Wuskutki a sćěhi kónca mlokoweje kwoty su rozdźělne
Budyšin (SN/JK). Rjadowanje mlokoweje produkcije w krajach Europskeje unije z pomocu kwoty je 31. měrca wuběžało. Zamołwitosć a swoboda mlokoweje produkcije wróćitej so tuž zaso do rukow tych, kotřiž je wšědnje produkuja.
Mlokowu kwotu zawjedli běchu 1984 hladajo na tehdyšu nadprodukciju, dokelž měješe dochody producentow a dalše wobstaće jich zawodow zawěsćić. Wróćo zhladujo pak njeje wona planowane zaměry docpěła, njeje płaćizny stabilizowała a njeje ani zadźěwała změnam w strukturach mlokoweje produkcije.
W ratarskich zawodach Budyskeho wokrjesa je so minjene lěta tež w mlokowej produkciji tójšto změniło. Nimo nowych hródźow inwestowachu zawody do načasneje dejenskeje techniki. Zaměr toho bě a je, produkciju mloka na hospodarsce spokojacym niwowje stabilizować. To cyle jednorje rěka wukon na kruwu zwyšić, wobstatk skotu rozšěrić a kóšty znižić.