Lětnje wjedro tyje zaměrnemu pokročowanju dźěłow
Budyšin (SN/JK). Lětuše žně w Němskej su so hižo w juniju započeli. Wokomiknje žněja ratarjo pšeńcu, rěpik a nalětni ječmjeń. Němska hospodarska słužba aktualny staw žnjow registruje. Tak bě minjenu njedźelu w Němskej 38 procentow pšeńcy a 84 procentow ječmjenja wumłóćene. Na rěpikowych płoninach su ratarjo hižo 56 procentow wotžnjeli.
Tež w Sakskej su so žně lětsa wjedra dla hižo w juniju zahajili. Hladajo na dołhi suchi čas wočakuja tudyši burja jeno 60 do 80 procentow lońšich wunoškow na lochkich pódach a wokoło 80 procentow na wšitkich dalšich płoninach. Kwalitu zorna žnjencarjo jara rozdźělnje posudźuja. Tak sahaja posudki wot hubjenje hač do jara derje.
Łužiscy ratarjo při tuchwilnym wuběrnym wjedrje žně dale w dobrym stawje dochowaja. Hłownje su syčomłóćawy nětko w pšeńcy zasadźene.