Srjedźostawske předewzaća a dźěłowe mocy dale trěbne

Łuty (AK/SN). Łužica trjeba wotewrjenu kulturu witanja a přebywanja za so nawróćacych, zapućowacych a ćěkancow. Tak hodźa so dołhodobnje dźěłowe mocy zdobywać. To potwjerdźi dr. Andreas Brühn, nawoda fachoweho wobłuka za zjawnostny management Budyskeje studijneje akademije, wčera na sympoziju „Dźěłowy swět Łužicy 2030“ we Łutowskim technologiskim centrumje. Něhdźe 80 zastupjerjow hospodarstwa, politiki, wědomosće, kultury a wobydlerstwa so na zarjadowanju wobdźěli.

Budyski wokrjes změje hač do lěta 2030 něhdźe 50 000 wobydlerjow mjenje, zwěsći Andreas Brühn. W samsnym času pomjeńši so ličba dźěłakmanych wobydlerjow. „Ćěkancy móhli dźěl rozrisanja problema być“, wón rozłoži, „zapućowanje budźe dołhodobnje jedyn z aspektow, tele resursy wotkrywać.“ To móhło k zawěsćenju socialnych systemow přinošować. Docent wabješe za to, tuchwilnu dobru naladu a motiwaciju pozběha wužiwać. Runje studenća móhli posrědnicy mjez domjacymi a cuzymi być. „Kontakt k cuzym měł so stać wšědny dźeń.“