Suchoty dla wočakuja ratarjo přerězne wunoški
Budyšin (SN/JK). Lipa ani hišće dźewjeć dnjow njekćěje a hižo klepaja žnjency kosu abo su ju zdźěla hižo druhi raz klepali.
Zašo hač w minjenych lětach su so tónkróć žně žita w Němskej zahajili. Hižo kónc junija běchu w tak mjenowanych zažnožnjenskich kónčinach Sewjerorynskeje-Westfalskeje nazymski ječmjeń młóćić započeli.
Tež ratarjo Budyskeho wokrjesa su při najwyšich temperaturach minjeneho kónca tydźenja žně zahajili. Nazymski ječmjeń ma so jako prěni młóćić a do składow wozyć. Hladajo na lětuše suche wjedro wočakuja ratarjo mjenje wunoška hač loni w rekordnym lěće. Sakski burski zwjazk liči na lochkich pódach z hač do 40 procentami mjenje žita, na srěnich stejnišćach z prawdźepodobnje 15 procentami mjenje. Porno lońšemu rekordnemu lětu móhli so wunoški lětušich žnjow w Němskej wo wjac hač dźewjeć procentow na 47,2 milionaj tonow pomjeńšić.