh maja prěni hrajny dźeń. W Kamjencu nastupi jutře, sobotu, wot 14 hodź. Jednota přećiwo FC Carl Zeiss Jenje II.

Poslednja stacija beachtury

Volleyballowe mustwo Škit Budyšin wuhotuje póndźelu, 7. awgusta, poslednju staciju 4. beachvolleyballoweje tury Radija Satkula. Hry přewjedu wot 18 hodź. w sportowym parku MSV Budyšin na Nowosólskej dróze 57. Wulke finale budźe 28. awgusta w Miłoćicach.

Za Powerserb so přizjewić

Lětuše sportowe wubědźowanje Powerserb budźe 9. septembra wot 13 hodź. w Kopšinje. Wšako jón tamniše mustwo Traktor Kopšin wuhotuje. Z młodźinskim towarstwom Pawk, kotrež je zarjadowar, su so traktorisća na wosom stacijow dojednali. Startowy pjenjez wučinja dźesać eurow a mustwo ma wobstać z pjeć hólcow a jedneje holcy. Přizjewjenja su móžne na Facebooku pod Flex Wokx.

Bilancablidotenistow z Konjec

štwórtk, 03. awgusta 2017 spisane wot:

Přewšo wuspěšni běchu blidotenisća Konječanskeho DJK w sezonje 2016/2017. W prěnjej wokrjesnej lize, stafli I je prěnje mustwo z 32:4 dypkami suwerenje dobyło. Konječanska lěpšina porno tamnym zastupnistwam bě, zo mějachu lědma wupady. Jeničce Pětr Bejma bě zranjenja dla dlěši čas wupadnył. W rjadnych lisćinach bu Maćij Kokla w hornim křižnym porje z 21:13 dypkami sedmy. Alojs Čóška, hewak najlěpši Konječan, njebě ze swojej bilancu 14:22 dypkow spokojom. W srjedźnym křižnym porje je Dierk Šewc 28:8 dypkow docpěł a prěnje městno wobsadźił. Třeći bu z 25:11 dypkami Andrej Čórlich. Prěni bu tež Michał Elstner – a to w delnim křižnym porje z 22:8 dypkami. Z 15:7 dypkami bě Pětr Bejma pjaty.

Druhe a třeće mustwo DJK Konjec hraještej wobě w prěnjej wokjesnej klasy. Z 19:17 dypkami bu druhe mustwo štwórte tabulki. Najsylniši Konječenjo běchu Jurij Brězan z 21:1, Dietmar Hrjehor z 21:13 a Stefen Woko ze 17:17 dypkami. Třeće mustwo bu z 11:25 ličakami w kónčnym hódnoćenju dźewjate. Norbert Gall wšak cyłu sezonu wupadny, hewak by lěpše zaměstnjenje móžne było. Najlěpšej běštaj Frank Šołta z 19:5 a Daniel Zukunft ze 16:14 dypkami.

Testowu hru w Pólskej dobyli

štwórtk, 03. awgusta 2017 spisane wot:

NKS Start Namysłów

– SJ Chrósćicy 2:3 (2:0)

Zestawa hosći: M. Cyž – Kunze, M. Zahrodnik, L. Zahrodnik, F. Cyž, D. Bogusz, Młynk, Věchet, Němec, J. Bogusz, Krá­líček

Wot minjeneho štwórtka hač do njedźele běchu koparjo 1. mustwa Chróšćanskeje SJ w treningowym lěhwje w Pólskej. A na kóncu přewjedźechu testowu hru přećiwo NKS Startej Namysłów. Dokelž knježachu tropiske temperatury, so mustwje dojednaštej jenož dwójce 35 minutow hrać. Chróšćanskaj trenar Pavel Runt a rutinjej Miroslav Sentivan chcyštaj so za pokalne a dypkowe hry w přichodnej sezonje šonować. Tak bě zestawa hosći poměrnje młoda a njena­zhonita. Najebać to pokazachu woni dobry wukon.

Přiwšěm Namysłów hru wot spočatka dominowaše. Wosebje jeho jara spěšni a technisce sylni nadběhowarjo přeswědčichu. Tak docpě hosćićel w 19. min. zasłužene 1:0. Najebać wulku prócu so Chróšćanam w ofensiwje do połčasa ničo tak prawje njeporadźi.

TSG Neustrelitz

– FC Energija Choćebuz 0:4 (0:1)

Zestawa hosći: Meyer-Schade – Starcew, Matuwila, Viteritti, Mamba, De Freitas Costa, Zimmer (78. Ziegenbein), Kruse (66. Geisler), Stein, Schlüter, Förster (66. Gehrmann)

Z wonkownym dobyćom 4:0 pola TSG Neustrelitza je Energija Choćebuz wuspěšnje do sezony 2017/2018 regionalneje koparskeje ligi-sewjerowuchod startowała a so najprjedy raz na prěnje městno tabulki sunyła. Hač do přestawki wšak rěkaše jenož 1:0, po tym zo bě Fabio Viteritti (26.) pokutny kop přetworił.

W druhim połčasu pak běchu koparjo z Delnjeje Łužicy hišće trójce wuspěšni. Z dwójnym dyrom přez Marcela de Freitasa Costu (53.) a Strelija Mambu (57.) běchu woni zazběhowemu dobyću sezony kročeli bliže. Mamba docpě pjeć mjeńšin do wothwizdanja hry swoje druhe wrota dnja, kotrež­ wjedźechu zdobom ke kónčnemu 4:0.

Zakitować chce FC Energija načolnu poziciju tež w domjacymaj hromaj. Najprjedy přijědźe k njej dźensa do Stadiona přećelstwa postupnik Chemija Lipsk, prjedy hač pohosći wona sobotu hornjołužiskich koparjow Budissy Budyšin. Georg Zielonkowski

Na nowu sezonu přihotowani

srjeda, 02. awgusta 2017 spisane wot:
Tole je zestawa koparskeho mustwa Módro-běli Kulow za hrajnu dobu 2017/2018: Zady wotlěwa su to Norbert Kubaink, Alexander Lohan, Tobias Pohl, Paul Graf, Marcus Thomas, Benjamin Pohl; srjedźa wotlěwa trenar Dirk Rettig, Felix Brückner, Jan Pfennig, Bjarnat Korch, Simon Kubaink, John-Pascal Streicher, Tino Schapals, mustwowy nawoda Vitus­ Rudolf; deleka wotlěwa Paul Kockert, Steve Bergmann, Paul Korch, Maik Nicolaides, Clemens Mattick. Na wobrazu pobrachuja: Martin Sauer, Christoph Rettig, Frank Popella, Mario Korch, Christian Adler, Marcus Thomas a Frank Wittek. Foto: Werner Müller

Wčera wubědźowachu so młodostni na 6. staciji bičwolejbuloweje tury Radija Satkula. Tónraz přeprosy Radworski młodźinski klub na wolejbulnišćo do Chelna. Znowa wobsadźi mustwo Dwójna nula 1. městno, přewinywši team Satkula, kotryž steješe prěni króć w finalu. Třeće bě mustwo Volker Racho. Prěni króć je bičtura tež w Chelnje pozastała. Přichodny tydźeń budźe w Budyšinje jeje poslednja stacija do wulkeho finala w Miłoćicach. Foto: Lea Šefrichec

Domjacy efektiwnišo hrali

wutora, 01. awgusta 2017 spisane wot:

FC Hornja Łužica Neugersdorf

– Budissa Budyšin 3:0 (2:0)

Zestawa hosći: Ebersbach – Kunze, Patka, Hoßmang, Heppner, Krawčik, Weiß (84. Hausdorf), Pfanne, Mack (59. Schmidt), Müller (59. Rosendo), Bönisch

Hrajna doba 2017/2018 regionalneje koparskeje ligi-sewjerowuchod je so za FC Hornju Łužicu Neugersdorf a Budissu Budyšin z derbyjom zahajiła.

W tesće šěsć wrotow padnyło

wutora, 01. awgusta 2017 spisane wot:

Módro-běli Njeswačidło

– ST Marijina hwězda 2:4 (1:2)

Zestawa hosći: Matik – Rab, Czapik, Škoda­, Hawš, Čornak, Kuring, Eldor, Schmidt, Šołta, Winkler, Hübner, Wróbl, Pakoßnick

Prěnje koparske mustwo Sportoweho towarstwa Marijina hwězda je njedźelu pola Módro-běłych Njeswačidło testowu hru přewjedło. Dokelž postajeny sudnik přijěł njebě, přewza Njeswačanski trenar zamołwitosć. A wón njeměješe z fairnej partiju žane problemy.

Na wólnočasnu kopańcu do Jaseńcy

wutora, 01. awgusta 2017 spisane wot:
Wólnočasni koparjo Viktorije Worklecy přeprošuje zajimowane wjesne mustwa a dalše wólnočasne zastupnistwa na mjeztym druhi­ turněr Worklečanskich koparskich přećelow. Tón wotměje so 12. awgusta w Jaseńcy. Cyłki zetkaja so w 10.30 hodź., turněr započnje so w 11 hodź. Hry wotměja so ze štyrjomi pólnymi koparjemi a jednym wrotarjom. Ličba dalšich hrajerjow za wuměnu je bjez wobmjezowanja. Najmłódši wobdźělnicy smědźa 14 lět być. Kóžde mustwo ma za turněr startowy pjenjez 20 eurow zapłaćić. Maksimalnje dwa­naće mustwow smě so přizjewić. Při­zjewjenja prošu Richardej Kmjećej z mejlku na SN

Wot noweje hrajneje doby ma prěnje koparske mustwo Sokoła Ralbicy/Hórki noweho trenarja, Jiříja Krohmera z Budyšina. 39lětny Čech je znaty we Łužicy, wšako hraješe mjez druhimwjele lět w nadběhu pola Budissy Budyšin­ a w Kamjencu pola Jednoty. Jako šnórowaše kopački hišće za Sigmu Olomouc abo za letiske zastupnistwo FK Ventspils, wobdźěli so dohromady šěsć razow na UEFA-cupje, dźensnišej UEFA euroleague. Na swo­ju aktiwnu karjeru jako hrajer Krohmer potajkim hordźe zhladuje, nětko pak koncentruje so połnje na swój nadawk jako nazwučowar. Kopar Sokoła Jurij Bjeńš je hižo raz składnosć wužił a so ze swojim nowym trenarjom rozmołwjał.

Knježe Krohmero, kak je kontakt do Ralbic nastał?

nawěšk

nowostki LND