Zapósłane (16.02.17)

štwórtk, 16. februara 2017 spisane wot:

Ludwig Zahrodnik z Jaseńcy zhladuje na serbske narodne žiwjenje:

Kaž w mnohich druhich wsach tež su so młodźi a starši Jasčenjo při zhromadnej silwesterskej zabawje do noweho lěta podali. Swjedźenjowanje pak dale dźe: Nimo někotrych swójbnych swjedźenjow, kaž 90. narodniny Rejzy Šwejdźineje, běchu to jolka-swjedźeń w Nuknicy, ptačokwasny program SLA w Chrósćicach a póstniska zabawa w Jaseńcy.

Wo ptačokwasnym programje SLA sym wšudźe jenož chwalobne słowa słyšał. Jako zasłyšach w Chróšćanskej „Jednoće“ stary šlager „Słónco a kwětki“, so dopomnich, kak běch 1957 w starej Budyskej „Krónje“ prěni program SLA pod nawodom Jurja Winarja sobu dožiwił. Rady na to myslu, kak zahorjeni my te­hdyši studenća Serbskeho wučerskeho wustawa (SWW) wo programje běchmy. Ale dopominam so tež na wuprajenje staršeho knjeza, zo to žadyn ptačokwasny program njebě, ale keklija.

Šibały přinošk k wobrazej we wudaću SN z 8. februara podawa tule Jandytar Hajnk ze Smječkec:

Lětsa, dnja 8. februara,

je budźił wobraz mje ze spara!

W SN wuhladach na stronje 3

žónske cyby w pjekarni:

włosy „damy“, kiž organizuje

trěbne wiki kubłanske.

Ně wšak, ně!!

Tajke cólkry, wiwle, šešerje

w pjekarni?

Kak wohidne!

(Štóž tykanc debi a ma tajke šešerje,

njech swój produkt samlutki zežerje!)

PS:

Bych-li był fotograf, to njebych swarił,

bych zawěsće tej „damje“ běły kepi darił!

Na čitarski list Jana Nuka „Wostajmy cyrkej­ we wsy“, wozjewjenym w SN z 31. januara, pisataj rěčnikaj inicia­tiwy Serbski sejm dr. Měrćin Wałda a Hanzo Wylem-Kell:

Zapósłane (07.02.17)

wutora, 07. februara 2017 spisane wot:

Róža Wokowa z Kulowa je lětuši ptačokwasny program SLA w Kulowje dožiwiła a wo nim rozprawja:

Kaž kóžde lěto wopytach ptači kwas Serbskeho ludoweho ansambla. Kulowska wjacezaměrowa hala bě tónkróć jara derje pjelnjena, štož snano na tym zaležeše, zo je SLA 60. raz ptačokwasny program předstajił. Abo snano bě wabjenje tónkróć lěpše. Tež w cyrkwi běchu na podawk skedźbnili. A tak wuhladach mjez kwasnymi hosćimi duchownych, dźěći a młodźinu a wězo mnohich ludźi staršeje generacije, kotřiž běchu snano wšitke dotalne 59 ptačokwasnych zarjadowanjow SLA sćěhowali. Nawal při wječornej kasy bě wulki, a dyrbjachu samo stólcy přistajić.

Program bě z 22 programowymi dypkami połny zapala, a publikum reagowaše po kóždym přinošku z přikleskom. Akterojo ansambla wustupowachu w katolskej narodnej drasće, kotraž bě bjezporočna. Wjeršk bě serbska njewjesta, kotraž so jenož w jednym dypku na spočatku programa pokaza. Cyłkownje parowach Wojerowsku a Slepjansku drastu. Dobru žiłku při zestajenju rejow měještaj nastupajo hudźbu Jan Chlebníček a nastupajo choreografiji Juraj Kubánka.

Porjedźenka

póndźela, 06. februara 2017 spisane wot:
Do přinoška Benedikta Dyrlicha pjatk, 3. februara, je so wopačne słowo zasunyło. Mylnje bě rěč wo „wopačnych“ informacijach. Prawje ma rěkać: „Tele moje wuprajenje złožuje so na dalše ertne a pisomne informacije.“ Prosymy wo wodaće. SN

Zapósłane (03.02.17)

pjatk, 03. februara 2017 spisane wot:

Benedikt Dyrlich wupraji so k zapósłanemu „Wostańmy cyrkej we wsy“ Jana Nuka we wudaću SN 31. januara:

Jan Nuk ma hinaše měnjenje wo zastupnistwje serbskeho ludu hač na přikład wjace hač 800 Serbow (mjez nimi zasłužbni a angažowani kulturnicy a wuměłcy), kiž podpěruja wuraznje iniciatiwu a zjawnu diskusiju k wutworjenju Serbskeho sejma. Jan Nuk ma wězo prawo,­ swoje „hinaše měnjenje“ zwura­znić a zjawnje zastupować, runje kaž smě kóždy swoje měnjenje měć wo politiskim zastupnistwje Domowiny. Fakt pak je, zo Domowina jako zapisane towarstwo de jure njemóže rěčeć za wšón serbski lud, štož su dotal wšě seriozne po­sudki w tejle naležnosći (prof. Kotzur, prof. Vogt a dalši) wobkrućili.

Zapósłane (31.01.17)

wutora, 31. januara 2017 spisane wot:

„Wostańmy cyrkej we wsy“, měni Jan Nuk z Radworja k njedawnemu kubłanskemu wjerškej Serbskeho sejma w Budyšinje a k rozprawnistwu wo nim:

Kóždy, hač Serb abo Němc, kotryž so na dobro serbstwa angažuje, zasłuži sej respekt a připóznaće. Tole přitrjechi bjezdwěla tež za akterow kubłanskeho wjerška 14. januara w Budyšinje.

Dr. Andreas Kluge je w zawodnym přednošku znosył mnohe fakty, kotrež miseru serbskeho wučerstwa wučinjeja. Wězo su wone Domowinje, Serbskemu šulskemu towarstwu a sakskemu kubłanskemu ministerstwu w dalokej měrje znate. Nješkodźi pak, je stajnje znowa do fokusa dźěławosće stajeć.

Zapósłane (27.01.17)

pjatk, 27. januara 2017 spisane wot:

Bjarnat Cyž z Noweje Jaseńcy wupraja so k přinoškej „Njeje přepozdźe Serbski sejm wutworić“ w SN ze 24. januara:

W mjenowanym interviewje z dr. Měrćinom Wałdu nawjazuje redaktor na wjacorych městnach na moje wuprajenja w decemberskim přinošku. Wuwjedźenja dr. Wałdy na stajene prašenja pak zbudźeja we mni wjace prašenjow hač wotmołwow.

Hižo w prašenju wólbnych modalitow čitar njezhoni, wo kotru juristisku wosobu so jedna, kotraž wólby přewodźa a zamołwja. Rěč je wo Radźe starostow, kotraž pak nima žanužkuli legitimaciju juristiskeje wosoby. Dale njezhonimy, kotry­ juristiski status ma tele serbske zjednoćenstwo měć, kotremuž „Sejm“ předsteji. Prašenje, hač jedna so wo priwatne abo zjawnoprawniske zjednoćenstwo, wostanje tu wotewrjene. Štó so jako přirodna wosoba po kotrych modalitach z čłonom stanje, tohorunja jasne njeje.

Zapósłane (17.01.17)

wutora, 17. januara 2017 spisane wot:

Alfons Ryćer ze Šunowa piše k „Rozmyslowanemu“ Marka Wjeńki w Serbskich Nowinach z pjatka, 13. januara:

Mamy w Němskej swobodu měnjenja. W žanej nowinje pak njejsym dotal tak jasne słowa k woprawdźitym přičinam telko wójnow a njeměrow na swěće čitał kaž minjeny pjatk w našim serbskim wječorniku. Wulke připóznaće za to Markej Wjeńce za jeho přinošk, za iniciatiwu Slepjanskich wobydlerjow w samsnym směrje a cyłej nowinskej redakciji za zmužitosć, takle wotewrjenje rozprawjeć. Je najwjetši čas, zo so wobstajne šću­wanja přećiwo Ruskej skónča.

Mnozy Serbja, wosebje wjetšina młódšeje generacije, najskerje njewědźa, zo je nas w 40tych lětach minjeneho lětstotka Sowjetski zwjazk hnydom dwójce před narodnej smjerću wuchował. Ta hrožeše nam ze stron fašistiskeje Němskeje a krótko po Druhej swětowej wójnje ze stron nowych komunistiskich politiskich zamołwitych na wuchodźe Němskeje.

Zapósłane (09.12.16)

pjatk, 09. decembera 2016 spisane wot:

Regina Šołćina z Konjec piše k njedorozumjenjam mjez Domowinu a iniciatiwnej skupinu Serbski sejm:

Běch wostrózbnjena, jako čitach přinošk „Snano cyrkej pomha“ w Serbskich Nowinach z 30. nowembra. Njerozumju, zo dyrbi so „swójska zópka“ tak radi­kalnje na kóšty druhich warić. Dóstach podobnu negatiwnu informaciju tež hižo z druheje strony.

Njedowidźu, zo dyrbju tu hišće pomhać wolij do wohenja leć! Zo tež hinak dźe, je Slepo njedawno dopokazało!

Mam serbsku dušu a nošu z hordosću znamješko „serbskeje lipy“. Tohodla tule zjawnje cofnu připrajenje za mnje a mandźelskeho, jako sympatizantaj na lisćinje iniciatiwneje skupiny Serbski sejm stać. Swoje připrajenje dach knjezej Měrćinej Wałdźe z naiwneje njewědy po zhromadźiznje w Chróšćanskej šuli. Wopominachmy tam Chróšćan zběžk před 15 lětami.

Hdyž so tale „kara“ Bóh dał k dobremu zwjertnje, sym zwólniwa k swojemu připrajenju dale stać. Hižo bamž Jan XXIII. praješe: „Zhibować, njełamać!“ a njeboh Michał Nawka: „Serbja dyrbja hromadźe dźeržeć kaž jedna wulka swójba!“

Zapósłane (08.12.16)

štwórtk, 08. decembera 2016 spisane wot:

Antonín Vlk z čěskeho Mělníka piše:

Jara zajimawy je nastawk wo towar­stwje w Českej Lípje, kotrež přihotuje někotre akcije k 1 100. róčnicy smjerće swjateje Ludmile.

Při čitanju nastawka je moju kedźbnosć wubudźiła informacija wo pochadźe swjateje Ludmile. Najskerje hižo nichtó njedwěluje na jeje serbskim pochadźe, ale podata informacija wo městnje naroda w nastawku je wopačna.

Ludmila njebě Milčanka a njesłušeše do tež žanoho druheho kmjena tehdyšich słowjanskich splahow mjez Łobjom a Wódru. Wona słušeše do serbskeho splaha Pšowjanow. Tón bě zasydleny na prawym­ přibrjohu Łobja, dźensa w srjedźnej a sewjernej Čěskej, a bě sewjerny susod Čechow, zasydlenych na lěwym přibrjohu Łobja.

Najstarša chronika čěskich stawiznow z lěta 1125, tak mjenowana „Kosmowa chronika“, nam wuswětla, zo „ běše Ludmila dźowka knježićela hrodźika Pšow-Slawibora“. Jeho mandźelska, mać Ludmile, rěkaše Lidoslawa. To stej jeničkaj znataj knježićelej nad njewotwisnym Pšowom.

nawěšk

  • 21. jolka-swjedźeń w Nuknicy je nimo. Štož zwostanje su dopomnjenki na rjany žortny a zabawny wječor w Nukničanskej Brězanec bróžni. Někotre impresije serbskeho wječora w Nuknicy, kotrež je naša fotografowka-wolontarka Hanka Šěnec zhotowiła, wam tule
  • Serbske Nowiny-LND-Tuchmacherstr. 27 02625 Bautzen: Jolka 12.01.2019
  • Serbske Nowiny-LND-Tuchmacherstr. 27 02625 Bautzen: Jolka 12.01.2019

nowostki LND