K nastawkej Milenki Rječcyneje w rubrice ROZMYSLOWANE „Nowe ideje so spěchuja“­ (7. awgust 2015) piše Róža Domašcyna z Budyšina:

Lajkojo pokazuja wuběrny wukon

wutora, 15. septembera 2015 spisane wot:

Pasionska hra „Wy sće swětło swěta“ měješe sobotu w Chrósćicach premjeru. Alfons Handrik je so někotrych přihladowarjow za jich zaćišćemi prašał.

Regina Šołćina, Konjecy: Mam wulki respekt prěd akterami a zamołwitymi. Kóždy z hrajerjow so ze swojej rólu identifikuje, ničo njeje skomolene. Za wulku syłu zapřijatych sobuskutkowacych je jewišćo nimale přemałe. Z česćownosću zhladuju na wukon, wědźo, zo móže sej kóždy wjele sobu domoj wzać.

Měrćin Korjenk, Sernjany: Wuběrny hrajerski wukon kóždemu wuwědomja, kak su Jězusa hanili a kak je, woprujo so za nas, ćerpjeć dyrbjał. W myslach nańdu paralele k dźensnišemu časej. Jewišćowy wobraz na farskej łuce je fantastiski.

Jurij Lebza, Koslow: Přirunujo dźensniše předstajenje z tym před dźesać lětami zwěrju sej twjerdźić, zo njeje to proste wospjetowanje. Akterojo swoje róle njewothrawaja, ale su so do nich połnje zažiwili. Je wobdźiwanjahódne, kak to lajkojo, kotřiž zdźěla ženje hišće na jewišću stali njejsu, zamóža.

Wupuć abo problem?

štwórtk, 10. septembera 2015 spisane wot:

Pobrachowacy zajim młodostnych za wukubłanje w rjemjeslniskich powołanjach firmy a mištrow poćežuje, dorost namakać. Móžny wupuć zda so być integr­acija zwólniwych z rjadow ćěkancow. Takle posudźuja rjemjeslnicy a předewzaćeljo móžnosć, wukubłać młodych migrantow:

Tomaš Rječka, předewzaćel z Kamjenjej: Mam dweju wučomnikow. Njeby-li druheje móžnosće było, bych tež cuzym młodostnym šansu dał, tule powołanje wuknyć. Jeli su zwólniwi a žadanja spjelnja, čehodla nic. Nimam ničo přećiwo wukrajnym zajimcam, kotřiž so sprawnje wo dźěło abo wukubłanje prócuja. Mam hižo ruskeho sobudźěłaćerja a sym z nim jara spokojom.

Wolfgang Noack, předewzaćel z Kruš­wicy: W rjemjeslniskim zawodźe, hdźež dźe wo to, spěšnje jednać a rozsudźić, njezbywa chwile za wobšěrne rozjasnjenja, to dyrbja přistajeni reagować. Mam wobmyslenja, zo bychu to ćěkancy móhli. To njeby firmje tyło, bychmy-li na to dźiwać dyrbjeli, cuzych do materije zadźěłać. Politika měła w tym nastupanju wotpowědne wuměnjenja wutworić.

Chwalbu Hózčanam

wutora, 08. septembera 2015 spisane wot:

Błóto, korjenje, kamjenje, Čorny Halštrow – wšo to dyrbjachu wobdźělnicy prěnjeho Blackbird-runa njedźelu w Hózku přeprěčić. Bernadet Langec je so přihladowarjow a běharjow za jich zaćišćemi prašała.

Miriam Korchec z Koćiny: Hózkowska młodźina je něšto wulkotneho na nohi stajiła. Wosebje mje zwjesela, zo je sej telko serbskich młodostnych sem dojěło. Smědźach při přihotach kaž paslenju kostimow sobu pomhać a tak k poradźenju lóštneho podawka přinošować.

Tomaš Korch z Konjec: Za Hózk, poprawom za cyłu Łužicu, je tónle běh zajimawa a wosebje mokra nowosć. Z krasnej ideju zamó młodźinski klub wjace hač 100 běharjow a hišće wjac přihladowarjow wšěch starobnych skupin přiwabić. Płuwanje w Čornym Halštrowje a krosnowanje z rěki stej so mi jako přihladowarjej najlěpje spodobałoj.

Zapósłane (02.09.15)

srjeda, 02. septembera 2015 spisane wot:

Mikławš Krawc z Budyšina ma dodawk k přinoškej we wudaću SN z 25. awgusta „Serb na swětowych mi­šter- stwach w Japanskej“:

To bě zwjeselaca powěsć, zo je sej 16lětny Budyšan Egon Hübner, pochadźacy z ryzy němskeje swójby, na swětowych mišterstwach pjate město zawěsćił. Snano so něchtóžkuli praša, hač mějachmy hižo jónu serbskeho swětoweho mištra/serbsku swětowu mišterku. Na to móžu wotmołwić: Haj, samo dwójnu! Na swětowych mišterstwach parašutistow 1982 w Awstriskej słušeše tehdy 27lětna Katja Krawcec z Hrubjelčic k narodnemu mustwu Němskeje, kotrež zawěsći sej w skupinskim skakanju do cila a w kombina­ciskim hódnoćenju dwě złotej medali. Dźowka spisowaćela Křesćana Krawca a jeho mandźelskeje, wučerki Ingi, hołdowaše najprjedy płuwanju, namaka pak pozdźišo spodobanje na skakanju z padakom z njebjes. Katja sta so tež z němskej mišterku.

Wo nowym zazběhu w SLA

pjatk, 28. awgusta 2015 spisane wot:

Drježdźany (ML/SN). Nowina Dresdner Neueste Nachrichten je so minjenu póndźelu we wobšěrnym přinošku z połoženjom Serbskeho ludoweho ansambla po njedawnym njejapkim wotchadźe Mileny Vettrainoweje, kotraž bě wot lěta 2010 jeho intendantka, zaběrała. Kritisce bilancuje dźenik skutkowanje SLA na přikładźe poslednich předležacych ličbow z hrajneje doby 2012/2013: „Mějachu 22 předstajenjow w Budyšinje z 1 307 přihladowarjemi a 126 zwonka regiona ze 26 000 ludźimi. Hišće lěto do toho docpěchu 38 577 ludźi, z nich 1 677 w Budyšinje; a bě jich 22 hóstnych wustupow wjace. Při pjeć milionach eurow wu­dawkow za něhdźe­ 150 předstajenjow na lěto wostawaja prašenja, přirunuješ-li tole z dalšimi jewišćemi Hornjeje Łužicy.“ Awtor podawa k tomu ličby: Nowa Łužiska filharmonija ze 57 čłonami měješe 25 koncertow z 12 882 připosłucharjemi, a Žitawske dźiwadło ze 14 dźiwadźelni­kami poskići­ 358 inscenacijow 77 897 přihla­do­warjam. Jeho etat pak njewučinja ani połojcu toho SLA.

Zapósłane (26.08.15)

srjeda, 26. awgusta 2015 spisane wot:

Priwatny docent dr. Timo Meškank z Lipska přispomnja k rozprawnistwu wo Serbskim instituće w SN ze 14. a 18. awgusta:

Nadźijepołny awtor Jan Hejduška

wutora, 25. awgusta 2015 spisane wot:

W dwójnym čisle 7/8 časopisa Česko-lužický věstník je na 1. stronje baseń Jana Hejduški „Wuznaće“ w serbskej a čěskej rěči wozjewjena. Podate su wažne žiwjenske daty „nadźijepołneho awtora“ („hadějného autora“). Porno Nowemu biografiskemu słownikej je korektura, zo narodźi so Hejduška 1914 w Njebjelčicach a zo zemrě 1944 w Grjekskej. Přidatej stej foto basnika a faksimile titulneje strony časopisa Praskich studentow Gmejnska heja.

Z pjera Jana Boučeka je wobšěrna recensija knihi dr. Jany Tischeroveje „Matej V. Jäckel – sochař českého baroka“. Je to 734 stron tołsta monografija wo rodźenym Kulowčanu Maćiju Wjacławje Jakuli (1655–1738). Sochar-rězbar bě „wosebje w Čechach, zdźěla pak na Morawje, w Hornjej Łužicy a Sakskej skutkował“. Awtorka spisa běše tež we Łužicy slědźiła – w klóštromaj Marijinej hwězdźe a Marijinym dole kaž tež w Kulowje. Dr. Tischerová wustaja, zo słušeja tři Jakulowe postawy na Praskim Kar­lowym mosće k jeho najwuznamnišim, koriguje pak zdźěla rozšěrjene měnjenje, zo stej skupina figurow w Marijinej hwězdźe a hłowny wołtar Kulowskeje cyrkwje dźěło Jakule.

Zapósłane (17.08.15)

póndźela, 17. awgusta 2015 spisane wot:

Zjawny dźak Chróšćanskemu pjekarjej Florianej Zahrodnikej wupraja Jadwiga Gerberichowa:

Wutrobny dźak a šokran wupraja syriscy ćěkancy z Holešowa Chróšćanskemu pjekarjej Florianej Zahrodnikej za njesebičnu pomoc a wulke wjeselo, kotrež je jim darił. Hižo dźewjaty měsac čakaja požadarjo azyla w Holešowje na rozsudy zarjadow. Jenož jěsć, spać a čakać, mało socialnych kontaktow a wulka njewěstosć njewuskutkuja so jenož na psychu. Wone žiwjenje kóždeho jednotliwca na rozdźělne wašnje poćežuja. Starša syriska žona chcyše swojim krajanam małe wjeselo wobradźić a spřihotowa ćěsto za pola nich woblubowane pječwo „baklawa“. Njebě pak móžno wulki blach do pjecy sunyć. Tež wokolni pizza-pjekarjo njemějachu wotpowědne kachle. Na koho bychu so hišće wobroćić móhli? „Moja wučerka“ bě posledni wupuć. Wona zazwoni do Chrósćic, a hižo prěnje naprašowanje bě wuspěšne. Pjekar napječe rjenje wonjacy bruno-žołty worjechowy „tykanc“, a to darmotnje.

Za Syričanow-Palestinjanow woznamjenješe to wjace hač někajki wulki materielny dar a bě jim zdobom kusk domizny.

Witaj-hibanje wažne za serbstwo

štwórtk, 06. awgusta 2015 spisane wot:

Choćebuz (ML/SN). „W Braniborskej su Serbja runje wolili, wo čimž móžachu lětstotki jeno sonić. Prěni króć w stawi­znach su swoje zastupnistwo w Braniborskim krajnym sejmje, Radu za serbske naležnosće, w direktnych wólbach postajili. Nowy Serbski zakoń, schwaleny loni wot krajneho parlamenta w Podstupimje, je za to zakład. Nowosć su němscy zapósłancy, kotrymž je tež serbska rada kaž w Sakskej poboku, hnydom sobu wobzamknyli. W Podstupimskej statnej kencliji stara so z Mětom Nowakom Serb wo naležnosće słowjanskeje mjeńšiny, kotraž so wot dalšich w Němskej žiwych ludowych skupin w tym rozeznawa, zo nimaja Serbja maćerny kraj. Woni su financielnje na Němcow pokazani.“

nawěšk

nowostki LND