Ratarjo maja so ze zjawami přirody wotnamakać
Budyšin (SN/JK). Lětuše wjedrowe kapriole ludźi znjeměrnjeja. Po dołhej suchej zymje smy měli suche nalěto, naslědnje ekstremnu horcotu a po tym njewšědne zliwki a krupy.
Minjenu sobotu je ćežke njewjedro po dźělach Łužicy ćahnyło. Wulka woda wudrě na skłoninach pódu, přepławi dwory, pincy a garaže. Krupy, wulke kaž hołbjace jeja, rozbichu mnohe lochke třěchi a skóncowachu nimo toho wulke mnóstwa rostlin, kwětkow a zeleniny w zahrodkach.
Rozdźělne su wuskutki njewjedra na polach a w ratarskich kulturach Budyskeho wokrjesa. Wulki zahon kukuricy Holanskeje farmy w Zdźěri su krupy zbili, a zastupowacy jednaćel Rudi Zentgraf rěči wo dospołnym wupadźe. Dalše škody njejsu zwěsćili. Njewjedro je teritorij farmy jeno dźělnje trjechiło. Najebać to pak na lochkich pódach ze žitom runje derje njesteji. Tam su wuskutki suchoty dale widźomne. „To tež spadki nětko wjace njepomhaja“, Zentgraf měni. Zažne běrny su njewjedro přetrali a so dale derje wuwiwaja, jim je dešć tył.