Wuslědki lětušich žnjow ratarjo přewažnje jako přerězne posudźuja

Budyšin (SN/JK). Němski burski zwjazk je zakónčacu rozprawu lětušich žnjow wozjewił. Wot meje trajaca suchota je widźomne slědy na žitnišćach zawostajiła. Cyłkownje su němscy ratarjo 46,5 milionow tonow žita nažnjeli, jědnaće procentow mjenje hač loni.

Wunoški žnjow pak burja rozdźělnje hódnoća. Ći jedni su přesłapjeni a bychu rady wjace nažnjeli, tamni zaso su, cyłkowne wobstejnosće wobkedźbujo, spokojom hladajo na wuslědk žnjow. K nim słuša nazhonity ratar Dietrich Hesse, jednaćel Holanskeje farmy Zdźěr. Žně posudźuje wón jako přerězne. Wunoški nastupajo pšeńcu, rěpik a ječmjeń běchu spokojace, pola rožki mějachu wupady suchoty dla. „Smy na dypku, hdyž ma towaršnosć wo tym rozmyslować, što je spomóžne a što normalne. Ratarjo maja so skónčnje zaso jako producenća připóznać, jich dźěło z fairnymi a wunošnymi płaćiznami hódnoćić. Hakle tak nastanu strowe poměry wot producenta ke konsumentej“, zjima Hesse žadanja a wočakowanja mnohich ratarjow.