Zapósłane (26.05.17)

pjatk, 26. meje 2017 spisane wot:

Trudla Malinkowa z Budyšina piše:

Rubrika „Spomnjeće“ w Serbskich Nowinach z 22. meje bě wěnowana Korli Awgustej­ Fiedlerjej, zasłužbnemu serbskemu wučerjej a hudźbnikej składnostnje jeho stotych posmjertnin. Při tym so tež naspomnja, zo je w Budyšinje dróha po nim pomjenowana. Budyska Fiedlerowa dróha je w nowym měsće njedaloko Mosta měra. Nažel pak njeje po zasłužbnym Serbje pomjenowana, ale po prawizniku a dobroćelu města Budyšina. Na to pokaza wučer a domizniski slědźer Felix Wilhelm 1935 w swojim spisu „Die Bedeutung der Gassen- und Straßennamen im alten und neuen Bautzen“, hdźež rěka: „Fiedlerstraße. Carl Traugott Fiedler, Kgl. Sächs. Auditeur und Oberamtsgerichtsadvokat in Bautzen, hinterließ sein Vermögen im Gesamtbetrage von 135 665,08 Mark unter dem 4. Oktober 1826 den Stadtarmen, den Zöglingen des Waisenhauses und den Bürgerschützen.“

Zapósłane (12.05.17)

pjatk, 12. meje 2017 spisane wot:

Lothar Röhr, hudźbny nakładnik z Niederhausena pola Frankfurta nad Mohanom, je předstajeni oratorija „Serbske jutry“ w Drježdźanach a Budyšinje sobu dožiwił. Wón piše:

Hižo někotre lěta mam wjeselo, z Janom Cyžom hromadźe dźěłać, hač při wobstaranju notow za Serbski ludowy ansambl abo jako nakładnik jeho kompozicijow. Tak sym tež noty za jutrowny oratorij wudał. Jako mi komponist zdźěli, hdy so twórba předstaji, sym spontanje do Budyšina jěł. Činjach to tež, dokelž je Budyšin jara rjane město. Tam mi zmóžnichu, z hudźbnicami a hudźbnikami w busu ansambla sobu do Drježdźan jěć směć. Wšitko přijomni ludźo z wjele humorom. Dožiwich zwučowanje, kak měłoj so chór a orchester we wołtarnišću Dwórskeje cyrkwje prawje zestupać a zesydać, hladajo na wulku ličbu po cyrkwi běhacych turistow njebě to zawěsće jara přijomna naležnosć. W 15.30 hodź. so koncert skónčnje zahaji.

Zapósłane (13.04.17)

štwórtk, 13. apryla 2017 spisane wot:

Jan Nuk z Radworja so praša: Euforija Serbow po schwalenju nowele šulskeho zakonja woprawnjena?

W nowinskim wozjewjenju wupraja předsyda Domowiny Dawid Statnik składnostnje schwalenja nowele šulskeho zakonja dźak kubłanskopolitiskimaj rěčnikomaj Lotharej Bienstej (CDU) a Sabinje Friedel (SPD) za podpěru při zdźěłanju zakonja. Je tónle dźak woprawnjeny?

Wězo jewi so w zakonju za Serbow wjace prawow, směć w šulskich naležnosćach słyšani być. Słyšany być pak njerěka sobu postajeć. Ani w jednym postajenju zakonja njeje zapisane prawo weta. Nastupajo šulske stejnišća rěka pod § 23a, zo maja so planowanja šulskeje syće stać „im Benehmen“ ze zastupjerku zajimow Serbow po § 5 Serbskeho zakonja. Rěka „im Benehmen“ w přezjednosći abo w dojednanju? Čehodla so to potom konkretnje tak njezapisa?

Zapósłane (05.04.17)

srjeda, 05. apryla 2017 spisane wot:

Křesćan Krawc prosy Serbske Nowiny w naležnosći „cyłoserbskeho zetkanja“, kotruž je na hłownej zhromadźiznje Domowiny we Wojerecach přednjesł, wozjewić pasaže, kotrež dyrbješe pobrachowaceho časa dla wuwostajić. Wón pisa:

Swój diskusijny přinošk zahajich mjez druhim ze sadu: „Trjebamy cyłoserbske zetkanje, mojedla Serbsku zhromadźiznu abo Dźeń Serbow abo mojedla tež – njech rěka, kaž chce!“ W małym pismje w manuskripće steji, ale wosta njewuprajene: „Zjězd Serbow je mi přewysoko přimane.“

Dźensa dodawam tu k wujasnjenju: Folklorny festiwal w Chrósćicach je mjezynarodna show, za nas Serbow kulturny swjedźeń, na kotrymž wukony našich skupin z hóstnymi přirunujemy. Cyłoserbske zetkanje by chcyjo nochcyjo dóstało narodnopolitiski raz. Prajach: „W fokusu za mnje steji: Njehladajo na wšě rozkory dyrbjeli so zetkać k rozmyslowanju, k rozmołwje.“ A wězo tež k zawjeselenju!

Zapósłane (07.03.17)

wutora, 07. měrca 2017 spisane wot:

Jurij Łušćanski z Budyšina ma přispomnjenje k přinoškej, kotryž su Serbske Nowiny 22. februara pod rubriku „Zapósłane“ wozjewili:

W mjenje přećelow Serbow w Japanskej dźakuju so za wozjewjenje přełožka nastawka w japanskej nowinje. Bohužel pak nastachu při skrótšenju mojeho předteksta njejasnosće, kotrež chcu skorigować. Na nastawku běchu wjacori japanscy młodostni wobdźěleni a nic jenož naspomnjeny student slawistiki Yoshihisa­ Hagiwara. Nastawk napisał je žurnalist Tasuka Kido, kiž je spočatk nowembra zańdźeneho lěta Serbow a scyła Europu prěni raz wopytał. Jeho přewodźeše a jemu tołmačeše Shota Tamaka z Tokija, kiž wot lońšeho germanistiku na TU w Drježdźanach studuje. Jako bě­štaj w Budyšinje, zetkaštaj wonaj Kena Sasaharu. Wón je mjeztym dostudowany slawist, z kotrymž móžemy so serbsce rozmołwjeć. Nětko swoje doktorske dźěło doma w Tokiju dopisa.

Nastawk přełožił je horjeka mjenowany Yoshihisa, kiž pak bě hižo w juniju 2015 z hosćom tu pola nas. Wo wšitkich wopytach su SN skrótka informowali.

Zapósłane (27.02.17)

póndźela, 27. februara 2017 spisane wot:

Jan Nuk z Radworja rysuje dotal skerje njeznate zasłužby spočatk měsaca ze­mrěteho Achima Nawki:

9. februara hódnoćachu Serbske Nowiny žiwjenje Radworčana Achima Nawki, kiž bě 3. februara zemrěł. Wudospołnić chcu tři aktiwity trajaceho wuznama zemrěteho, zo bychu za stawiznopis dokumentowane byli.

We wosomdźesatych lětach minjeneho lětstotka zrodźi předsydstwo Radworskeje Domowinskeje skupiny mysličku, dosć roztřěskane Radworske wjesne puće z mjenami woznamjenić. Domy běchu do toho jeničce z čisłami wuhotowane. Achim Nawka přewza nadawk, za to namjet naćisnyć. Nimo we wobydlerstwje hižo wužiwanych pomjenowanjow kaž Wětrnik, Młynske chěže abo Lilijowa prócowaše so wón zasłužbnych Radworčanow počesćić, zo njebychu wobydlerjo na nich zabyli. Tak mamy dźensa w Ra­dworju pomjenowanja pućow zasłužbnych narodnych a nabožnych prócowarjow w ličbje, kaž lědma druha wjes we Łužicy: Su to dróhi Alojsa Andrickeho, Jakuba Lorenca-Zalěskeho, Józefa Nowaka, dr. Marje Grólmusec a Michała Nawki.

Zapósłane (23.02.17)

štwórtk, 23. februara 2017 spisane wot:

Hladajo na najnowše rozestajenja mjez Korutanskimi Słowjencami a knježerstwom w awstriskim Celovecu w zwisku z nowej wustawu kraja piše słowjenski nakładnik prof. Lojze Wieser:

Skónčnje, sej myslach, Korutanska je drje wulke wužadanje, tola stajnje zaso so prawy puć namaka, byrnjež pozdźe. Tola nětko, hdyž su primat němskeje rěče skradźu we wustawje zakótwili, póčnu dwělować. Lětstotk šowinizma je prawdźepodobnje slědy zawostajił. Lětdźesatki trajacy „trojopakt“ SPÖ, ÖVP a FPÖ so přez paragraf 5 skradźu do korutanskeje wustawy zadobywa, a to přez posleńcu, wo čimž minjeny čas ani jónu zjawnje rěč njebě. Kompromis we wustawowym konflikće swjeća nětko jako dobyće ro­zuma.

Zapósłane (22.02.17)

srjeda, 22. februara 2017 spisane wot:

Yoshihisa Hagiwara, student slawistiki w Tokiju pola docenta prof. dr. Christopha Gora Kimury, bě w juniju 2016 Serbow a Łužicu wopytał. Wo swojich dožiwjenjach w zwisku z ćěkancami a požadarjemi azyla napisa wón slědowacy přinošk, kotryž je nam Jurij Łušćanski posrědkował:

Wo Serbach a požadarjach azyla ze Syriskeje su nastawk japanskeho žurnalista Tasuka Kido w regionalnej nowinje Hokuriku Chunichi Shimbun wozjewili. Po wotewrjenju čary Hokuriku Shinkansen-čary přez morjo wuhladamy pola nas w Kanazawje – hłownej kupje kraja – w přiběracej měrje žony, kotrež w hidšabje-rubišku chodźa. Je to wonkowne znamjo muslimkow ze wšelakich krajow.

Zapósłane (21.02.17)

wutora, 21. februara 2017 spisane wot:

K aktualnym podawkam w kopańcy piše Heinz Noack z Wulkeje Dubrawy:

Lětdźesatki běchmy we wuchodnej Sakskej wot zapadoněmskeje kopańcy wuzamknjeni. Zo móhli najwažniše hry widźeć, stajichmy swoje anteny do směra na Čěsku, bjerjechmy zwuk z radijoweho sćelaka Rias a běchmy z přewšo špatnym wobrazom spokojom. Nětko móžemy kopańcu zwjazkoweje ligi wšědnje sćěhować, byrnjez z dołhimi wabjenskimi přestawkami.

Bjezdwěla su Mnichowscy Bayerojo wusahowace mustwo, kotrež ma prosće tež wjele zboža. Nimo toho su woni lubušcy sudnikow. To pak mje tež na čas NDR dopomina, jako stawaše so mustwo ministra za statnu wěstotu BFC lěto wot lěta mišter, mjezynarodnje pak bě spěšnje na kóncu. Minjeny kónc tydźenja čujach so kaž woneho 22. měrca 1986. Tehdy při­zwolichu BFC w hrě přećiwo Lok Lipskej w přidatnym hrajnym času „jědnatku hańby“, kotraž wjedźeše k njesprawnemu wurunanju 1:1.

Zapósłane (16.02.17)

štwórtk, 16. februara 2017 spisane wot:

Ludwig Zahrodnik z Jaseńcy zhladuje na serbske narodne žiwjenje:

Kaž w mnohich druhich wsach tež su so młodźi a starši Jasčenjo při zhromadnej silwesterskej zabawje do noweho lěta podali. Swjedźenjowanje pak dale dźe: Nimo někotrych swójbnych swjedźenjow, kaž 90. narodniny Rejzy Šwejdźineje, běchu to jolka-swjedźeń w Nuknicy, ptačokwasny program SLA w Chrósćicach a póstniska zabawa w Jaseńcy.

Wo ptačokwasnym programje SLA sym wšudźe jenož chwalobne słowa słyšał. Jako zasłyšach w Chróšćanskej „Jednoće“ stary šlager „Słónco a kwětki“, so dopomnich, kak běch 1957 w starej Budyskej „Krónje“ prěni program SLA pod nawodom Jurja Winarja sobu dožiwił. Rady na to myslu, kak zahorjeni my te­hdyši studenća Serbskeho wučerskeho wustawa (SWW) wo programje běchmy. Ale dopominam so tež na wuprajenje staršeho knjeza, zo to žadyn ptačokwasny program njebě, ale keklija.

nawěšk

nowostki LND