Přichod Choćebuskeho regiona při „rozmołwje w bróžni“ rozjimali
Choćebuz-Strobice (RLc/SN). „Łužica 2030 – Kak chcemy žiwi być?“, rěkaše tema minjeny pjatk w Strobičanskej dźiwadłowej bróžni. Prašenje je w Choćebuzu a wokolnym rewěrje před pozadkom strukturneje debaty energijoweje industrije w Němskej tuchwilu nade wšo aktualne. Diskutanća wječorka lubjachu žiwe koło: Ulrich Freese (SPD) zastupuje jako znaty Grodkowski brunicowy lobbyist a zapósłanc zwjazkoweho sejma łužisku wulkoindustriju, Monika Schulz-Höpfner (CDU) přewza napřećiwnu rólu jako předsydka wokrjesneho sejmika Sprjewja-Nysa a profilowana kritikarka brunicy. Na podiju sedźeštaj dale moderator-šefredaktor nowiny Lausitzer Rundschau Johannes M. Fischer a jednaćel Carla Thiemoweho klinikuma dr. Andreas Brakmann. Prof. Matthias Koziol z Choćebuskeje BTU wobdźěli so jako wědomostny eksperta.