Lětuše hornjołužiske předewzaćelske myto hódnoći trendy a inowacije
Budyšin (SN/JK). Wuspěšnych a towaršnostnje angažowanych předewzaćelow Hornjeje Łužicy wuznamjenjeja hižo wot lěta 1996 z hornjołužiskim předewzaćelskim mytom. Lětsa, jubilejny dwacety raz su hłownemu iniciatorej myta, Marketingowej towaršnosći Hornja Łužica-Delnja Šleska (MGO), dwanaće namjetow za to zapodali. Wo nošerjach myta je minjenu srjedu rozsudźiła wosebita jury ze zastupjerjow hospodarstwa, politiki a zarjadnistwow Hornjeje Łužicy.
Při rozsudźe dźiwa jury na kriterije, kaž su to firmowa filozofija a inowacije předewzaća, ale tež personalna politika a wukubłanje młodych ludźi a wosebite zasadźenje předewzaća za Hornju Łužicu a jeho wuprudźenje na region. Dobyćerjow chcedźa 30. junija w Budyšinje składnostnje lětušeho srjedźostawskeho dnja počesćić.
