Što budźe z telko brunicu? poručenje

wutora, 01. septembera 2015
artikl hódnoćić
(0 )

Wuhlo pod Łužicu dosaha hišće 2 000 lět, ale nichtó je měć nochce

Choćebuz/Běła Woda (SN/JK). We łužiskej zemi leži po najnowšich dopóznaćach hišće 80 miliardow tonow brunicy. 42 miliardow tonow z toho hodźi so wužiwać, štož by při konstantnym wudobywanju 2 000 lět dosahało. Tole zdźěli braniborski hospodarski minister Albrecht Gerber (SPD) po parlamentariskim naprašowanju.

Łužiske brunicowe łožišća su druhe najwjetše Němskeje. Přewažny dźěl łužiskeho wuhla so na městnje zmilinja. Braniborska a Sakska chcetej so we wobłuku energijoweje strategije hač do lěta 2030 na wobnowjomne energije wusměrić. Přiwšěm budźe zmilinjenje brunicy k zastaranju z energiju tež po lěće 2030 dale wažnu rólu hrać.

Hoberske składy pod Łužicu pak najskerje přidatnje abo docyła trěbne njebudu. Wšako so nětko hižo dosć miliny, mjez druhim tež z wobnowjomnych žórłow produkuje. Samo energijowy koncern Vattenfall je znamjenja časa spóznał a chce hladajo na dale a dróše zmilinjenje brunicy brunicowu spartu we Łužicy předać.

wozjewjene w: Hospodarstwo
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND