Finale zahajene

štwórtk, 11. apryla 2019 spisane wot:

Rakecy (SN/BŠe). Rozsudźacy gremij Leaderoweho regiona Hornjołužiska hola a haty je za to, kompletnu sumu 3,3 milionow eurow za projektnej namołwje nalěto a w lěću wupisać. Tak započina so nětko finale srědkow Leader, wšako spěchowanska perioda klětu wuběži.

Regionalny běrow Leaderoweho regiona ze sydłom w Rakecach je předwčera­wšim 12. namołwu we wobjimje 950 000 eurow zahajił. Podłožki měli hač do 17. meje w Rakecach předležeć. Jako hłowne ćežišćo postaja gremij znowawužiwanje stareje twarskeje substancy we wjesnych kónčinach. Tež za ideje turistiskich inwesticijow, naprawow za zjawne městnosće, za projektne wuwiće a spěchowanje inwesticijow w rybarstwje su wotpowědne pjenjezy k dispoziciji.

W Mnichowje wotměwaja so tuchwilu najwjetše wiki twarskich mašinow swěta „Bauma“. Wjac hač 3 500 wustajerjow ze wšeho swěta prezentuje tam twarske jězdźidła, graty a tójšto wjac. Třeći króć je mjez wustajerjemi serbska firma Matješk-PowerTools ze Sernjan. Ze swojimi sobudźěłaćerjemi předstaja tam šef Michał Matješk (naprawo) mjez druhim sylne elektriske a hydrawliske šrubowaki, kotrež zasadźeja jeho kupcy předewšěm w hórnistwje a hdyž wětrniki montuja. Foto: MPT/Katja Möllerec

Kak tropowy powětr při pječenju pomha

štwórtk, 11. apryla 2019 spisane wot:

Budyšin/Kinspork. Předewzaće Debag Deutscher Backofenbau ma stejnišći w Budyšinje a Kinsporku a předstaji na Drježdźanskich wikach Sachsenback wot 13. do 15. apryla prěni raz nowowuwitu pěc za wobchody Monsun-mini. Wona přenošuje wupruwowany a dotal jenož při wulkopjecach nałožowany monsunski princip na mjeńše pjecy, kotrež hodźa so w předawanskich rumnosćach pjekarnjow abo kupnicow wužiwać.

Dźensniša firma Debag ma swoje korjenje w lěta 1924 w Budyšinje załoženej wotewrjenej wikowanskej towaršnosći „Gustav Schmidt & Söhne“, kotruž běchu 1972 z mjenom „VEB Backofenfabrik Bofaba“ zestatnili. Tehdy w Mnichowje zasydlena Debag je 1990 jeničkeho producenta pjecow w NDR přewzała. W lětach po tym su Mnichowske stejnišćo zawrěli, Budyšin sta so z jeničkim sydłom předewzaća. „Jenož mało Mnichowskich sobudźěłaćerjow je tehdy sobu do Budyšina přišło“, nawoda za rozšěrjenje Oliver Theiß smějkotajo rozprawja. Wón dźě dokładnje wě, zo wjedźeše we wonych lětach dźěłowy puć zwjetša do nawopačneho směra.

Turistikarjo a poskićerjo posłužbow z Budyšina zetkachu so wčera w tudyšim Serbskim domje, hdźež přewjedźechu swoje lětne zarjadowanje z mjenom „Jour-fixe-turizm“. Mjez druhim wobhladachu sej tež Serbsku kulturnu informaciju. Sobudźěłaćer SKI ­Beno Šołta skedźbni wobdźělnikow dnja na mnohotne serbske poskitki. Foto: SN/Maćij Bulank

Na hłownej zhromadźiznje towarstwa Serbski kulturny turizm su so čłonojo z nowej ideju zaběrali, turistow wo našim­ ludźe informować. Serbšćina ­je hłowny dypk.

Rěčny kurs na serwjetach je jedyn z projektow, kotrež Załožba za serbski lud spěchuje. „Předewšěm wusměrja so projekt na hosćencarjow. Woni měli turistow na serbšćinu skedźbnjeć“, je předsyda towarstwa Serbski kulturny turizm Pětr Brězan na njedawnej hłownej zhromadźiznje we Łazu mysličku přitomnym rozkładł. Partner je delnjoserbske kulturne towarstwo Studnja, kotrež měješe zakładnu ideju. Tuchwilu zdźěłuja grafiski koncept. Zakładne wobroty, kaž Dobry dźeń abo Dobry wječor měli so na serwjetach jewić. Runje tak zapřijeć chcedźa akterojo wšelake mustry módroćišća. „Hosćency móhli tež swój logo naćišćeć dać“, Pětr Brězan podšmórny. Towarstwo Serbski kulturny turizm chce projektej praktisce přidźěłać.

Wobličo pokazać!

wutora, 09. apryla 2019 spisane wot:
Wjele Budyšanow sej kóžde lěto hłójčku łama, kak móhli wopytowarjow města k jutram překwapić. Tak zrodźi cityjowa managerka Gunhild Mimuß ideju, jednotny pyšny wobraz nutřkowneho města wopytowarjam pokazać. Z pomocu Steglichec zahrodnistwa přihotuja mnozy čestnohamtscy pomocnicy něhdźe 3 000 syrotkow, kotrež we wobchodach abo při pućach nastaja. Hrónčka na připinjenych chorhojčkach maja hosći do města witać. Minjene lěta wšak njejsu wopytowarjo z wulkej prócu přihotowanu pychu zwjetša dožiwili, dokelž bě so prosće zhubiła. Pozdźišo běchu rostliny na rowach abo na balkonach bydlenjow widźeć. Škoda, zo wobydlerjo šansu zapasu, Budyšin hosćom raz na přećelne a wote­wrjene wašnje spřistupnić. Wšako negatiwne powěsće wo měsće w medijach přewažuja. Runje k jutram, hdyž tysacy wopytowarjow přińdu, móhli wobličo pokazać a dobry hosćićel być. Bianka Šeferowa

W Radušu hotuja so na sezonu

wutora, 09. apryla 2019 spisane wot:
Wjace hač sto lět stary bobrowc (Magnolie) při Radušanskim młynje pokazuje so tele dny w najrjeńšej nalětnjej pyše. Tež w ponowjenym młynje zahaja nowu sezonu. Mějićel Frank Petzold chce prěni króć přizjewjene skupiny po młynje wodźić a jim starosławne młynske rjemjesło rozkłasć. K tomu poskići kofej a tykanc. Přichodnej wjerškaj stej Bože spěće a dźeń młynow swjatki póndźelu, hdyž budźe 1771 natwarjeny młyn wšitkim wopytowarjam přistupny. Foto: Peter Becker

Pančicy-Kukow (SN/mwe). „Klóšterska stwička“ w Pančicach-Kukowje – na klóšterskim dworje – je dale zawrjena. Wotnajerjo běchu woblubowany hosćenc z „klóšterskej pincu“ a dalšej hóstnej rumnosću kónc lěta 2018 začinili a zrěčenje z wobsedźerjom domu, klóštrom ­Marijinej hwězdu, wupowědźili. W interneće pak pod „Klóšter Marijina hwězda – na wopyće – Klóšterska stwička“ wčera přeco hišće mylnje steješe: wot 11 do 14 hodź. wotewrjene.

Na naprašowanje našeho wječornika, hač je so hižo naslědnik namakał, klóšterska sotra ­Tadeja zdźěli: „Konkretnych požadarjow bohužel hišće nimamy. Dotal su sej ­‚Klóštersku stwičku‘ jenož ludźo wobhladali, kotřiž w datym padźe po­družnikow posrědkuja.“ Kaž z klóšterskeho běrowa dale rěka, „njeje pytanje za wotnajerjom momentanje lochke“. Wšako tež druhdźe dźeń a wjace korčmarjow swoje hosćency zawěra, dokelž prosće personal kaž kucharjow a pinčnikow njenamakaja, ­dokelž do restawranta wšědnje lědma štó, kaž kolesowarjo a pućowacy, załoža.

Dotal třećina idejow k žiwej dwurěčnosći

póndźela, 08. apryla 2019 spisane wot:

Wot 15. měrca hač do 15. apryla traje wubědźowanje „Sakskeho fondsa Čiń sobu“, z kotrymž chce knježerstwo ludnosć motiwować, wot deleka k strukturnej změnje přinošować. Tež serbska kategorija je pódla.

Znowa jednali

pjatk, 05. apryla 2019 spisane wot:

Kamjenc (SN/BŠe). W Kamjenskim předewzaću accumotive, hdźež zhotowjeja baterije za awta koncerna Daimler, jedna IG metal tuchwilu ze zastupjerjemi dźěłodawarja. Zaměr je, w Sakskej płaćiwe tarifowe zrěčenje metalo- a elektroindustrije přesadźić. Kaž prěni społnomócnjeny dźěłarnistwa we wuchodnej Sakskej Jan Otto zdźěli, su jednanja konstruktiwne. Hladajo na rozsudnu temu, mzdu, su so hižo na ramik dojednali. „Přiwšěm wostawaja nahlady nastupajo dalše wažne dypki chětro rozdźělne“, Jan Otto wuzběhny.

Hakle zawčerawšim stej wobě stronje w Kamjencu wuradźowałoj a móžne zaměry postajiłoj. Na přichodnym terminje póńdźe wo dźěłowe wuměnjenja, za čož su zhromadne wodźenja po zawodźe předwidźane. Tema měło tohorunja přechodne rjadowanje nowych mzdow być, kaž z dźěłarnistwa rěka.

Kamjenski zawod accumotive je so w minjenymaj lětomaj chětro rozšěrił. Nětko maja tam wjac hač 1 300 sobudźěłaćerjow. Kónc decembra bě IG metal mějićela zawoda koncern Daimler k tarifowym jednanjam namołwiła. Mjez druhim žadaja sej tam 35 dźěłowych hodźin wob tydźeń, štož je wosebitostka.

nawěšk

SERBSKE NOWINY podpěruja:

Novi Sad – kulturna stolica Europy

nowostki LND