Lětuše rybowe tydźenje su nimo. Na nje wróćo zhladujo su wobdźělnicy přewažnje spokojom. Pod smužku je łužiska ryba swojej domiznje zaso dobru słužbu wopokazała.
Budyšin (SN/JK). Tak přerosćene kaž přez cyłe lěto bě wjedro tež nazymu. To pak njeje lubowarjam a přećelam łužiskeje ryby škodźało. Hač na małe wuwzaća su łójenje rybow a rybowe swjedźenje łužiskich rybarjow zaso derje wopytane byli. Nimo čerstweje ryby a pokazkow, kak ju rybarjo žněja, mějachu wopytowarjo składnosć, sej najwšelakoriše rybjace wudźěłki zesłodźeć dać.
Hosćency su organizatorej łužiskich rybowych tydźenjow, Marketingowej towaršnosći Hornja Łužica-Delnja Šleska (MGO), dobry wothłós na rybowe jědźe wobkrućili. „Najebać wotpowědne płaćizny su sej wosebje turisća, ale tež domjacy gurmejojo časćišo rybu we wšelakich wariantach skazali“, wobkrući našemu wječornikej wotrjadnica MGO Antje Lehmann. „Někotři hosćencarjo su nam hižo signalizowali, zo njewědźa, hač so klětu znowa wobdźěla. Dźeń a mjenje personala dla maja hižo lětsa ćeže, hosći zastarać“, wona doda.