Rewanša so wjace hač poradźiła

štwórtk, 30. junija 2016 spisane wot:

ST 1922 Radwor

– ST Budyšin 8:3 (3:3)

Zestawa domjacych: Wróbl – Bauer, Buša, Henke, Mark (46. Nuk), von Karwin, Šěrak, (78. Wünderlich), Abdullah, Zähr, Schulze, Winar

W poslednjej dypkowej hrě sezony witachu koparjo Radworskeho ST 1922 prěnjeho tabulki ST Budyšin. Tón bě hižo dočasny staflowy dobyćer. Wšojedne, kak so hra skónči, mišterstwo njemóžachu jemu domjacy hižo wzać. Přiwšěm chcychu so z dobrym wukonom do lětnjeje přestawki rozžohnować a so zdobom za njetrjebawšu poražku 2:1 w prěnjej hrě rewanšować.

Satkula-beachtura zahajena

štwórtk, 30. junija 2016 spisane wot:
Něhdźe połsta młodostnych je so na prěnjej staciji beachtury młodeje žołmy Satkula w Nuknicy wobdźěliło. Najwuspěšniše mjez šěsć mustwami bě Chróšćanske, w korymž hrajachu štyrjo hólcy. Hižo třeći raz je młodźinska redakcija z tajkej akciju w młodźinskich klubach po puću. Přichodnu póndźelu hraja w Hórkach, wulke finale budźe 22. awgusta w Miłoćicach. Foto: MDR Radijo Satkula/Gloria Žurec

Paris. Islandźenjo su a wostanu najwjetša překwapjenka lětušich europskich koparskich mišterstwow. Z fantastiskim mustwowym wukonom spěchachu woni hač do štwórćfinala. Triumf nad Jendźelskej bě koparska sensacija a runočasnje jedyn z najwjetšich sportowych debaklow.

Chowancy trenarja Larsa Lagerbäcka dźerža so w hrach přeco na kruty plan. Wjele wěcow, kaž na přikład kontery, wólne kopy a zamjety, su do hrow jasnje nastudowane. Tak su to tež dołhe zamjety Arona Gunnarssona. W předkole přećiwo Awstriskej (2:1) kaž tohorunja we wosmifinalu přećiwo Jendźelskej (2:1) nastachu po dołhim zamjeće kapitana wrota. W hrě přećiwo Jendźelčanam ćisny­ Gunnarsson bul do šěsnatki, tam Árnason z hłójčku po­dlěši a Sigurðsson k 1:1 wuruna. To bě nimale eksaktna kopija­ wrotow, kotrež běchu Islandźenjo hižo přećiwo Awstriskej docpěli.

Budyska FSG třeće městno wobsadźiła

srjeda, 29. junija 2016 spisane wot:

Mixvolleyballisća Budyskeje FSG su 26. mišterstwo na hobbyjowej runinje z bronzu skónčili. Tež w pokalnym wurisanju wobsadźichu woni třeće městno mjez pjeć startowacymi cyłkami. Sportowcy z Chróstawy wubědźichu sej požadany dubl dobyćerja.

Tydźenja skónči so w Budyskim wokrjesu dypkowa hrajna serija w mixvolleyballu. Amtěrowacy wicemišter, žony a mužojo Budyskeje FSG, přěhra načolnej partiji přećiwo Chróstawje a Wjazońcy a zaměstni so na kóncu w srjedźnym polu. FSGnicy mějachu swoje ćeže w přijimanju nadaćow a w pólnym škiće. Tež wupad hłowneje přihrawarki chorosće dla njemóžachu narunać. To pokaza so tohorunja w pokalnym wurisanju, kotrež slědowaše po dypkowych hrach.

Chróstawscy mixvolleyballisća nje­běchu jeno ći najmłódši, ale we wobě­maj wubědźowanjomaj tež najlěpši. Woni docpěchu w stawiznach swojeho zjednoćenstwa prěni raz tak mjenowany dubl. Měšany cyłk z Wjazońcy wuwo­jowa sej dwójce slěbro, amtěrowacy mišter­ MSV 04 Budyšin bě lětsa jeno štwórty. A nowačcy z Barta wobsadźi­chu po wulkim boju pjate městno.

Wubranka muži hraje

srjeda, 29. junija 2016 spisane wot:
Serbska koparska wubranka muži (SKWm) hraje njedźelu, 10. julija, w 15 hodź. w Njebjelčicach přećiwo mustwu U 23 FC Hornja Łužica Neugersdorf. Na to su so zamołwići SKWm a FC Hornjeje Łužicy Neugersdorf dojednali. SN

Wo lětnej bajce w Južnym Tirolu

srjeda, 29. junija 2016 spisane wot:

Europeada 2016 je nimo. 17. a 18. junija běchu so mužojo a žony Serbskeju koparskeju wubrankow z wulkej nadźiju na puć do Južneho Tirola nastajili. Kak wjeseli a hordźi woni běchu, serbsku narodnosć zastupować směć. Wšitcy běchu so pilnje na tónle sportowy podawk přihotowali.

Žónske mustwo trenowaše nimale kóždu sobotu w Ralbicach abo Bis­ko­picach­, hdys a hdys tež w Njebjelčicach. Nimo toho pobychu w čěskim Bedřichovje w sněhakowarskim lěhwje a w Choćebuzu w treningowym lěhwje. Tež někotre testowe hry su měli. Napjatosć a euforija běštej tuž wulkej. Sobotu rano skónčnje w Južnym Tirolu dojědźechu. Přijomny a krasny hotel Alpenhof běše domicil serbskich koparkow.

Lille. Stadion Stade Pierre-Mauroy w francoskim měsće Lille běše minjenu njedźelu kruće w rukach němskeje koparskeje wubranki. 44 312 přihladowarjow móžeše tam dožiwić, zo trenar Joachim Löw štyri mjeńšiny po tym zo bě Lukasa Podolskeho zaměnił, tež Bastiana Schweinsteigera na hrajnišćo pósła (76.). Tak steještaj wonaj hač do kónca hry bok poboku na trawniku.

To wšak dyrbješe posledni zhromadny wustup w narodnym mustwje Němskeje być. Snano dóstanjetaj hišće raz wotchadnu partiju, we winowatostnej pak za Němsku cyle wěsće wjace zhromadnje hrać njebudźetaj. Schweinsteiger drje móže so hišće zasadźenja w štwórćfinalu přećiwo Italskej nadźijeć, Podolski pak žane wuhlady wjace nima. „Jogi“ Löw ma na lěwym boku z Götzu a Draxlerom lěpšej­ alternatiwje. Zo pak bě Löw Podolskemu k dwanatej hrě europskich mišterstwow (EM) dopomhał, dopokazuje, kak wulce sej zasłužby rodźeneho Polaka česći. Bě to wosebity dźak za dwanaće zhromadnych lět, w kotrychž dožiwištaj wobaj wjeršk z dobyćom swětowych mišterstwow 2014 w Brazilskej.

Nizza. Jendźelska nowina The Times pisaše dźensa rano mjez druhim: „Po 959 hrach bě to poniženje w jendźelskich stawiznach – podležeć narodnemu mustwu kraja z 330 000 wobydlerjemi, kotrež trenuje zubny lěkar.“ Wčera wječor su Jendźelčenjo najwjetšej sportowej sensaciji za mału Islandsku dopomhali. Islandska je maćerny kraj kopańcy wušaltowała.

Najprjedy drje je wulki faworit Jendźelska nawjedował. Wayne Rooney přetwori jědnatku k 1:0 (4.). Hižo po 80 sekundach pak Ragnar Sigurðsson wuruna. Dwanaće mjeńšin pozdźišo wón samo hišće na 1:2 zwyši. Čas nadźije za Islandsku so započa. Jědnaće bratrow-koparjow zasadźeše so kóždy za kóždeho. Wojo­wachu wo kóždy bul, a zatykachu kóždu dźěru. Bój je so wudanił, sensacija bě perfektna.­ Nětko čakaja njedźelu w štwórćfinalu Francozojo na nich.

Bojowniski wonkowny wuspěch

wutora, 28. junija 2016 spisane wot:

Natwar Němske Pazlicy

– ST Marijina hwězda 1:2 (0:1)

Zestawa hosći: O. Schmidt – Wróbl (53. Bětnar), Łušćanski, T. Jurš, Lipič, Langer (56. Korjeńk), Winkler, Peschmann, Rab, Pakoßnick (80. P. Schmidt), D. Jurš

Poslednju winowatostnu dypkowu hru we wokrjesnej lize w sezonje mějachu Pančičanscy koparjo w Němskich Pazlicach absolwować. Domjacy běchu kaž hosćo zašłej partiji z dobyćom zakónčili. Mustwje sej tuž na trawniku ničo njedarištej. 0:1 w 15. min. bě dar Němskopazličanskeho wrotarja. Wróbl bě bul ze swójskeje połojcy cyle jednorje raz wysoko do šěsnatki přećiwnika kopnył. Hosćićelski wrotar bul po zdaću wěsće popadny a da jón zaso z rukow. Peschmann spěšnje reagowaše a suny kulowatu kožu do prózdnych wrotow. Slědowaše faza z wjacorymi móžnosćemi na woběmaj bokomaj. Dawid Jurš, Wróbl a Pakoßnick pak njetrjechichu. Na tamnej stronje bě wrotar Schmidt na městnje, a jónu pomhaše jemu žerdź.

13. žabjacy běh

wutora, 28. junija 2016 spisane wot:

Při horcym a tužnym wjedrje wotmě so minjeny pjatk w Běłej pola Kamjenca mjeztym 13. nócny žabjacy běh po tamnišej hatnej krajinje. Na distancomaj 2 km a 9,6 km wubědźowaše so 971 běharkow a běharjow, mjez nimi tež 15 serbskich. Na 2 km wobsadźichu ze serbskich starterow Florian Čórlich z Konjec 25. městno (sk pod 10), Jonas Glücklich z Kamjenca jědnate (sk pod 12) a Adri­jana Matkec z Worklec 9. městno (sk pod 16).

Při chowanju słónca w 21.24 hodź. startowachu tradicionalny a hłowny běh z wutřělemi hońtwjerjow z jich třělbow. Na 9,6 km dźěše wo požadany pokal žabjaceho krala a žabjaceje kralowny. Wubědźiłoj staj sej jón Marc Schulze a Juliane Schmidt, wobaj z Drježdźan. Na tutej distancy, na kotrejž su sta swjatojanskich muškow ze swojim swětleškom atletam dračinu tróšku wolóžili, běštaj najspěšnišej Serbaj Roman Měrćink z Baćonja (sk 20), kiž wobsadźi 6. městno, a Manuela Jurkowa z Łupoje (sk 30) na 5. městnje.

Lubowarjo walkinga wubědźowachu so tohorunja na 9,6 km; woni pak startowachu hižo w 20 hodź. Mjez nimi wojowaše tež serbska atletka Corinna Měrćinkowa z Chelna, kotraž wuwojowa sej mjez žonami cyłkowne 3. městno.

Serbska debata

nowostki LND