Sakska na kulturnym, turistiskim a kulinariskim polu tójšto poskića

Berlin (SN/JK). Wčera, na krajnym dnju we wobłuku Mjezynarodneho zeleneho tydźenja je sakski ratarski minister Thomas Schmidt (CDU) wustajerjow swobodneho stata wopytał. Tući prezentowachu kwalitu a wukonliwosć tudyšeho ratarstwa a zežiwjenskeho přemysła. Mjez nimi bě kaž hižo loni Koćinski Krabatowy mlokowy swět z wulkej paletu twarožkow. Po wopyće předewzaćow zjima minister: „Lětsa stajamy sakske wosebitosće do srjedźišća. To njejsu jenož wot Europskeje unije škitane speciality kaž Drježdźanski wosušk, łužiski lany wolij abo hornjołužiski biokarp, ale tež dalše regionalne wosebitostki. Sakska móže na tym polu wjele poskićeć. Wo tym móža so hosćo na stejnišćach našich předewzaćow přeswědčić.“