Hospodarstwo wuchodneje Sakskeje dominuja małe předewzaća a rjemjeslniske zawody. Runje wone su jara wuspěšne a inowatiwne. W Kamjencu so kóžde lěto tysacy zajimcow wo nowych trendach a poskitkach regionalnych předewzaćow na přehladce WIR informuja.

Kóždolětnje w měrcu wusměrja so tež zajim sakskeho hospodarstwa do směra na Kamjenc. Na tamnišich wikach WIR prezentujetej so wuspěšnje wuchodosakske hospodarstwo a rjemjesło. Hižo wot spočatka wikow steji woznam pismikow WIR za hospodarstwo, informaciju a region. A wone tři pismiki steja tež za tradiciju, wšako so přehladka hižo 24. króć wotměje. Wot 18. do 20. měrca wočakuje w halach regiobusa 240 wustajerjow zaso wulku ličbu zajimowanych fachowych abo tež prosće na informaciju wusměrjenych wopytowarjow.