Kamjenske kwasne wiki tež wjele Serbow přiwabili
Kamjenc (SN/mwe). Šesty króć je Kamjenčan Ralf Stephan ze swojej mandźelskej Sylviju njedźelu w Kamjenskim hosćencu hotel „Město Drježdźany“ kwasne wiki organizował. Najebać pancate wjedro je sej wjele ludźi z Kamjenskeje kónčiny kaž tež z Lubijskeho a Zhorjelskeho regiona, haj samo z Drježdźan, do Lessingoweho města dojěło. Mjez nimi bě tež tójšto młódšich a staršich Serbow. Wšako so mnozy na zeleny, slěborny abo złoty kwas hotuja. Tež za dalše swójbne swjedźenje su na wulkej žurli hotela a před njej wjele rjaneho prezentowali. Woči mnohich młodych porow so błyšćachu, hdyž po wupyšenym domje dundachu. Mnozy hižo raz pola fotografa pozastachu, sej krasne njewjesćinske šaty a pisane kwěćele wobhladachu abo oldtimer jako kwasne awto inspicěrowachu. Hodźi so potajkim rjec, wšitko, štož k wuhotowanju a přewjedźenju kwasa słuša, samo spěwar na wěrowanju abo diskotekar na rejach, bě zawčerawšim na Kamjenskich wikach widźeć.