Wikowarjo zeleniny a sadu maja so z konkurencu z wuchoda měrić

Budyšin (SN/JK). Na tydźenskich wikach łužiskich městow mamy tuchwilu dobry poskitk sadu a zeleniny. Lětsa je zaso dosć narostło a mnozy plahowarjo chcedźa to, štož předźěłać njemóža, rady dalšim zajimcam poskićeć. Nimo tudyšich wikowarjow a plahowarjow wuhladamy na wikach tež tójšto pólskich wikowarjow, kotřiž swoje płody poskićuja. Pólski sad a zelenina so porno domjacej njerozeznawa, wšo je čerstwe a bjezporočne. A tola je mjez wikowarjemi bytostny rozdźěl: płaćizna tworow. Pólski sad a zelenina stej přewažnje nimale wo třećinu tuńšej. A dokelž njeje žanoho kwalitneho rozdźěla, rozsudźi so kupc za tuńši poskitk z Pólskeje.