Kupcow rady tež serbsce poradźuja
Budyšin/Kamjenc/Pančicy-Kukow (SN/mwe). Ke klientam Budyskeje Ludoweje banki, kaž w Kamjenskej filiali blisko kupnicy Kaufland, słušeja tež Serbja. Njedawno poradźowaše tam młody muž wowku, kotraž čas žiwjenja serbsku narodnu drastu nosy, w jeje maćeršćinje. Je to za mjenowany pjenježny institut samozrozumliwe?
Nowinski rěčnik Budyskeje Ludoweje banki Andreas Wanitzek na naprašowanje SN zdźěli: „Haj, to je za našich serbskorěčnych sobudźěłaćerjow wěc wutroby, to sej samo přejemy. Přinošuje dźě nałožowanje zhromadneje maćeršćiny sobu k přećelskemu wobchadźenju z našimi klientami, runje tak kaž k dobremu zwiskej k nim. Ćim bóle so wjeselimy, su-li mjez wučomnikami tež młodźi Serbja. Wězo jich přewažnje w filialach zasadźamy, hdźež Serbja bydla, zo móhli tam tutu lěpšinu wužiwać.“