Faworit z rutinu dobył

wutora, 22. decembera 2020 spisane wot:

Łužiske liški Běła Woda – Ravensburg Towerstars 1:3 (0:1, 1:1, 0:1)

Po słabej, ale wuspěšnej hrě minjeny pjatk witachu Łužiske lodohokejowe liški njedźelu načolnika tabulki z Ravensburga, je rutinowany team z tójšto nazhonitymi a robustnymi hrajerjemi. Liški su skerje hišće zelene za wušomaj, wšako su najmłódši cyłk ligi. Toho­dla dźěchu hosćo tež jako faworit do hry.

Prěnja třećina bě hišće poměrnje wuru­nana, ale hóstne mustwo měješe wjacore lěpše móžnosće. Mac Carruth we wrotach Běłeje Wody pak měješe ­znowa wulkotny dźeń a wšitke spočatne nadběhi přećiwnika wotwobara. To spožči jeho kolegam na lodźe mocy dosć, a tak so woni chětro wobarachu a poněčim respekt­ před Ravensburgčanami spušćichu. Jich nawjedowanje padny tak lo­gisce po wurjadnej akciji jednotliwca. Andreas­ Driendl wuhra cyły škit inkluziwnje ­wrotarja a suny puk do čorneho. Dalše tři dobre móžnosće hosćićelski goalie wotwobara, tak zo dźěchu Běło­wodźenjo ze snadnym zastatkom 0:1 do prěnjeje pře­stawki.

Nowe lěto započina so hnydom ze sportowym wjerškom. Sakski koparski zwjazk wuhotuje prěni raz swójsku tak mjenowanu eFootball trophy, elektroniske koparske wubědźowanje wo krajny pokal za Fifa 21 hrajerjow. Mišter kwa­lifikuje so za tak mjenowany ePokal Němskeho koparskeho zwjazka (DFB), a wězo syda wjele mytow. Přizjewić móžeće so hišće hač do jutřišeho 23. decembra 2020.

Wuhrata budźe trophy na PS 4 kaž tež na XBOX One. Hrać budu w k.o.-modusu 1 přećiwo 1. Wuměnjenja su za kóždeho hrajerja samsne. Za kóždy konsolowy turněr pytaja 128 wobdźělnikow. Koło přewjedu wot 6. do 31. januara 2021. A wšitcy zajimcy smědźa so wobdźělić.

Přizjewić móžeš so online pod https://www.sfv-online.de/news/details/sfv-landesverbands-trophy-sachsenmeister-gesucht/. Dyrbiš pak znajmjeńša 16 lět być. Potom dóstanješ mejlku z infor­macijemi a wopodstatnjenjom, zo sy přizjewjeny. Te dyrbiš wot swójskeho sportoweho towarstwa wupjelnić a wob­krućić dać. Za towarstwo móža so tež wjacori hra­jerjo přizjewić.

Sebastian König zastojnstwo złožił

wutora, 22. decembera 2020 spisane wot:

Na zelenym trawniku knježi w Choćebuskim Stadionje přećelstwa hižo dlěši čas hodowny měr. Tola hnydom pódla koparskeho pola, w běrowach towarstwa, hdźež sobudźěłaćerjo jenož hišće skrótšene dźěłaja, je so strukturelnje něšto změniło. Sebastian König je swoju funkciju jako sportowy nawoda spušćił. Jeho poziciju wobsadźić njeje tučasnje předwidźane. König, kiž bě do toho hižo wuspěšny trenar juniorow w zwjazkowej lize­, pak wostanje nawoda młodźinskeho centruma Energije.

Přihotuja swětowy cup w Oberhofje

wutora, 22. decembera 2020 spisane wot:
Mjeztym zo je so karawana najlěpšich biatletkow a biatletow swěta po prěnim z třoch­ trimestrow najprjedy raz rozpušćiła, přihotuja so w Oberhofje na swětowej cupaj spočatk noweho lěta. Tež wosebita konstrukcija, zwjazowaca stadion z nowym funkciskim twarjenjom, je mjeztym natwarjena. Prěni swětowy cup w Oberhofje budźe wot 8. do 10. januara, dalši wot 13. do 17. januara 2021. Foto: Ralf IIgen

Z pomocu widejoweje konferency srjedź decembra je dźěłowa skupina „dalewjedźenje winowatostnych hrow“ Sewjerowuchodneho koparskeho zwjazka Němskeje (NOFV) wo móžnosćach dalewjedźenja tychle partijow wuradźowała. K tomu je 19 towarstwow cyle rozdźělne namjety zapodało. Často pak poćahowachu so wone na aktualnu poziciju w tabulce. Při wšitkich přemyslowanjach steještej zahaćenje pandemije a strowota kóždeho před sportowskim a hospodarskim aspektom. Diskusija steješe sylnje pod aktualnym lockdownom a aktualnymi ličbami kołowokoło pandemije.

Hrajnemu wuběrkej na kóncu konferency doporučichu, z regionalnej ligu hakle po 31. januaru 2021 pokročować, zo by na kóncu tež rozsud wo zestupje a postupje na hrajnišću nastał. Zakónčić prěnje koło ma při tym najwyšu prioritu. A to wšo ma hač do 30. junija 2021 zakónčene być, při čimž maja tež předpisy z towaršnosće wobkedźbować. Nadrob­no­sće a jednotliwe mysle a přeća kaž na přikład Biskopičanskeho KT abo FC Energije Choćebuz chce dźěłowa skupina na přichodnym posedźenju 13. januara 2021 rozjimać.

Dodawk k regionalnej lize

Tabulki (22.12.20)

wutora, 22. decembera 2020 spisane wot:

Kopańca w Braniborskej

krajna liga

1. 1. FC Frankfurt 8 19 : 12 17

2. MST 1919 Neuruppin 7 21 : 9 16

3. TSG Jednota Bernau 8 17 : 7 15

4. Miersdorf/Zeuthen 9 12 : 15 14

5. Werderanski FC Viktoria  8 13 : 9 13

6. FV Preussen Eberswalde 8 13 : 14 13

7. Zeleno-běli Lubnjow 9 23 : 19 12

8. KST Bernau 8 12 : 16 12

9. SG Union Klosterfelde 9 16 : 16 11

10. Petershagen-Eggersdorf 8 10 : 8 10

11. TuS Sachsenhausen 8 10 : 9 10

12. ST Altlüdersdorf 8 11 : 15 10

13. FC Eisenhüttenstadt 6 11 : 13 9

14. Oranienburgski FC 6 13 : 12 8

15. ST Frankonia Wernsdorf 7 9 : 14 7

16. ST Falkensee-Finkenkrug 6 9 : 19 4

17. ST Zehdenick 1920 7 8 : 20 4

krajna liga-sewjer

1. FC Wocl Braniborska 9 19 : 7 20

2. BSC Fortuna Glienicke 9 22 : 8 17

3. Zeleno-běli Ahrensfelde 7 24 : 8 16

4. FC Schwedt 02 7 15 : 6 14

5. Buckow/Waldsieversd.  7 24 : 15 13

6. Nowe Město 8 17 : 8 12

7. Zeleno-běli Brieselang 8 11 : 10 12

8. KST Babelsberg 74 9 13 : 13 12

9. Přezjednota Alt Ruppin 8 14 : 16 11

10. Birkenwerderski BC 8 11 : 14 11

11. Jednota Perleberg 8 15 : 12 10

12. TST Chemija Premnitz 9 13 : 18 10

13. Fortuna Babelsberg 7 8 : 10 7

14. FC 98 Hennigsdorf 8 6 : 19 7

15. FK Hansa Wittstock 7 9 : 23 6

16. SC Oberhavel Velten 6 8 : 19 4

17. ST Babelsberg 03 II 7 2 : 25 0

krajna liga-juh

1. Germania Schöneiche 9 21 : 8 22

2. Brjazki/Zły Komorow 10 37 : 18 21

3. FV Erkner 1920 10 24 : 9 20

4. BSC Preußen 07 8 22 : 11 18

5. 1. FC Gubin e.V. 9 18 : 15 17

6. ST 1896 Gołkojce 8 18 : 12 14

7. SG Phönix Wildau 9 20 : 20 14

8. SG Großziethen 9 12 : 16 13

9. Dyn. Eisenhüttenstadt 8 12 : 18 13

10. ST Choćebuz-Strobice 8 20 : 15 11

11. BST Gubin-sewjer 8 13 : 16 11

12. TST 1878 Sliwin 8 9 : 14 11

13. Union Fürstenwalde II 6 17 : 8 10

14. VfB Lubuš  9 16 : 23 7

15. Módro-běli Brjazyna 8 5 : 25 3

16. Zeleno-běli Rehfelde 9 11 : 28 1

Rumpodich ST Radworja zaso po puću

póndźela, 21. decembera 2020 spisane wot:
Kaž přeco je tež lětsa rumpodich Spor­toweho towarstwa 1922 Radwor zaso po pu­ću, zo by so trenarjam, podpěra­ćelam, wotrjadnikam a dalšim dobro­wólnym pomocnikam za jich skutki dźako­wał. Runje mjenowani móža so na wše­lakore dary­, kaž drastu, słódkosće, dobropisy a dalše, wjeselić. Joachim Buša­, rumpodich Radworskeho ST, akciju ze swojej mandźelskej organizuje. Wón sam dźěła čestnohamtsce za towarstwo we wotrjedźe projektowy management, sponsoring a nakup. Kaž Buša přeradźa, trjeba­štaj wón a jeho žona cyły tydźeń za nakup, zapakowanje a wudźělenje darow­. W mjenje předsydstwa dóstanje wjac hač połsta pomocnikow za swoje cyłolětne dźěło za towarstwo dźakny dar. „Wšitke pjenjezy za akciju su wot sponsorow, kotřiž rady za nju daruja“, rumpodich Joachim Buša dodawa. Julien Glücklich

W zašłych sydom winowatostnych dypkowych hrach je koparske mustwo Dynama Drježdźany šěsć razow dobyło a jónu nje­rozsud­nje hrało. Tež pola Viktorije Köln móžachu so čorno-žołći sobotu ze 4:2 přesadźić. Na wobrazu škitataj swójske wrota Kevin­ Ehlers (nalěwo, Drježdźany) a Philipp Hosiner (srjedźa, Drježdźany). Foto: dpa/Manfred Heyne

Tři dypki po słabej hrě

póndźela, 21. decembera 2020 spisane wot:

Tigry Bayreuth – Łužiske liški Běła Woda 2:3 (0:1, 2:0, 0:2)

Pjatk běchu so Łužiske lodohokejowe liški­ do Wagneroweho města Bayreutha nastajili a so wottam samo z třomi dypkami zaso do domizny wróćili. Štož pak wobaj teamaj na lodźe pokazaštej, njebě jara šwarne. Wšako woběmaj zas a zaso kopica hrajerjow pobrachowaše.

Tak so wobaj cyłkaj w prěnich dźesać mjeńšinach najprjedy raz łahodnje jedyn tamnemu bližeštej. Nadobo pak trjechi Rylan Schwartz łatu, a jenož mjeńšinu na to docpě Brad Ross samo nawjedowanje za Łužiske liški. Trjechił bě wón puk po přihrawce Schwartza z njesměrnje wótreho kuta. Hakle mjeńšinu do prě­njeje přestawki mějachu domjacy prěnju wulku šansu, kotruž pak njewužichu. Hrajny nastroj wrota snadnje misny.

W druhej třećinje běchu Liški pasiw­ne a dachu Bayreuthskich lodohokejistow hru postajeć. Tak sej woni tež kopicu šansow wuhrachu a trjechichu w 25. min. k 1:1. Hakle w poslednjej mjeńšinje, jako mějachu hosćićeljo jednoho muža wjac na lodźe, móžachu woni wospjet wyskać.

Hłowne dźěła za lětsa zakónčene

póndźela, 21. decembera 2020 spisane wot:

Sobotu do 3. adwenta su sportowcy Chróšćanskeje SJ z dotwarom barjery a nastajenjom kabiny za trenarjow dźěła­ při sportnišću zakónčili.

„Dźěl spěchowanskeho projekta gmejny Chrósćicy, štož nastupa nuzne krje­pjenje trawnika a porjeńšenje sportoweho centruma ,Jednota‘, steji“, rozłožuje jednaćel Chróšćanskeje SJ Tadej Cyž.

Srjedź septembra su tam dźěłać za­počeli. Připrawichu połnoawtomatisku podešćowansku připrawu, kotraž trawnik po potrjebje krjepi. Do zemje zapołožene krjepjawki wodu na trawnik pryskaja. Wodu za to ma připrawa z noweje studnje, kotruž běchu niže sportnišća wuryli. Tež wjesnjanostu Marka Klimana (CDU) zwjesela, zo su dźělny projekt SIMUL-­­wu­bědźowanja, kotrež je gmejna lětsa dobyła, tak spěšnje zwoprawdźili. Zhromadne dźěło gmejny z towarstwami je wažne a budźe tež dale prašane.

Wutrobny dźak na tutym městnje firmam, kotrež su projekt sobu zwoprawdźili a jón přewodźeja, wšitkim sponsoram a wobdźělenym sportowcam. Wažmy sej inwesticiju, wona so w přichodźe zawěsće k wjeselu wšeje sportowaceje dźěćiny a młodźiny wudani. Jan Macka

słowo lěta 2020

nawěšk

SERBSKE NOWINY podpěruja:

Novi Sad – kulturna stolica Europy

nowostki LND