Zrěčenje wo łužiskich jězorach změje pozitiwny wliw na komuny
Lejno (JoS/SN/JK). Wuměnjenja za dočasne wužiwanje łužiskich jězorow su nětko jasnje zapisane we wobłukowym zrěčenju wo wužiwanju jězorow w Sakskej. Wotpowědne dojednanje staj wčera w Lejnom sakski hospodarski minister Martin Dulig (SPD) a předsyda jednaćelstwa Łužiskeje a srjedźoněmskeje towaršnosće hórnistwoweho zarjadnistwa (LMBV) Klaus Zschiedrich podpisałoj. Hižo lěta 2008 běštej so Swobodny stat Sakska a LMBV na to dojednałoj, zo přewozmje Sakska po saněrowanju zamołwitosć za jězory.
Nowe zrěčenje, kotrež dotalne wudospołnja, zmóžnja wosebje turistiske wužiwanje jězorow hižo za čas saněrowanja. „Z wudospołnjacym dojednanjom smy namakali rozrisanje, kotrež ma za zamołwite komuny, ale předewšěm tež za turistow wjele lěpšin. Saněrować hórniske naslědne krajiny je wuměnjenje za nowe struktury a wožiwjenje hórnistwoweje krajiny“, zjima minister Dulig wažnosć dojednanja.