Budyska a Drježdźanska ludowa banka chcetej so zjednoćić

Drježdźany (SN/BŠe). Budyska ludowa banka chce po nowych pućach kročić a so klětu z Drježdźanskej ludowej banku zjednoćić. Hłowna přičina toho je, zo stej zhromadnje sylnišej a kmanej profitabelnje dźěłać. Wčera su zamołwići wobeju institutow wotpowědne kooperaciske zrěčenje w Drježdźanach podpisali. „Njeje žaneje nuzy za tónle krok. Nam so derje dźe. Z fuziju pak móžemy lěpje na hospodarske połoženje reagować“, wuswětli Klaus Otmar Schneider z předsydstwa Budyskeje ludoweje banki.

Wo zjednoćenju rozmyslowali běchu zastupjerjo předsydstwow bankow hižo dlěši čas. Wšako stej sej we wjele dypkach podobnej, a to nic jenož po přestrjeni. Zhromadnje změjetej přichodnje 1,7 miliardow eurow k dispoziciji a stanjetej so tak z najwjetšej drustwowej banku Sakskeje. „W zhromadnym regionje móžemy intensiwnišo dźěłać a tak wyšim narokam wotpowědować a wužiwarjow našich posłužbow kwalitatiwnišo poradźować“, Schneider rozłoži.