Zeleno-běli Sepicy – SJ Chrósćicy 2:4 (1:1)
Zestawa hosći: Teschner – Dehn (69. Hawš), Šiman (60. Pöpel), Pohling, Šafář, Dórnik, Runt, Domaška, Zahrodnik, Šmit, Žur
Dobru hru z wulkotnym wuslědkom pokazachu Chróšćenjo njedźelu w Sepicach. Hačrunjež znowa dwójce w zastatku leželi, su stajnje zaso moralku pokazali a na kóncu hru na swójske dobro zwjertnyli. Hižo po 20 sekundach prěnja dobra třělwa hosći. Runt sflankowa na Dórnika, tón wotpołoži Zahrodnikej, a jeho direktna třělwa wrota snadnje misny. Po 13 min. padny njejapcy nawjedowanje za domjacych. Bul so w rjadach Chróšćanow w srjedźnym polu přelochce přěhra. Bürger połoži kulowatu kožu před wrota, a Pohlingej njezwosta ničo druhe hač do nadběhowarja storčić. Tuž bě jědnatka woprawnjena, kotruž Zschiesche wěsće přetwori. Chróšćenjo pak so podwolić njedachu a mějachu hru jasnje dale pod kontrolu. Třělwa Runta bu hišće na liniji wotpopadnjena. Potom pak skónčnje dawno zasłužene wurunanje (37.). Nisku třělwu Domaški wotplacny wrotar doprědka, a Pohling najspěšnišo reagowaše a so z wrotami podźakowa.