Njebjelčenjo posledni test dobyli

štwórtk, 17. awgusta 2023 spisane wot:
Doma w Njebjelčicach su koparjo tamnišeje SJ zašłu njedźelu swój posledni test před startom do noweje hrajneje doby dobyli. Mustwo noweho trenarja Daniela ­Pohlinga přesadźi so 4:3 (2:2) přećiwo rezerwje Natwara Němske Pazlicy. Za domjacy cyłk trjechichu Handrij Korjeńk (34., 59.), Dennis Wagner (39.) a Paul Hrjehor (70.). Swoju zazběhowu dypkowu hru změje mustwo SJN njedźelu doma přećiwo mustwu hrajneho zjednoćenstwa Běła/Cunnersdorf/Němske Pazlicy. Sudnik Domenic Scholz chce duel popołdnju w třoch zahwizdać. Foto: Mia-Katarina Hrjehorjec

Španiska koparska wubranka je wčera w Aucklandźe prěni króć finale swětoweho mišterstwa žonow docpěła. W połfinalu poradźi so po turbulentnej kónčnej fazy snadny 2:1 wuspěch přećiwo Šwedskej, tež dźakowano zbožownej ručce ­trenarja Jorge Vildy. Pola Skandinawičankow je so porno tomu połfinalny trawma wospjetował.

Jako wothwizda brazilska sudnica Edina Alves partiju krótko do dźesaćich po třoch pózdnich wrotach, wyskachu Juhoeuropjanki bjez přestaća. Dotal najwjetši wuspěch španiskeje „Selección“ měješe so před 43 217 přihladowarjemi we wupředatym Eden Parku porjadnje woswjećić. Jenož jědnaće měsacow po tym, zo wotwobara španiski koparski zwjazk zběžk 15 narodnych hrajerkow přećiwo trenarjej, steji mustwo krótko před dobyćom titula. Koparski trón je jenož hišće jedne dobyće zdaleny. Njedźelu w dwanaćich měri so Španiska w Sydneyju pak z ko-hosćićelkami z Awstralskeje abo z europskimi mišterkami z Jendźelskeje.

Radworčenjo znowa wuspěšni

srjeda, 16. awgusta 2023 spisane wot:

Po dobyću wolejbuloweho turněra serbskich wólnočasnych mustwow w Budyšinje spočatk junija dominowachu sportowcy cyłka ST Radwor 1922 tež we Worklecach.

Hosćo z krajneje stolicy jasnje dobyli

srjeda, 16. awgusta 2023 spisane wot:
Hrajerjej Serbskeho mustwa Patrick Woko (klečo, Rakecy) a Emanuel Brühl (druhi wotprawa, Laubegast) měještaj wosebite ­zetkanje w krajnym pokalnym kole minjenu sobotu w Rakecach. Rodźeny Nowowješćan Brühl bě kónc zašłeje hrajneje doby wot SC Freital k FV Drježdźany Laubegast změnił. ­Hosćo su pokalny duel jasnje 6:0 (1:0) dobyli. Foto: Mia-Katarina Hrjehorjec

Giro d’Italia, Vuelta Espana abo njedawno zakónčena Tour de France – Europa ma tójšto wulkich kolesowarskich kołojězbow. Něhdy rěkaštej kolesowarskej hwězdźe Jan Ullrich a Lance Armstrong, dźensa Jonas Vingegaard a Tadej Pogačar. Fascinacija kolesowarskeho sporta na wubědźowanskich kolesach žana nowostka njeje. Tola w zašłych lětach nasta njejapcy tójšto wólnočasnych kolesowarskich skupin. Tak tež we łužiskich wsach.

Jan Rjeda je čłon tajkeje skupiny. Wón měni: „Naša kolesowarska skupina w Kukowje je w nalěću 2021 nastała, to smy byli štyrjo abo pjećo, kiž su so w koronačasu prawidłownje po njedźelach zetkawali. Nichtó njeměješe wulce ničo druhe planowane. Tak smy nimale tydźensce w krutej wobsadce jězdźili. Mjeztym je skupina na 27 čłonow rozrostła. Zwisuje to hłownje z tym, zo su so Worklečenjo z nami zjednoćili. Druhdy smy po puću jako dwójka, druhdy tež dźesaćo.“

Dwójce telko za deskami hrało

wutora, 15. awgusta 2023 spisane wot:

Budyšin (SN/HaJ). Ukrainski wulkomišter Sergij Owsejewič je 2. mjezynarodny šachowy turněr „Bautzene Türme open“ dobył. Wurisanje skónči so z mytowanjom najlěpšich hrajerjow předwčera­wšim w Budyskej „Krónje“. Ličba wobdźělnikow na turněrje je so porno lońšemu podwojiła.

Sergij Owsejewič je kóždy čas swojej róli faworita jako jenički wulkomišter wotpowědował. Sydom partijow je dobył, dwójce hraješe remis w cyłkownje dźewjeć duelach. Wuspěšnaj běštaj tež Budyšanaj Alexander Herbrig z ratingowym mytom a Florentin Lübke jako najlěpši młodźinski hrajer. W B-turněru doby Drježdźanski młodźinski hrajer Gustav Rauschhardt. Wjace hač 150 zahorjenych šachownikow z jědnaće narodow, mjez nimi třinaće nošerjow šachowych titlow, běše sej na měrjenje mocow do Budyšina dojěło. W A-turněrje, wobsadźenym z dobrymi sportowcami, móžachu so sylni hobbyjowi hrajerjo z profijemi měrić. Najdlěši puć do sprjewineho města měještaj młodźinskaj šachownikaj z Južneje Afriki kaž tež z Islandskeje.

Prjed hač połfinalnej partiji swětoweho mišterstwa žonow w Awstralskej a Nowoseelandskej startujetej, pohladajmy raz na sudnicy turněra. Cyłkownje je jich 33. Přidatnje zasadźuja so 55 asistentkow a 19 widejowych sudnikow. Z tym je FIFA ličbu porno žónskej WM w lěće 2019 dale zwyšiła. Mjez 33 hłownymi sudnicami pochadźa jědnaće z Europy, šěsć ze Sewjerneje a Srjedźneje Ameriki a štyri ­z Afriki. Južnoameriski kontinent je šěsć oficialnych pósłał a Azija je z třomi zastupjena. Hosćićelskej narodaj Awstralska a Nowoseelandska stajitej cyłkownje tři sudnicy. Mjez 33 wjednicami hrow žónskeje WM 2023 pak njeje ­žana Němka. Jeničce Katrin Rafalski podpěruje jako sudnica při pobóčnej ­liniji. Tak njeje prěni raz po turněrje 2007 žana němska hłowna sudnica na žónskej koparskej WM zastupjena. K tomu zasadźuja 19 ­widejowych kontrolerkow (VAR). Widejowy dopokaz zawjedźechu při žónskej WM w lěće 2019. W kruhu widejowych asistentow njejsu bjezwuwzaćnje žony zasadźeni, ale tež mužojo. Mjez nimi je Marco Fritz z Němskeje.

Dobyćew poslednim tesće

wutora, 15. awgusta 2023 spisane wot:

TSV Połčnica – SJ Chrósćicy 1:3 (0:2)

Zestawa hosći: Petr Králíček – Lucian Zahrodnik, Miroslav Sentivan, Vlastimil Šmalcl, Pavel Runt, Benno Rätze (45. Clemens Handrik), Marlon Wencel, Gabriel Zahrodnik, Oskar Hawš, Michał Młynk, Jan Bogusz

Zelena garda skónčnje triumfowała

wutora, 15. awgusta 2023 spisane wot:

Wjelelětny wobdźělnik Zelena garda po 20 lětach prěni raz dobyćer

33. Kulow-cup zahajichu prěni pjatk w awgusće z wulkej wječornej party při měšćanskim haće. Tam postara so DJ ­Erixo wo dobru naladu. Sobotu wubědźowaše so potom dźesać mustwow z Kulowa a wokolnych wsow w kopańcy. Přewjedźechu předkoło w dwěmaj sku­pinomaj, połfinalnej hrě, mały a wulki ­finale. Něhdźe 150 přihladowarjow partijam na městnje sćěhowaše. Na kóncu přesadźi so po 20 lětach prěni raz Zelena garda a turněr doby. Z tym smědźa a dyrbja wubědźowanje klětu wuhotować a organizować. Lětsa běštej teamaj Koćina-Kulow a Flames of piwo wšitko organizowałoj. Moderatoraj na wěži rěčnika běštaj Nils Blonchefzka (Flames of piwo) a Marius Šefer (Koćina-Kulow).

Kónčna tabulka 33. Kulow-cupa:

1. Zelena garda

2. Kulowminatije

3. Koćina-Kulow

4. Młodźina Łaz

5. Kulow section

6. Němcy

7. Bróžeń

8. Bojaznički

9. Dołha garda

10. Flames of piwo Werner Müller

Wulke wjeselo na Młynkec łuce

wutora, 15. awgusta 2023 spisane wot:

Dźesaty raz wotmě so w Budyšinje sportowy swjedźeń zakładnych šulow w lochkoatletice. Tež serbskej zakładnej šuli Budyšin a „Michał Hórnik“ Worklecy so na nim wobdźělištej.

Nimo stafloweho běha so šulerki a šulerjo starobneje klasy 2015 do 2012 (1. do 4. lětnik) w běhanju na distancomaj 250 m a 800 m, w dalokoskoku a w mjetanju bulikow wubědźowachu. Wuměnjenja, wosebje pak organizacija přez Wuchodosakske lochkoatletiske towarstwo, běchu jara dobre.

Sportowe zarjadowanje do prózdnin so ze staflowym běhom zahaji. Po 8 x 50 m přeběža kónčny běhar Worklečanskeho mustwa Stanisław Günther jako druhi cilowu liniju. Wjeselo nad slěbornej medalju bě mjez dźěćimi wulke.

Wosebje wuspěšni běchu serbscy atleća w sprinće na distancu 50 m. Tu so wšitcy za finalny běh kwalifikowachu. Złoto wudobyštaj sej w kónčnym kole Ben Šmit (hólcy, lětnik 2013) ze 7,75 sek. a Helena ­Brězanec (holcy, lětnik 2013) z 8,00 sek. Tež Luisa Zarjeńkec (holcy, lětnik 2014) a Julius Čornak (hólcy, lětnik 2015) wjeseleštaj so nad medalju. Wobaj ­zaměstništaj so na 3. městnje. Dalšu slěbornu medalju wuwojowa sebi Stanisław Günther.

Serbska debata

nowostki LND