Lědma informacijow k jednanjam wo železniskim zwisku do Wrócławja
Budyšin (SN/at). Powěsć wo němsko-pólskim železniskim wjeršku 11. septembra w Podstupimje bě zwjeselaca: Ze změnu jězbneho plana w decembrje maja zaso ćahi z Drježdźan direktnje do Wrócławja jězdźić. Nimo toho běchu so wo dalšim polěpšenju dojednali: Pólske ćahi njech přichodnje hač do Zhorjelskeho dwórnišća jězdźa, zo by so přistupjenje do zapadneho abo wuchodneho směra z ćahow Trilex zmóžniło. Kónc septembra bě Zwjazkowe wobchadne ministerstwo zasadnje zelenu swěcu za rjadowanje dało.
Za dwaj měsacaj nabywa nowy jězbny plan železnicy płaćiwosće. Kajki pak je staw jednanjow? „Wone běža, ZVON pak na nich wobdźěleny njeje“, rjekny jednaćel wobchadneho zaměroweho zwjazka Hornja Łužica-Delnja Šleska (ZVON) Hans-Jürgen Pfeiffer, skedźbnjo na železniskej předewzaći DB Regio a Trilex, kotrejž z pólskej stronu jednatej.