Nazymske mišterstwo z ruki dali

wutora, 10. decembera 2019
artikl hódnoćić
(0 )
Clemens Eckert, Stephan Wjeńka a Jurij Lipič (wotlěwa, wšitcy Worklecy) wočakuja přichodne nadaće přećiwnika. Přichodnej hrě změje Viktoria sobotu w hali Wojerowskeho Léona Foucaultoweho gymnazija. Tam budźe finale wobwodneho pokala wuchod neje Sakskeje.  Foto: Jörg Stephan Clemens Eckert, Stephan Wjeńka a Jurij Lipič (wotlěwa, wšitcy Worklecy) wočakuja přichodne nadaće přećiwnika. Přichodnej hrě změje Viktoria sobotu w hali Wojerowskeho Léona Foucaultoweho gymnazija. Tam budźe finale wobwodneho pokala wuchod neje Sakskeje. Foto: Jörg Stephan

ST Kupoj-Nowa Łuka – Viktoria Worklecy 3:2 (25:22, 21:25, 23:25, 25:19, 15:10)

Wobwodna liga wuchodneje Sakskeje – mužojo

1. Módro-běli Wojerecy II 8 23 : 5 22

2. Viktoria Worklecy 8 23 : 6 21

3. ST Kupoj-Nowa Łuka 8 21 : 8 20

4. CVJM Zhorjelc  7 15 : 14 13

5. ST 1896 Wulka Dubrawa 7 12 : 15 9

6. TSV Niederoderwitz 8 11 : 19 8

7. TSV Kundraćicy 6 6 : 12 6

8. MSV Budyšin 04 II 7 7 : 19 3

9. OSC Lubij  8 4 : 24 1


W zašłych lětach běchu hry mjez mjenowanymaj wolejbulowymaj mustwomaj přeco snadnje wušli, nimale přeco rěkaše na kóncu 3:2. Zašłu sobotu steješe zaso wažna hra na programje. Z dobyćom móhli hrajerjo Viktorije Worklecy čoło tabulki přewzać a sej nazymske mišterstwo zawěsćić.

Započatk hry bě wjele lubjacy. Marcel Rjelka zamó šěsć nadaćow serwěrować, a Worklečanska blokowa sćěna steješe. Z wokřewjacej lochkosću hosćo sadźbu hač do 16:11 dominowachu. Hosćićeljo pak so zhrabachu a předskok dypk po dypku pomjeńšachu. Z wulkej rutinu sadźbu hišće zwjertnychu a dobychu z 25:22. Škoda za Viktoriju, to trjeba njebě. Ale mužojo wokoło kapitana Ludwiga Eckerta swój zaměr za hrajny dźeń w druhej sadźbje jasnje pokazachu. Tónraz swój předskok z wulkotnym nasta­jenjom zakitowachu, a to hač do 21:25.

Tež třeći přechod bě wolejbul na wysokim niwo­wje. Dołho dźěše tam a sem, kaž mjezystawy 12:12, 18:19 a 23:22 pokazuja. Po druhim přetorhnjenju pak sej Worklečenjo trěbne tři dypki za sadźbowe dobyće zaručichu. Nětko pobrachowaše jim jenož hišće jedna jenička sadźba, zo bychu sej són wo nazymskim mišterstwje spjelnili.

W rozsudnej štwórtej pak so nadobo kopolachu. Přiwzaća běchu njewěste, a hdyž jónu derje nad­běhowachu, steješe tam Kupojski blok. Dźesać dypkow předskoka za přećiwnika je hosćom nimale wšu na­dźiju rubiło, kłonić pak so na žadyn pad nochcychu. Znajmjeńša chcychu pozitiwnu energiju do trěbneho tiebreaka wzać. Posled­nje akcije běchu jara dynamiske a zbudźichu nadźiju, hru tola hišće dobyć. Z dwěmaj dypkomaj bychu čoło tabulki zdobyli. Ale wšojedne, kak so tež prócowachu, domjacy dóstachu kóždy bul. Wosebje libero bě so jara stopnjował. Worklečenjo drje pokazachu najlěpši wukon sezony, ale k dobyću při­wšěm dosahało njeje. 15:10 a tak 3:2 za Ku­poj-Nowu Łuku rěkaše po dwěmaj hodźinomaj, samsny to rezultat kaž w zašłych štyrjoch lětach.

W druhej hrě dnja dobychu hosćićeljo přećiwo Zhorjelcej 3:1. Nastupajo bój wo wobwodny titul w nowym lěće smědźa so fanojo na napjate hry mjez Módro­běłymi z Wojerec, Kupoju-Nowej Łuku a Worklecami wjeselić. Do toho pak steji sobotu we Wojerecach hišće kónčne koło wo wobwodny pokal na programje. Tam wobsteji za Viktoriju přichodna móžnosć, sej jedyn titul wudobyć.

Za Viktoriju Worklecy hrajachu: Jan Bětnar, Clemens a Ludwig Eckert, Stefan Gedik, Jurij Lipič, Marcel Rjelka, Józef Šnajder, Daniel Wałda a Stephan Wjeńka.

Mato Eckert

wozjewjene w: Sport
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND