Swoju 6. staciju bičwolejbuloweje tury je Radijo Satkula wčera we Worklecach wuhotowało. Něhdźe 200 ludźi je sej tam do­jěło, cyłkownje 17 mustwow je so na hrajnišću při šuli wubědźowało. Worklečanska młodźina staraše so wo chłódne napoje a słódnu jědź, pozdźišo tež wo swěcu na bičwolejbulnišću. W finalu su so Radworčenjo přećiwo Wotrowčanam po horcym boju ze 26:24 přesadźili. Přichodna stacija bičtury budźe přichodnu póndźelu w Konjecach, hdźež woswjeći młodźinska žołma Radija Sat­kula zdobom 20. róčnicu wobstaća. Foto: Lea Šefrichec

Sokoł Ralbicy/Hórki – Budissa Budyšin, młodźina A 4:0 (2:0)

Za Sokoł zasadźeni: Schöne – Materna, Wałda, Šewc, Šiman, Domaška, Kurjat, Ćěsla, Janca, Kobalc, Budar, Nuk, Šołta, Gloxyn, Bjeńš, Hrjehor, Rawš, Wowčerk, Schultz

K poslednjej přihotowanskej hrě běchu sej koparjo Sokoła Ralbicy/Hórki młodźinu A ze sprjewineho města přeprosyli. Młodźina A w krajnej lize za bulom honi a ma po móžnosći tež jónu prěnje mustwo zesylnić. W jeje rjadach hraje na přikład tež syn trenarja Serb­skeje koparskeje wubranki muži Niclas Ričel.

Za optimalny přihot na nowu hrajnu dobu podachu so koparjo Sportoweje jednotki Chrósćicy (SJC) kónc julija do tre­ningoweho lěhwa w pólskej Raszo­wje. To je wjes w gmejnje Leśnica, kotraž je zdobom partnerska komuna Chrósćic. Koparjo SJC přebywachu tam mjeztym třeći raz.

Po tym zo běchu sej štwórtk, 25. julija, wječor 14 hrajerjow a trenarje do Pól­skeje dojěli, startowachu pjatk po rańšim sporće a sně­dani z treningom. Na planje steje­štej dwě jednotce, jedna dopołdnja a jedna popołdnju. W dopołdnišej dźěłachu wobdźělnicy při horcych tempera­turach wosebje na kondiciji, popołdnju zwučowachu wšelake hrajne formy. Wječor­ slědowaše hišće hra přećiwo mu­stwu­ z Raszowy, kotraž skónči so 2:1 za domjacych. Chróšćenjo mějachu w prěnim kaž tež w druhim połčasu dosć šansow, njezamóchu pak je wužić.

Wohnjowi wobornicy so w Sernjanach wubědźowali

Prjedy abo pozdźišo budu sej tež wobornicy zarjadniskeho zwjazka při Klóšterskej wodźe a tohorunja wokoło Kulowa digitalnu měrjensku techniku wobstarać dyrbjeć, zo bychu nastate časy woprawdźitosći wotpowědowali. To drje je ze stopowkami tež tak někak móžne, ale přeco njedokładne, wšako z ruku časy stopuja. W zašłych lětach njejedna so při rozsudźe wo zaměstnjenju hižo wo sekundy abo dźesaćiny. Husto je tak, zo stoćiny sekun­dow rozsudźeja. Trójce bě tomu na přikład tež pjatk wječor w Sernjanach tak. Mjez pjatym a štwórtym běchu to štyri stoćiny, mjez štwórtym a třećim wosom stoćin a mjez druhim a prěnim samo jeno tři (hlej tabulku).