Chcedźa Sprjewju blisko Lěmišowa wo 1,5 kilometrow podlěšić
Stróža (SN/BŠe). Sprjewju zaso wožiwić, jej zaso městno dać je zaměr projekta biosferoweho rezerwata Hornjołužiska hola a haty. Dźe wo to, nětko chětro runje ćečacu rěku starym kanalam, kotrež běchu před 80 lětami wotdźělili, zaso přizamknyć. Tak budźe Sprjewja wo 1,5 kilometrow podlěšena. Lochko to prajene, je pak hoberski nadawk. Při planowanju dźě ma so tójšto wobkedźbować. Wosebje wobličenja wulkeje wody a z njej zwisowace přepławjenske płoniny su wužadanje. Klětu chcedźa na něhdźe sydom kilometrow dołhim wotrězku mjez Lemišowom a Lěskej twarić započeć. ,,Tak sej to rady přejemy, hač to docpějemy njemóžemy hišće dokładnje rjec“, zdźěla komisariski nawoda biosferoweho rezerwata Torsten Roch.