Toni Ryćer ze Šunowa poby njedawno w Nowosólcu-Grodku pola Reneja Münnicha, wobsedźerja teama Münnich Motorsport, a je so z nim rozmołwjał.
Renéjo, wy sće jenički němski team w swětowej seriji WTCC. Kak hódnoćiće wukon k zazběhej w Argentinskej z wida teamoweho šefa?
R. Münnich: Hladajo na nam date móžnosće běše 9. městno našeho jězdźerja Stefana D‘Aste porjadny wuspěch. Bohužel je wón w druhim běhu hižo krótko po starće kolizije dla wupadnył.
Koho widźiće jako faworita za mišterstwo?
R. Münnich: Kaž loni hižo je to wězo Citroën – bjezdwěla najlěpše jězdźidło z podpěru zawoda. Jako tajneho faworita za tu abo tamnu překwapjenku widźu awto Lada Vesta.
Čehodla runje Ladu?
R. Münnich: Nimo dobreho techniskeho koncepta, wuwiteho pola francoskeho specialista na tym polu, firmy Oreca, je to wosebje wurjadny jězdźer Rob Huff, kiž je w zašłosći tež hižo za naš team jězdźił.
Maće hišće wotpohlad, druhe awto w tutej seriji zasadźić?
R. Münnich: Haj, jednamy w tym směrje z inwestorom.