Ratarjo Budyskeho wokrjesa žněja nětko kukuricu, cokorowu rěpu a picu
Budyšin (SN/JK). Čujomnje a wočiwidnje, za někotrehožkuli zawěsće přezahe je nazyma zaćahnyła. Z wěstej spokojnosću zhladuja ratarjo přiwšěm na minjene měsacy a na wjeršk ratarskeho lěta, žně. Nětko wěnuja so połnje nazymskim dźěłam, wšako njeje po domchowance dźěło na polach dawno hišće zakónčene. Rolu wobdźěłać, hnojić a herbicidy pryskać je runje tak wažne kaž kukuricu, cokorowu rěpu a picu za skót žnjeć.