Budyscy volleyballisća dobyli
Wulke wuspěchi, ale tež přesłapjenja žnjeli
Rio de Janeiro. Prěnje olympiske hry we Łaćonskej Americe su wot minjeneje njedźele jenož hišće stawizny. Ale što zwostawa nam w pomjatku? Zawěsće je to tež wulke mnóstwo problemow zwonka sportowych wubědźowanjow. Tele sahachu wot improwizacijow při twarje olympiskeje wsy přez cika-wirus a njefairny domoródny publikum hač ke kriminaliće. K poslednjemu dypkej drje wumyslenu stawiznu rubježneho nadpada na płuwarjow wokoło Američana Ryana Lochty tak spěšnje njezabudźemy. Dalša wulka tema w zwisku z lětušimi hrami běše doping. Prašenje, kak z ruskimi atletami wobchadźeć, wosta nimale hač do kónca olympiady ze stron IOC njewotmołwjene.
Wuslědki (23.08.16)
Regionalna koparska liga
1. Jena 4 8 :0 12
2. Lok Lipsk 4 8 :3 10
3. Nordhausen 4 9 :2 9
4. BFC Dynamo 4 10 :3 7
5. Hertha BSC II 4 5 :4 7
6. RB Lipsk II 4 5 :5 7
7. FC Viktoria Berlin 4 6 :3 6
8. Babelsberg 03 4 7 :8 6
9. Auerbach 4 4 :6 6
10. Berlinski AK 4 3 :5 5
11. Fürstenwalde 4 3 :6 5
12. Schönberg 3 5 :4 4
13. Energija Choćebuz 3 2 :2 3
14. Neugersdorf 4 7 :8 3
15. Meuselwitz 4 0 :3 2
16. Budissa Budyšin 4 2 :5 1
17. Neustrelitz 4 1 :8 1
18. Luckenwalde 4 1 :11 1
Kanut Sebastian Brendel němsku chorhoj njesł
Rio de Janeiro. Z pisanym programom rejow a spěwow zakónčichu so wčera w Rio de Janeiru 28. olympiske lětnje hry. Čestny nadawk chorhojnika spožčichu zamołwići němskeho olympiskeho zwjazka kanutej Sebastianej Brendelej. Jako dwójce krónowany olympiski dobyćer běše wón zdobom najwuspěšniši němski sportowc w Brazilskej. Sobotu bě sej swoje druhe złoto zwěsćił, a to zhromadnje z Janom Vandreyjom na distancy 1 000 metrow. Hišće samsny dźeń běchu sej němscy kanuća tři dalše medalje wubědźili. Tak wjesłowaše tež muska kajakowa štwórka k złotu, žónski kwartet k slěbru a solist Ronald Rauhe k bronzy.
Z tajkim wuspěchom njemóža němscy lochkoatleća za sebje wabić. Po špatnych wukonach wulkich faworitow, kaž Davida Storla, Chistiny Schwanitz a dalšich, wšak postara so mjetar hlebije Thomas Röhler wo zjednanliwy wukónc. Wulkotna dalokosć z 90,30 metrami wunjese 24lětnemu Durinčanej zaso raz němske złoto w tutej sportowej družinje po Klausu Wolfermannje, kiž bě 1972 w Mnichowje dobył.
Tři dypkik zazběhej
ST Haselbachtal – SJ Njebjelčicy 0:1 (0:0)
Zestawa hosći: D. Ričel – Hrjehor, Deleńk, Haška, Cyž, Hanuza, Hommel, Janca (62. Šołta), Hoelzel, Čornak (62. T. Kubaš), Lejnart (87. Korjeńk)
Swoju prěnju dypkowu hru w sezonje mějachu Njebjelčanscy koparjo w Haselbachtalu. Tamniše towarstwo wotmě runočasnje k dypkowej hrě přez cyły kónc tydźenja sportowy swjedźeń. Mjez druhim hraješe tam mustwo oldijow Dynama Drježdźany. Hač na Daniela Krala a Floriana Ričela běchu w rjadach Njebjelčanow wšitcy pódla. Po přihotowanskim času a testowych partijach chcychu chowancy trenarskeje dwójki Panic/Krawčik najprjedy raz z wěsteho škita sem nadběhować. Wot wšeho spočatka wuwi so spěšna a dospołnje wotewrjena hra. Domjacy mějachu při tym husto kontrolu, a Njebjelčenjo su jeno ćežko swój hrajny rytmus našli. Wrotar Ričel dyrbješe wjacekróć swoje kmanosće pokazać a strašne nadběhi wotwobarać. Najlěpšu šansu za hosći měješe Čornak. W 27. min. bě wón sam před wrotarjom, kotrehož pak njemóžeše přewinyć.
Traktor Kopšin lětuši Powerserb
Na wubědźowanju Powerserb sobotu w Radworju běchu mjez druhim móc, zmužitosć, wušiknosć a teamowy duch prašane. Jeno zhromadnje móžachu sportowe cyłki nadawki zmištrować. Tónkróć wjerćeše so wšitko wokoło Asterixa, Obelixa a wězo Romjanow.
Hru bojkotowali
Jenož remis hrali
FC Energija Choćebuz
– FC Viktoria Berlin 1:1 (1:1)
Zestawa domjacych: Meyer – Baude, Knechtel, Stein, Karbstein, Kruse, Putze (58. Förster), Weidlich (86. Müller), Viteritti, Gehrmann (39. Ziegenbein), Mamba
Tež po třećej dypkowej koparskej hrě noweje sezony w regionalnej lize čaka FC Energija Choćebuz dale na prěnje dobyće. Njerozsudnymaj wuslědkomaj 1:1 pola Lok Lipska a 0:0 přećiwo rezerwje RB Lipska slědowaše 1:1 přećiwo Viktoriji Berlin.
Běše-li 1:1 přećiwo „bykam“ hišće njezbožowne, dyrbjachmy po 90 mjeńšinach přećiwo koparjam ze zwjazkoweje stolicy wo sprawnym remisu rěčeć. Łužičenjo njezamóchu cyle jednorje porjadne kombinacije natwarjeć a sej z nimi prawe šansy wuhrać. W druhim połčasu měješe Stein (85.) jeničku móžnosć za mustwo, kotrež dyrbjało skónčnje raz dobyć. Nawjedowanje nutřkowneho škitarja Philippa Knechtela měješe jenož krótke wobstaće, dokelž hosćo pjeć mjeńšin pozdźišo wurunachu. Hrubeho hraća hosći dla dyrbještaj Joshua Putze (58.) a Kevin Weidlich (86.) zranjenaj trawnik wopušćić.
Ze sćerpnosću k wuspěchej
Sokoł Ralbicy/Hórki – ST Kinspork/Łužnica 2:0 (0:0)
Zestawa domjacych: Ch. Gloxyn – Matka, Domaška, Schultz, Lulak, Šewc, S. Bjeńš, D. Gloxyn, Korjeńk, Wowčerk, Kurjat (46. B. Bjeńš)
Ke koparskej hrě witaše Sokoł Ralbicy/Hórki wčera mustwo z Kinsporka/Łužnicy. Te bě swoju prěnju hru doma přećiwo Kumwałdej z 3:0 dobyło, štož bě delanskim koparjam warnowanski signal. Tohodla hru wot spočatka na lochke ramjo njewzachu. Pětr Domaška bě znowa w škiće zasadźeny, dokelž Bosćij Bjeńš zranjenja dla najprjedy raz wospjet na ławce sedźeše. Gabriel Kurjat jako jenički nadběhowar měješe přez cyły prěni połčas swoje ćeže přećiwo sylnemu škitej hosća. Najwjetšu ćežu pak měješe Stanij Šewc, kiž njezamó bul z třoch (!!!) metrow přez liniju sunyć. Přećiwniski wrotar jón hišće z refleksom wotwobara (30.). Hra bě dale bojowniska a wobě mustwje njeměještej žane jasne šansy.
Widźał, słyšał, napisał (22.08.16)
Zaso su olympiske hry nimo. Wězo sym kaž kóždy raz hodźiny před telewizorom abo live-streamom sydał a so nad medaljemi a wurjadnymi wukonami sportowcow wjeselił – mjez druhim nad złotej medalju rodźeneho Lubijčana Christiana Reitza w třělenju z pistolu. Přiwšěm su hry w Rio de Janeiru we mni kopicu prašenjow zawostajili. Ženje do toho njejsym fairnosć a olympiske moto „Pódla być je wšitko“ bóle parował, ženje njejsym nad zmysłom wuhotowanja olympiady a z tym zwisowacymi woporami za ludnosć, přirodu a infrastrukturu bóle dwělował hač lětsa. Štóž je rozprawnistwo w minjenych měsacach trochu dokładnišo slědował, tomu je wědome, zo so doping mjeztym po cyłym swěće w nimale wšitkich sportowych družinach kaž hydra rozpřestrěwa, přećiwo kotremuž je bój nimale bjezwuhladny. A hdyž stanje so prašenje za wobšudnistwom w sporće z politikumom kaž w padźe Ruskeje, dyrbiš so chutnje prašeć, kotry mjezynarodny abo narodny sportowy zwjazk so scyła hišće za čistych sportowcow zasadźa.
