Jězba wabi z njewšědnymi kreacijemi kucharjow

Jiwow (SN/BŠe). Nimo dobreho poskitka je předewšěm tež wjedro přičina, zo ludźo do hosćenca chodźa. Runje minjeny kónc tydźenja tomu tak běše, zdźělichu hosćencarjo na wčerawšim zarjadowanju Marketingoweje towaršnosće Hornja Łužica-Delnja Šleska (MGO) w Jiwowje (Eibau)­, nadźijacy so, zo je „ćežki čas“ zymy skónčnje nimo. „Wjeselimy so na nalěćo a na nowych hosći“, wujasni sobudźěłaćerka MGO Antje Lehmann. A zo bychu hišće wjac ludźi kaž tež turistow do hosćencow wabili, su hižo loni ideju chłóšćenskeje jězby zrodźili. Kóždy měsac poskićeja wot toho časa we wobdźělacych so hosćencach kulinarisku wosebitostku z regionalnym poćahom. Na kwartalnym zarjadowanju marketingoweje towaršnosće warja kucharjo jědźe měsaca, zo bychu je tamnym předstajili. Lětsa wěnuja so hłownje kreacijam z jabłukami a truskalcami. Wosebitostki minjenych třoch měsacow rozłožichu mjez druhim na Zelenym tydźenju w Berlinje kaž tež na wikach w Lubiju, hdźež su je wopytowarjo jara pozitiwnje hódnoćili.