Do zahajenja lětušich Kamjenskich přemysłowych wikow WIR je so Jan Kral rozmołwjał z nawodu Budyskeho wokrjesneho wuwićoweho zarjada a hłownym nawodu přehladki Andreasom Heinrichom.
Z kotrymi wočakowanjemi zhladujeće na lětuše wiki WIR w Kamjencu?
A. Heinrich: Wokrjesna přehladka WIR wotměwa so lětsa hižo 24. króć a je so wuwiła na typiske wiki za přetrjebarjow. Wona poskića wulku paletu produktow, posłužbow a informacijow, wot A kaž awto přez E kaž energijowu eficiencu hač k T kaž turizm. Nic naposled informuje lětsa tež wo wěstosći bydlenjow. Wjeršk budźe zawěsće wubědźowanje pjekarskeho zwjazka. Tam móža so wopytowarjo wo dobrym słodźe pjekarjow našeho regiona přeswědčić. Kładźemy wosebitu wažnosć na regionalne wudźěłki a posłužby, zo by so naše regionalne hospodarstwo přez nje dale skrućiło a rostło. Do toho směra du tež moje wočakowanja. Jako zarjadowar wikow poskićamy móžnosć so prezentować, a nadźijamy so wuspěšnych nowych kontaktow mnohich firmow a předewzaćow. Hosćom wikow chcemy tři dny połne zabawy a informacijow zaručić.
