Awtor dźensa

Michał Nuk

Zašłe kóncy tydźenja stejachu zaso w znamjenju wutrajnostneho třiboja we Łužicy. Knappenman we Łazu je tež lětsa znowa syłu sportowcow přiwabił. Triatlon při Třižonjanskim jězoru je tak woblubowany, dokelž namaka kóždy zajimc, wšojedne hač dołholětny rutinjej abo započatkar, kmany poskitk. Přede­wšěm kolesowanska čara po dobrym asfalće je płona a spěšna, nichtó so dołhich horow bojeć njetrjeba. Kontrast k tomu mamy 80 km južnišo. Krótko do Knappenmana wotměwa so wokoło Olbersdorfa O-See-Challenge, kotraž słuša do swětoweje wubědźowanskeje serije XTERRA. Tu je hinaši material trěbny – po płuwanju dźe na mountainbiku přez kamjenje a korjenje Žitawskich horin, prjedy hač so naročny crossowy běh přizamknje. To wo­sebje na kolesu woznamjenja, zo trjebaš nimo wutrajnosće tež dobre techniske a koordinaciske zamóžnosće, njechaš-li přewjele mocow a časa zhubić.

Awtor dźensa

André Strelow

Na sportnišćach mustwa zaso za bulom honja, a kaž kóžde lěto je so zaso­ raz něšto na koparskich prawidłach změ­ni­ło. To wězo tež za nas sudnikow płaći. Wšako dyrbimy nowosće konsekwentnje nałožować a je trenarjam, hrajerjam a zamołwitym rozjasnić. Ně­ko­tre nowe prawidła su za mnje zmy­sła­połne. Dalše zdźěla z prašakom zwjazuju. Chcu tu někotre tróšku bliže předstajić.

1. Na spočatku hry je při wólbje stronow a zakopa nětko móžno sebi wuzwolić, hač chce mustwo zakop abo wotlěwa doprawa abo wotprawa dolěwa hrać.

2. Při wuměnje ma wotchadźacy hrajer nětko najkrótši puć z kopanišća wužiwać. Z tutej kročelu ma so zdobom brojenju časa­ zadźěwać. Dobry to rozsud, hladajo na kónčnu fazu hry.

3. Dalše nowe prawidło je, zo njesmědźa so přećiwniscy koparjo do škitneje murje stupić, jeli tajka z wjac hač třoch hrajerjow wobsteji. Tołkanja a storkanja su tak jenož hišće sportowe stawizny.

Awtor dźensa

Tadej Cyž

Bul so zaso kula, a to we wšěch hrajnych klasach. Wosebje w prěnjej zwjazkowej lize wuhladamy wjele nowych trenarjow. Tak chce najmłódši nazwučowar Julian Nagelsmann w Lipsku pozitiwne wuwiće zašłych lět dale­ wjesć. Budźe zajimawe, hač móže ze swojim nowym cyłkom wulkich faworitow hnydom mjerzać. Lipšćenjo dźě chcedźa přiwisnikam tež raz jedyn titul prezentować móc. Toho abo tamneho doro­stoweho hrajerja chce Nagelsmann tohorunja integrować, štož je so jemu hižo w Hoffenheimje přeco zaso radźiło.

Awtor dźensa

Beno Šołta

To čitach před někotrymi dnjemi w nowinach: „Christina Obergföll dóstanje nětko, jědnaće lět po olympiskich hrach w Pekingu, slěbornu medalju za mjetanje hlebije. Tehdy bě wona bronzu dobyła. Tola nětko je doskónčnje jasne, zo bě Rusowka, dotal druha, doping wužiwała. Tak tehdyšu medalju zhubi. Zasad­nje je to w mojimaj wočomaj prawy krok, ale přepozdźe. Dopingowe testy ho­dźa­ so w běhu dnjow wuhódnoćić. Jenož běrokratije dla je so wšitko tak dlijiło. Němska mjetarka hlebije Obergföll hižo někotre lěta wjace aktiwnje njesportuje. Slěbro tuž za nju dźensa přewulki wo­znam nima, kaž praji.

Jako zastupich do němskeje triatlonoweje unije, dyrbjach podpisać, zo njewužiwam doping a zo smědźa mje stajnje po wubědźowanjach kontrolować. To drje hišće njejsu, ale móžu sej derje předstajić, kak móže to sportowca boleć, je-li něchtó druhi pod wliwom dopinga lěpši był. Sy wšitke mocy mobilizował, lěta dołho trenował, zo by spěšny był, ale něchtó je někotre sekundy abo metry lěpši – tola z pomocu chemije a nic pilnosće a česćelakomnosće.