Towarstwam po saněrowanju Hórnikečanskeho jězora perspektiwu dać

Łaz (AK/SN). Gmejna Łaz chce mnohim towarstwam po saněrowanju Hórnikečanskeho jězora tam zaso wěstu domi­znu dać. Za to wuprajichu so tele dny gmejnscy radźićeljo. K tomu wobzamknychu zakładne stejišćo k wuwiću towarstwoweho srjedźišća. Po lěće 2021 ma wone na teritoriju něhdyšeho campingownišća Z1 na juhozapadnym pobrjohu jězora nastać. „Chcemy towarstwam dołhodobnje přichod runać“, podšmórny Jens Kieschnick, zamołwity Łazowskeje gmejny za hórnistwo, „narěčeni su wosebje płachtakowarjo, kanuća­, wudźerjo a wodowi sportowcy.“

Gmejna chce zajimcow wusko wjazać a jim zmóžnić so znowa při jězoru zasydlić. Zdobom chce jich pohnuć, dołhodobnje jězorej a gmejnje swěrni wostać. Přihotujo přichodny hospodarski plan gmejny budu wotpowědne planowanske wukony wobkedźbowane a zrjadowane. „Towarstwa maja so aktiwnje zapřijeć do planowanja trěbnych twarskich naprawow“, Jens Kieschnick rozjasni, „jenož hdyž sčasom wěmy, kajke přeća a předstawy towarstwa maja, móžemy srjedźišćo za nje zaměrnje wuwiwać.“