Widźał, słyšał, napisał (26.09.16)

póndźela, 26. septembera 2016 spisane wot:

Awtor dźensa

Jan Macka

Lubi sportowcy, je zaso čas domchowanki a kermušow. Rjane słónčne wjedro je nam hišće tu abo tamnu překwapjenku kónc tydźenja w kopańcy wobradźiło. Kaž w medijach čitamy, wjetše a mjeńše mustwa nětko hižo bilancuja, što su prawje abo wopak činili. Mnozy pak so prosće takle zwuraznjeja: „Pola nas lětsa wulkotnje běži.“ abo „To sy hižo po prěnjej hrě spóznał, zo so ćežko změja.“ abo „Pola nas zaso njedosaha.“

Moje postupne mustwa, kotrež sym minjene hrajne lěto na lisćinje měł, chcu skrótka wobswěćić, a to z optimizmom na hišće dołhu hrajnu dobu. Pola RB Lipska njewidźu stracha, zo do krizy padnje. Start bě za nowačka w 1. zwjazkowej lize optimalny. Wosebje dobyće přećiwo Dortmundej je jemu dalšich fanow wobradźiło a z 1:1 nětko pola 1. FC Köln je w načolnej skupinje zaměstnjeny. To same zdaše tež za Dynamo Drježdźany móžno być, tola přěhraty derby doma přećiwo Aue a poražka w Kaiserslauternje woznamjenja jenož srjedźne městno, štož nikoho z nas tak prawje njezwjesela. Tež wčerawše 2:2 přećiwo Würzburgej nic.

Widźał, słyšał, napisał (19.09.16)

póndźela, 19. septembera 2016 spisane wot:
Awtor dźensa Jurij Nuk

Jako aktiwneho běharja přez wjac hač šěsć lětdźesatkow zajimuje mje wosebje lochkoatletika. A tak sym sej tež we wusyłanjach telewizije wo njedawnych 28. olympiskich lětnich hrach w Rio de Janeiru předewšěm wurisanja w tejle sportowej družinje wobhladał. A tam mje najbóle mjetanje hlebije jima. Hdyž widźu wysoko na njebju lětadło lećeć, kotrež ćehnje za sobu kondensacisku smuhu, da mam stajnje gracilnosć lěta tajkeje hlebije před wočomaj. A z tajkej gracilnosću a jara daloko lećeše na olympiadźe tež hlebija olympiskeho dobyćerja Thomasa Röhlera z Jeny. Po wurjadnych 90,30 metrach zaštapi wona do trawnika. Přewšo sympatiski 24lětny lochkoatlet bě před štwórć lětom tónle nastroj w finskim měsće Turku samo hižo 91,28 metrow daloko ćisnył, štož je rekord lěta.

Widźał, słyšał, napisał (12.09.16)

póndźela, 12. septembera 2016 spisane wot:

Awtor dźensa

Stefan Šmit

Dwě dobyći a dwaj remisaj. W sumje wučinja to wosom dypkow. K tomu maja koparjo Dynama Drježdźany nětko wrotowy poměr 6:3. Za tónle dotal wuběrny wukony steja woni po wčerawšim štwórtym hrajnym dnju na 2. městnje druheje zwjazkoweje koparskeje ligi. Štó z nas bě sej tole na spočatku sezony myslił, wšako njebě zazběhowy program za Dynamo docyła tak lochki. Jako prěni přijědźechu koparjo z Nürnberga. Tydźeń na to wobstachu Dynamowcy suwerenje před wulkotnej kulisu pola Union Berlina. W prěnim kole DFB-pokala porazychu samo­ prěnjeho ligista RB Lipsk. Nimale samsna bě atmosfera před tydźenjomaj, jako bě kultowe mustwo St. Pauli w Drježdźanach. Runja RB Lipskej dyrbješe so mustwo z Hamburga bjez dypka na domojjězbu nastajić. A nětko 2:0 za Dynamo w Hannoveru!

Widźał, słyšał, napisał (05.09.16)

póndźela, 05. septembera 2016 spisane wot:

Awtor dźensa

Toni Ryćer

Nimale w kóždej domjacnosći składuja so lěki­, zo bychu při mjeńšich schorjenjach spěšnje k ruce byli. Sy-li nazymnjeny abo maš-li bolosće w stawach po ćělnym napinanju, njetrjebaš tuž hnydom k lěkarjej. Tu pomhaja krjepki, žałby a sprayje z apoteki. Štož je za wjetšinu ludźi bjez problema, pak móže za profijowych sportowcow fatalne sćěhi měć. Cyły rjad tajkich po zdaću bjezrizikowych lěkow wobsahuje srědki, kotrež sportowc brać njesmě, kaž na přikład kodein w krjepkach přećiwo kašelej. Jednu tak mjenowanu čerwjenu lisćinu wudawa Narodna antidopingowa agentura a ju prawidłownje aktualizuje.

Awtor dźensa Tomaš Faska

Statistiski su druhdy komplikowane. A kak smy w NDRskim času z posměwkom rjekli: Njewěr žanej statistice, kotruž njejsy sam sfalšował. Ale chutnje, woprawdźe komplikowane su prawidła za wuhódnoćenje wuslědkow, kotrež europski koparski zwjazk UEFA prawidłownje přewjeduje. Měnju tabulku,­ hódnoćacu wukony koparskich mustwow europskich krajow a stajacu je do wěsteho slěda. Tele dny bu statistika zašłych pjeć lět wozjewjena. Po njej – a to njezadźiwa – steji Španiska ze swojimi klubami přeco hišće na čole. Ale wotstawk k Němskej je mjeńši, dokelž bě hrajna doba 2011/2012 z hódnoćenja wupadnyła. Tehdy běchu španiske kluby statistisce wuspěšniše hač w sezonje 2015/2016 – njehladajo na to, zo rěkaše finale mišterskeje ligi we wonym lěće FC Chelsea – Bayern Mnichow, dokelž běštej so wobaj španiskej połfinalistaj w tymle kole z wubědźowanja rozžohnowałoj.

Pod smužku maja Španičenjo nětko 20 hódnoćenskich dypkow mjenje hač při lońšim ličenju. Němska, druha tabulki, ma 15 dypkow a runje telko tež Jendźelska, kotraž steji dale na třećim městnje.

Awtor dźensa Michał Nuk

Zaso su olympiske hry nimo. Wězo sym kaž kóždy raz hodźiny před telewizorom abo live-streamom sydał a so nad medaljemi a wurjadnymi wukonami sportowcow wjeselił – mjez druhim nad złotej medalju rodźeneho Lubijčana Christiana Reitza w třělenju z pistolu. Přiwšěm su hry w Rio de Janeiru we mni kopicu prašenjow zawostajili. Ženje do toho njejsym fairnosć a olympiske moto „Pódla być je wšitko“ bóle parował, ženje njejsym nad zmysłom wuhotowanja olympiady a z tym zwisowacymi wopo­rami za ludnosć, přirodu a infrastrukturu bóle dwělował hač lětsa. Štóž je rozprawnistwo w minjenych měsacach trochu dokładnišo­ slědował, tomu je wědome, zo so doping mjeztym po cyłym swěće w nimale wšitkich sportowych družinach kaž hydra rozpřestrěwa, přećiwo kotremuž je bój nimale bjezwuhladny. A hdyž stanje so prašenje za wobšudnistwom w sporće z politikumom kaž w padźe Ruskeje, dyrbiš so chutnje prašeć, kotry mjezynarodny abo narodny sportowy zwjazk so scyła hišće­ za čistych sportowcow zasadźa.

Widźał, słyšał, napisał (15.08.16)

póndźela, 15. awgusta 2016 spisane wot:

Awtorka dźensa

Halena Jancyna

Olympija 2012 – njezapomnite to lěto za fanow beachvolleybala. Prěni raz je tehdy němske mustwo złotu medalju dobyło. Běštaj to Julius Brink a Jonas Reckermann. Wonaj běštaj team z Brazilskeje přewinyłoj. A kak wupada to 2016? Brink a Reckermann njejstaj wjac pódla. Wobaj staj strowotnych přičin dla přestałoj beachvolleyball hrać. Tón abo tamny je Brinka snadź minjeny čas we wšelkich telewizijnych wusyłanjach dožiwił. Reckermann njeje w medijach hižo tak prezentny.

Widźał, słyšał, napisał (08.08.16)

póndźela, 08. awgusta 2016 spisane wot:

Awtor dźensa

Clemens Šmit

„Wočiwidne! Woni tla na čas hraja!“, tole sej tučasnje husto myslu, hdyž podawki w aktualnym a zańdźenym w sporće sćěhuju. Dopominaće so hišće na pad Beckenbauer/Niersbach a na skandal FIFA wo kupjene koparske swětowe mišterstwa w Němskej 2006? A prašeće so tež runje, što je so tam poprawom wukopało? Štož so při mjetańcy jako pasiwne hraće definuje a w datym padźe druhdy přez sudnika kónči, je tež na mjenowanym přikładźe wobkedźbujomne. Podhladne wosoby runje tak kaž w mjetańcy na čas hraja. Ale nic jenož to, wone so samo z medijoweje zjawnosće a tak tež z našich wočow tak dołho zhubja, doniž so na nich njezabudźe. Podobne postupowanje pak njeje jenož w sporće en vogue (načasne).

Widźał, słyšał, napisał (01.08.16)

póndźela, 01. awgusta 2016 spisane wot:

Awtor dźensa

Tadej Cyž

W kopańcy je lětnja přestawka na cilowej čarje. Mnohe mustwa testuja formu w přećelskich hrach a přihotuja so tak na nowu sezonu. W 1. zwjazkowej lize započnu so dypkowe hry hakle kónc awgusta. Europske mišterstwa su hrajny plan trochu přesunyli. Wosebje w kadrje wicemištra z Dortmunda je so tójšto změniło. Tuchelowy nadawk nětko je ručež móžno nowych koparjow do mustwa integrować. Tež pola Bayerow wuhladamy nowe mjezwočo w lize. Carlo Ancelloti je nětko jich trenar. Snano móža pod jeho režiju zaso raz wubědźowanje champions league dobyć. Europskeho mištra wšak Mnichowčenjo hižo maja – Portugiza Renato Sanches je jedyn z nowačkow pola němskeho mištra.

Widźał, słyšał, napisał (25.07.16)

póndźela, 25. julija 2016 spisane wot:
Awtor dźensa Ludwig Zahrodnik

Bórze zahaja so w brazilskim Rio de Janeiru Olympiske lětnje hry. Sportowcy z cyłeho swěta zetkaja so k sportowemu wubědźowanju a k mjezsobnemu zeznaću. Hižo na antikskich olympiskich hrach w Grjekskej knježeše zasada, zo maja za čas hrow brónje mjelčeć. Dźensa so hižo nichtó po tym nima. W Syriskej wojowanja dale póńdu, a zawěsće tež hrózbne terorowe nadpady njewomjelknu.

nawěšk

nowostki LND