Wosebje w duelu Portugalska – Iran, ale tež w hrě Španiska – Marokko njemějachu jeno sudnicy na kopa­nišću wjele dźěła, ale tež widejorefereeje při wobrazowkach. A přihladowarjo před ­telewizorom po milionach tak a tak jako „sudnicy“ swoje komentary wotedawaja. W partiji Portugalska přećiwo Iranej, kotraž skónči so 1:1, dyrbješe čorny muž dwójce foul w šěsnatce pruwować. We woběmaj padomaj rozsudźi wón na jědnatku. Do toho Portugalčenjo hižo nawjedowachu, a to přez wrota Ricarda Quaresmana (45.). Šansu na 2:0 da jim widejosudnik w 53. min. Muž z hwižkom na trawniku sej scenu hišće raz na wobrazowce wobhlada a rozsudźi na pokutny kop. Cristiano Ronaldo pak přećiwniskeho wrotarja njepřewiny. Dalšej widejodopokazaj slědowaštej po foulu Ronalda a po hraću z ruku w šěsnatce Irana. Ronaldo měješe ze žołtej kartu hišće zbožo. A jědnatku, kotruž móžeš a njetrjebaš tež dać, Karim Ansarifard k 1:1 (90.+3) za Iran přetwori.

ST Porchow

– ST Marijina hwězda 2:1 (0:1) 

Zestawa hosći: Schmidt – Wróbl (15. Rab), T. Škoda, Jurš, Lipič, Winkler (70. Pesch­mann), Kuring, O. Hawš, R. Hawš, Eldor, A. Škoda

Prěni raz w stawiznach Zapadołuži­­skeho koparskeho zwjazka stej dwaj wokrjes­­nej ligistaj relegacisku hru wo postup do wokrjesneje wyšeje ligi pře­wje­dłoj. Na neutralnym městnje w Němskich Pazlicach zetkaštej so cyłkaj Spor­toweju towarstwow Porchow a Marijina hwězda. Wobaj běštej w swojimaj staflomaj druhe městno wobsadźiłoj. W due­lu bě ST Porchow na kóncu zbožowniši dobyćer a postupi do wosmeje najwyšeje ligi Němskeje.

Zazběh bičwolejbula Satkule

wutora, 26. junija 2018 spisane wot:
Wčera zahaji młodźinski sćelak rozhłosa MDR Satkula lětušu bičwolejbulowu turu w Radworju. Tam wubědźo­waše so cyłkownje jědnaće mustwow. Cyłk „Mixery“ je do­było, mustwo „Bjarnat Krawc“ bu druhe. Přichodnu póndźelu pozastanje tura w Hórkach, potom slěduja stacije w Jaseńcy, Konjecach, Njebjelčicach, Pančicach­Kukowje, Nuknicy­ a Budyšinje. Zakónčacy turněr wo pokal Radija Satkula budźe tradicio­nalnje zaso w Miłoćicach. Foto: Darius Budar

Sokoł Ralbicy/Hórki

– Rakečanske ST 2:5 (0:2)

Zestawa domjacych: Gloxyn – Rawš, Zyn­da, Korjeńk, K. Matka, M. Matka, Młynk (80. Kobalc), Bjeńš, Janca, Domaška, Kurjat

Po wuspěšnym derbyjowym dobyću 5:2 dóstachu sej koparjo Sokoła Ralbicy/Hórki posledni hrajny dźeń ze samsnym wuslědkom doma na měcu. Rakečenjo, lětuši wicemišter, běchu prosće kreatiwniši a nadźěłachu sej z rjanymi kombinacijemi wjac móžnosćow.

Prěnju wulku składnosć měješe Gabriel Kurjat za domjacych. Sernjančan pak třěli kulowatu kožu ze 14 metrow wyše wrotow (10.). Po tym zo tež hosćo dwójce na derje reagowacym wrotarju Chrystofje Gloxynu zwrěšćichu, docpě Roman Brückner zasłužene nawjedowanje za Rakečanske ST z mjerwjeńcy (32.). Nětko Sokoljo tłóčachu a tež derje kombinowachu. Při jednej tajkej kombinaciji dźěše nutřkowny škitar Fabian Korjeńk sobu doprědka. W šěsnatce pak Ralbičenjo bul zhubichu a hižo běžeše strašny konter hosći, kotryž zymnokrejnje k 2:0 wužichu.

Wulke wjeselo knježeše mjez koparkami Serbskeho gymnazija Budyšin (SGB) starobneje klasy IV (5.-6. lětnik), jako zhonichu zo su kwalifikowane za sakske finale, kotrež wotmě so w Lipsku. W předkole běchu přizjewjene šule wotprajili, a tak su holcy SGB direktnje koło dale přišli.

Za Lipsk běchu so dohromady štyri holče mustwa z cyłeje Sakskeje kwalifikowali. Nastupili pak su jenož tři: Gymnazij „Am Breiten Teich“ Borna, Serbski gymnazij Budyšin a Gymnazij Bürgerwiese Drježdźany. Modus turněra bě 2 × 15 mjeńšin. Přidatnje mějachu koparki do hrow techniski test absolwować. A tón wopřiješe tři discipliny: třělenje wrotow, dribbling wokoło kehelow a pasowanje w hasy. Štóž test doby, dźěše z předskokom 1:0 do partije.

Budyske mustwo je scyła prěni raz hromadźe hrało. Potajkim bě za wšitke serbske holcy premjera, so zhromadnje na wubědźowanju wobdźělić.

Gymnazij Borna

– Serbski gymnazij Budyšin (1:0, 1:1)

Němska wubranka před hłubinu so zawróćiła

póndźela, 25. junija 2018 spisane wot:

Hłowne hesła za rozprawnistwo w printmedijach a interneće stejachu hižo na wobrazowkach žurnalistow. Krótko do kónca skupinskeje hry Němska – Šwedska pak dyrbjachu je zaso přepisać. Němska narodna koparska wubranka je mjenujcy sobotu swój druhi skupinski duel přećiwo Šwedskej po dramatiskich 96 mjeńšinach 2:1 dobyła.

Započało a skónčiło bě so wšo ze štworym dobyćerjom champions league Tonijom Kroosom, kiž zahaji dramu w 32. min. z přihrawku k přećiwnikej. Ta wjedźeše ke konterej, kotruž Šwedojo wuspěšnje zakónčichu. Ola Toivonen trjechi 1:0. Do toho mějachu Němcy zbožo, jako zapowědźi sudnik Šwedam jasnu jědnatku. Nětko trjebaše němska wubranka dalšej dźećelowej stwjelcy ze štyrjomi ­łopješkami, zo by so před hłubinu za­wróćiła. Prěnje tajke wuži w 48. min. Marco Reus, jako z kolenom na 1:1 wuruna, a druhe Toni Kroos w 95. min., smoknywši wólny kop krasnje do hornjeho třiróžka přećiwniskich wrotow. Hižo w 82. min. pak dósta Jérôme Boateng woprawnjenu žołto-čerwjenu kartu. Němcy hrajachu tuž hač do kónca z dźesaćomi. Nowinarske hesła přepisać po zdaću wulki problem njebě.

Prěni raz w Budyšinje hrali

póndźela, 25. junija 2018 spisane wot:

Aktualna tabulka serbskeje bičwolejbuloweje ligi

hry/sadźby/dypki

1. Spiesec/Mieth  6 10 :4  10

2. Bětnar/Wahlicht/Smoła 4 7 :2  6

3. Smoła/Šołta  5 7 :5  6

4. Rjelka/Wjeńka/Gall  2 4 :0  4

5. Šewc/Bjeńš 2 4 :0  4

6. Cyž/Krawc 2 3 :2  2

7. Škit Budyšin  4 4 :6  2

8. Langa/Heeleman/Hanuza 

 5 2 :8  2

9. Ješka/Šmit 0 0 :0  0

10. Gedik/Šołta  2 0 :4  0

11. Cyž/Zelnak/Cyž 3 0 :6  0

Awtor dźensa

Jan Hrjehor

Chorwatska přikład

pjatk, 22. junija 2018 spisane wot:
Wobhladawši sej wčerawšu hru chorwatskich koparjow přećiwo Argentinskej na swětowych mišterstwach sej prajach: Budu-li Němcy jutře přećiwo Šwedskej kaž Chorwaća wustupować, mamy snano hišće šansu w turněrje wostać. Spěšni, wobrotni, chrobli a robustni w dwubojach běchu so woni přećiwo bywšemu swětowemu mištrej přesadźili a su sej tři dypki woprawdźe zasłužili. Jutře wječor so tež pokaza, hač je němski trenar Joachim Löw strategisce mudrje jednał, rozsudźejo so při zestajenju mustwa za nazhonitych „starych zajacow“ kaž Müllera, Khediru abo Hummelsa, město toho zo by młodym hrajerjam składnosć dał. Powěsćernje znajmjeńša rozprawjeja, zo su wšitke orakle na dobro Němskeje wušli. Zwostanje tuž škrička nadźije, zo njetrjebaja naši koparjo lisćiki za lětadło, kotrež su jim šwedscy žurnalisća hižo žortnje poskićili. Snano bjeru sej tež Chorwatsku za přikład. Škodźało njeby. Marko Wjeńka

Argentinskej, wiceswětowemu mištrej lěta 2014, hrozy na lětušich koparskich mišterstwach w Ruskej kónc hižo w skupinskej fazy. Wčera wječor přěhra cyłk wokoło superstara Lionela Messija druhu hru předkoła přećiwo Chorwatskej 0:3. Argentinjenjo docpěće wosmifinala hižo sami w rukomaj ni­maja. Z jeničkim dypkom w tabulce skupiny D dyrbja woni w poslednjej skupinskej partiji Nigerisku přewinyć a so poražki Islandskeje přećiwo Chorwatskej nadźijeć, zo bychu so hišće za wosmifinale kwalifikowali. Chorwatska je z njewočakowano wysokim triumfom hižo w kole najlěpšich 16 mustwow. Běše to napjaty duel, ze spektakularnymi prěnimi wrotami za Chorwatsku. Argentinski wrotar bě bul w šěsnatce překrótko wotkopnył, Ante Rebić spěšnje reagowaše ­a trjechi z krasnej třělwu 1:0 (53.). Wo předrozsud postara so Luka Modrić, jako ze zdalenosće k 2:0 wotzamkny (80.). Zo móhł wrotowy poměr hišće rozsudny faktor za zaćah do wosmifinala być, ­Argentinjanow po wšěm zdaću njeza­jimowaše. Po dohromady jědnaće žołtych kartach za wobě mustwje zwyši Ivan Rakitić krótko do wothwizdanja na 3:0 (91.).

nawěšk

nowostki LND