Widźał, słyšał, napisał (04.01.16)

póndźela, 04. januara 2016 spisane wot:

Awtor dźensa

Jurij Bjeńš

Sport (30.12.15)

srjeda, 30. decembera 2015 spisane wot:

Jubilejny volleyballowy turněr

ST Marijina hwězda přeproša na ludosportowe zarjadowanje, a to na 30. ju­bilejny nowolětny volleyballowy turněr. Zajimcy zetkaja so sobotu, 2. januara, w 13 hodź. w Pančičansko-Kukowskej sportowej hali. Přizjewće so prošu pola Pětra Barta pod telefonowym čisłom 0173/373 64 79 abo z mejlku pod .

Jutře kónc přizjewjenja

Volleyballowe cyłki, kotrež chcedźa so klětu 12. měrca na 34. sokołskim volleyballowym turněrje wo pokal Domowiny wobdźělić, maja hišće hač do jutřišeho štwórtka w 24 hodź. chwile so za njón přizjewić. Wupisanje, wšitke informacije kaž tež kontowe čisło za přepokazanje startoweho pjenjeza namakaće pod www.sokol.sorben.com.

Halowa kopańca

30.12. turněr CDU we Worklecach

02.01. S mobil-cup w Kamjencu

08.01. Landskron-cup w Budyšinje

09.01. Kulow-cup w Kulowje

15.01. Zeleno-běli Hórki we Worklecach

16.01. TCM w Chrósćicach

16.01. RB-WFV-supercup w Kamjencu

Budissa hotuje so na 2. połseriju

09.01. 12:00 Budissa Budyšin – Zhorjelc

09.01. 16:00 Budissa U23 – Póst Budyšin

16.01. 13:30 Biskopicy – Budissa

16.01. 13:00 Mo. Kumwałd – Budissa U 23

23.01. 13:00 1. FC Lok Lipsk – Budissa

23.01. 14:00 Budissa U 23 – SJ Chrósćicy

30.01. 13:00 RB Lipsk II – Budissa

Koparske turněry w Delanach

wutora, 29. decembera 2015 spisane wot:
Sokoł Ralbicy/Hórki je wčera tři dorostowe koparske turněry za koparki a koparjow SJ Chrósćic, ST Marijineje hwězdy, ST 1922 Radworja, SJ Njebjelčic a Sokoła Ralbicy/Hórki wuhotował. Najwuspěšniše běchu Chróšćanske mustwa, kotrež su stajnje prěnje městno wobsadźili. Na wječornym internym turněrje Ralbičanskich muži přesadźi so druhe mustwo Sokoła. Foto: Jörg Stephan

„Wjac hač kilo wahi njepřibyć“

póndźela, 28. decembera 2015 spisane wot:

Po jědnaće hrach bjez poražki jako trenar FC Energije Choćebuz (FCE) je Vasile Miriuta swojich chowancow do krótkeho dowola pósłał. Při rozžohnowanju pak jich Miriuta hišće raz wuraznje napomni, w dwutydźenskej hodownej přestawce „wjac hač kilogram wahi njepřibyć. Sym trenar, směm tuž wjace přibyć. To pak njeje měritko za mojich koparjow.“ Takle rozjasni to trenar FCE, kotrehož zrěčenje bu po poslednjej partiji lěta wot prezidenta Wolfganga Neuberta přez stadionowy mikrofon wozjewjene: „Vasile je so z nami połnje identifikował a wukonja jara dobry job. Dotal je wón bjez poražki, a dźemy z nim tuž hač do lěta 2017 zhromadny puć!“ Wězo bě tu a tam wjace móžno hač jenož njerozsudny wuslědk, ale puć z direktneho zestupneho pasma, do kotrehož bě so Energija z dotalnym trenarjom Stefanom Krämerom sunyła, su w małych kročałkach šli. „Wosom remisow a tři dobyća njejsu žana špatna bilanca, smy pak dale w kritiskej conje. Budźemy so w přestawce wo to starać, zo mustwo punktuelnje zesylnimy: w ofensiwje na kóždy pad, ale tež w škiće“, měni fanatikar za disciplinu Vasile Miriuta.

Hač do nocy wojowali

póndźela, 28. decembera 2015 spisane wot:

Lětsa wotmě so nócny volleyballowy turněr­ Serbskeho młodźinskeho towarstwa Pawk w Pančicach-Kukowje. Tamniše sportowe towarstwo bě dwě hrajnišći spřihotowało, tak zo móžeše dohromady 16 cyłkow w štyrjoch staflach městna wo štwórćfinale wuhrać. Předkoło je pak po měnjenju mnohich jara dlijiło, wšako traješe jedna hra dwójce pjeć mjeńšin. Tež přestawki běchu njesměrnje dołhe, tak zo dyrbjachu mustwa dołho na přichodnu hru čakać.

Faworizowane cyłki kaž Bratrowstwo Róžant, Eskimowcy a Škit Budyšin z Ludwigom Eckertom a Markom Smołu so w předkole suwerenje přesadźichu. W štwórćfinalnych partijach běchu Škit Budyšin a Eskimowcy najsylnišej cyłkaj a poskićichu přihladowarjam w finalu prawy krimi. Zo hrajachu Budyšenjo jeno z pjećomi, wopokaza so na kóncu jako špak, wšako Eskimowcy wokoło kapitana Maćija Šěna swobodne rumy prawje wužiwachu­ a přez cyły čas tež lěpje blokowachu. Tak dobychu woni finale z jeničkim dypkom předskoka.

Hrajna doba 2015/16 je so za volleyballistow Viktorije Worklecy z wulkim wuspěchom započała. We Wojerecach dobychu wobwodny pokal, prěni raz w stawi­znach towarstwa. Tónle wuspěch je jich w prěnich hrach sezony pohonjał. W Cunnersdorfje su „młodźi dźiwi“ z 3:0 jasnje dobyli, tež prěnja domjaca partija přećiwo „starym znatym“ z Běłeje Wody skónči so ze samsnym rezultatom. Wulki bój widźachu fanojo samsny hrajny dźeń přećiwo zestupnikej ze sakskeje klasy Kupoj-Nowa Łuka. Zo su Worklečenjo 2:3 přěhrali, njebě žana katastrofa. Na hromaj w Lubiju a Mittelherwigsdorfje je stary kapitan Clemens Eckert mustwu wupomhał a k dobyćomaj přinošował. Druhi domjacy hrajny dźeń prěnjeje połserije běše tež zaso wuspěšny, wuslědkaj přećiwo Zhorjelcej a Niskej rěka­štej 3:1 a 3:0. Do poslednjeho hrajneho dnja prěnjeje połserije stejachu hólcy wokoło kapitana Ludwiga Eckerta na čole tabulki a mějachu šansu na nazymske mišterstwo. W rozsudnej hrě pola sylneho mustwa Módro-běłych we Wojerecach pak podležachu a přezymuja tak na druhim městnje.

Wo SZ-pokal hrali

póndźela, 28. decembera 2015 spisane wot:
Koparske mustwo Budestecy-Korzym je wčera w sportowni na Budyskim Třělnišću turněr wo pokal nowiny Sächsische Zeitung dobyło. Na dalšimaj městnomaj běštej ST Wjelećin a Motor Kumwałd.

Henčl by rady hišće 17 dalšich dypkow měł

póndźela, 28. decembera 2015 spisane wot:

Z 23 dypkami steji regionalny koparski ligist Budissa Budyšin na dobrym srjedźopólnym městnje tabulki. Hanspeter Benad je so nětko w zymskej přestawce za Serbske Nowiny z trenarjom Tomašom Henčlom rozmołwjał.

Knježe Henčlo, kak spokojom sće z dotalnym wotrěznjenjom?

T. Henčl: Ličba dypkow a tež to, kak smy hrali, mje zwjesela. Z tróšku wjace rutinu wšak móhli hišće wjace dypkow měć. Z wuslědkom 1:1 pola Berlinskeho AK běch jara spokojom.

Widźiće koparjow z dorosta abo U23 Budissy­ Budyšin, kotřiž móhli skok do kolektiwa­ regionalneje ligi docpěć?

T. Henčl: Spontanje bych jenož Tonija Barnickela mjenować móhł.

Změjeće při- abo wotchady?

T. Henčl: Ně, wuchadźam z toho, zo so na kadrje ničo njezměni a zo póńdźemy bjez změnow do druheje połserije.

W zašłych hrach sće wjacore dypki krótko do kónca partije přećiwnikej darili. Na čim je to zaležało?

T. Henčl: Zo smy wólne kopy, kotrež su skónčnje k wrotam wjedli, dowolili, bě zawěsće sćěh pobrachowaceje koncetracije. Dyrbju pak tež rjec, zo běchu wólne kopy druhdy tež z trochu zbožom přetworjene.

Dźěći w „Slaviji“ sportowali

póndźela, 28. decembera 2015 spisane wot:
Kóždu póndźelu zetkawaja so w Radworskej „Slaviji“ najmłódši sportowcy ST 1922 Radworja k ćěłozwučowanju. Nawodnica Claudia Winklerowa z dźěćimi na naj­wšelakorišich narjadach zwučuje. Na wobrazu widźimy wjace hač 50 dźěći z jich staršimi. Foto: Achim Buša

Prěni raz na kumštnym trawniku

póndźela, 28. decembera 2015 spisane wot:
24 koparjow a jedna koparka wobdźělichu so druhi dźeń hód, 26. decembra, na 57. hodownej kopańcy. Prěni raz su woni na kumštnym trawniku Budyskeho Humboldtoweho haja za bulom honili. Team Klawdije Hejdušcyneje (SJ Chrósćicy, na wobrazu nalěwo) doby po zastatku 1:3 hišće 6:5. Sobu hrali su tež Adrian Mička (ST Radwor, dwoje wrota), Fabian Hejduška (SJ Chrósćicy) a Jakub Čórlich z Němcow. Foto: Jörg Stephan

nawěšk

SERBSKE NOWINY podpěruja:

Novi Sad – kulturna stolica Europy

nowostki LND