Nowe wukubłanske lěto zahajene
Budyšin (SN/JK). Wučomnicy w Sakskej su minjeny tydźeń nowe wukubłanske lěto započeli. Jedni pokročuja z wukubłanjom, tamni nastupja z prěnim wukubłanskim lětom nowy žiwjenski wotrězk. Nětko so pokaza, hač je rozsud za wuzwolene powołanje prawy był.
Sakscy rjemjeslnicy su lětsa z ličbu a zajimom wukubłancow spokojom. Drježdźanska rjemjeslniska komora njedawno wozjewi, zo je hač do kónca awgusta 1539 wučomnikow wukubłanske zrěčenje podpisało. To drje je dwaceći mjenje hač loni, ale hač do kónca lěta maja šulscy wotchadnicy hišće chwile, wukubłanje zahajić. W rjemjeslniskich zawodach blišeje wokoliny samo na sebi derje wupada. Tam, hdźež kiwa dobra powołanska perspektiwa, nimaja starosće, wučomnikow namakać. Problemy maja w tych powołanjach, kotrež su po dźěłowym času njepřijomne abo hdźež na kóncu móžna zasłužba njespokoja.
